بۇگىن، 1 جەلتوقسان كۇنى ماڭعىستاۋ وبلىسىنىڭ اكىمى نۇرداۋلەت قيلىباي گرۋزيانىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى ليەۆان دياساميدزە باستاعان دەلەگاسيامەن كەزدەستى.

تاراپتار ماڭعىستاۋ وبلىسى مەن گرۋزيا اراسىنداعى ەكونوميكالىق، كولىك-لوگيستيكالىق، تۋريستىك جانە مادەني باعىتتار بويىنشا ىنتىماقتاستىقتى كەڭەيتۋ ماسەلەلەرىن تالقىلادى.

وبلىس اكىمى نۇرداۋلەت قيلىباي ماڭعىستاۋدىڭ ينۆەستيسيالىق مۇمكىندىكتەرىنە توقتالىپ، ءوڭىردىڭ گەوگرافيالىق ورنالاسۋى، كولىك ينفراقۇرىلىمى جانە قولايلى ينۆەستيسيالىق احۋالى ەكى جاقتى سەرىكتەستىك ءۇشىن ماڭىزدى فاكتور ەكەنىن ايتتى.

– ماڭعىستاۋ ءوڭىرى – ەلىمىزدىڭ ونەركاسىپتىك ورتالىقتارىنىڭ ءبىرى. ءبىز مۇناي-گاز، كولىك-لوگيستيكا، تۋريزم، وڭدەۋ ونەركاسىبى جانە اگروونەركاسىپ سالالارى بويىنشا ءوزارا ءتيىمدى جوبالاردى دامىتۋعا مۇددەلىمىز. اسىرەسە كاسپيي ارقىلى ترانزيتتىك مۇمكىندىكتەردى كەڭەيتۋ باعىتىندا بىرلەسكەن باستامالارعا اشىقپىز، – دەدى ايماق باسشىسى.

كەزدەسۋدە كاسپيي تەڭىزى ارقىلى قۇرىق – اليات (ازەربايجان) باعىتىندا تۇراقتى تەڭىز پاروم قاتىناسىن ۇيىمداستىرۋ جوباسى تالقىلاندى. «Georgian Industrial Group» باستاماسىمەن ىسكە اسىرىلىپ جاتقان جوبا اياسىندا 2026 جىلدىڭ العاشقى جارتىجىلدىعىندا ەكى پارومدى ىسكە قوسۋ جوسپارلانۋدا. 2027 جىلعا قاراي پاروم فلوتى التى كەمەگە دەيىن ۇلعايماق. بۇل كاسپيي باعىتىنداعى جۇك تاسىمالى كولەمىن ارتتىرۋعا، پورت ينفراقۇرىلىمىن دامىتۋعا جانە «ترانسكاسپيي حالىقارالىق كولىك باعىتىنىڭ» تيىمدىلىگىن كوتەرۋگە مۇمكىندىك بەرەدى.

ءوز كەزەگىندە ەلشى ليەۆان دياساميدزە گرۋزيانىڭ كولىك، لوگيستيكا جانە تۋريزم سالالارىندا قازاقستانمەن، سونىڭ ىشىندە ماڭعىستاۋ وبلىسىمەن ىنتىماقتاستىقتى نىعايتۋعا مۇددەلى ەكەنىن اتاپ ءوتتى.

ايتا كەتەيىك، ماڭعىستاۋ وبلىسى مەن گرۋزيا اراسىنداعى 2025 جىلدىڭ قاڭتار-قازان ايلارىنداعى سىرتقى ساۋدا اينالىمى 1،9 ملن اقش دوللارىن قۇرادى. بۇگىندە وڭىردە گرۋزين كاپيتالىنىڭ قاتىسۋىمەن 51 كاسىپورىن جۇمىس ىستەيدى.

ماڭعىستاۋ وبلىسى اكىمىنىڭ باسپا ءسوز قىزمەتى