بۇگىن، 2 جەلتوقسان كۇنى وبلىس اكىمى نۇرداۋلەت قيلىبايدىڭ توراعالىعىمەن وتكەن اپپاراتتىق كەڭەستە 2025–2026 جىلدارعا ارنالعان جىلىتۋ ماۋسىمىنىڭ ءوتۋ بارىسى، اقتاۋ قالاسىنىڭ قىسقى دايىندىق دەڭگەيى جانە مەملەكەتتىك قىزمەتتەردىڭ ساپاسى قارالدى.
جيىندا وبلىستىق ەنەرگەتيكا جانە تۇكش باسقارماسىنىڭ باسشىسى بەردىبەك قارتبايەۆ، اقتاۋ قالاسىنىڭ اكىمى ءابىلقايىر بايپاقوۆ جانە سيفروۆيزاسيانى دامىتۋ جانە مەملەكەتتىك قىزمەتتەر مونيتورينگى ءبولىمىنىڭ باسشىسى روزا مۇعالوۆا اتقارىلعان جۇمىستار مەن جوسپارلار تۋرالى اقپارات بەردى.
بايانداماعا سايكەس، وڭىردەگى جىلىتۋ ماۋسىمى تۇراقتى رەجيمدە وتۋدە. جالپى وبلىس بويىنشا 407 اۆتونومدى قازاندىق، 334 ءبىلىم بەرۋ، 105 دەنساۋلىق ساقتاۋ مەكەمەسى جانە 1930 كوپپاتەرلى تۇرعىن ءۇي جىلۋمەن قامتىلعان. اقتاۋدا انىقتالعان 259 اقاۋدىڭ بارلىعى قالپىنا كەلتىرىلدى.
قالا اكىمى ءابىلقايىر بايپاقوۆ بيىل جىلۋ بەرۋ 7–10 قازان ارالىعىندا باستالعانىن اتاپ ءوتتى. جىلۋ جەلىلەرىندە انىقتالعان 493 اقاۋ دەر كەزىندە جويىلعان. ماەك 300 گيگاكالوريا جىلۋ بەرۋدە، الايدا قالانىڭ قاجەتتىلىگى — 745 گيگاكالوريا. دەفيسيتتى ازايتۋ ءۇشىن بلوكتى-مودۋلدى قازاندىقتار ىسكە قوسىلىپ، قوسىمشا 67 گيگاكالوريا ءوندىرىلىپ جاتىر. ەلەكتر جەلىلەرىن جاڭارتۋ جۇمىستارىنىڭ 17،1 كم اياقتالىپ، قالعان بولىگى جىل سوڭىنا دەيىن تولىق ءبىتىرۋ جوسپارلانعان.
ءوڭىر باسشىسى تۇرعىن ۇيلەردىڭ قىسقى ماۋسىمعا دايىندىعىنا ەرەكشە نازار اۋدارۋدى تاپسىردى.
- تۇرعىن ۇيلەر تولىق جىلۋمەن قامتاماسىز ەتىلدى دەگەنمەن، ءىس جۇزىندە ءبىرقاتار ۇيلەردىڭ دايىن ەمەستىگى انىقتالدى. تۇرعىندار ءوز نارازىلىقتارىن الەۋمەتتىك جەلىلەر ارقىلى جازۋدا. ياعني جەكەلەگەن ۇيلەردە جىلۋ ماسەلەلەرى بار ەكەنى كورىنىپ وتىر. مۇنداي ماسەلەلەر نازاردان تىس قالماۋعا ءتيىس. تۇرعىن ۇيلەرگە قىزمەت كورسەتەتىن ۇيىمداردىڭ جاۋاپكەرشىلىگىن كۇشەيتىپ، ولاردىڭ جۇمىسىن قاتاڭ باقىلاۋعا الىڭىزدار»، – دەدى نۇرداۋلەت قيلىباي.
سيفروۆيزاسيانى دامىتۋ جانە مەملەكەتتىك قىزمەتتەر مونيتورينگى ءبولىمىنىڭ باسشىسى روزا مۋگالوۆانىڭ ايتۋىنشا، 2025 جىلى وبلىستا 7،7 ملن مەملەكەتتىك قىزمەت كورسەتىلگەن. ونىڭ 98،2%-ى ەلەكتروندى فورماتتا ىسكە اسقان. مەرزىم بۇزۋشىلىقتار سانى ءبىر جىلدا 4 ەسەگە ازايعان: 2024 جىلعى 106 جاعدايدان 2025 جىلى 25 جاعدايعا دەيىن تومەندەگەن. ەرەجە بۇزعان قىزمەتكەرلەرگە تارتىپتىك شارالار قولدانىلعان.
جيىن قورىتىندىسىندا وبلىس اكىمى جىلىتۋ ماۋسىمىنىڭ بارىسىن تۇراقتى باقىلاۋدا ۇستاۋدى، تۇرعىنداردىڭ شاعىمدارىنا جەدەل ارەكەت ەتۋدى جانە مەملەكەتتىك قىزمەتتەردىڭ ساپاسىن ارتتىرۋ بويىنشا ناقتى شارالار قابىلداۋدى تاپسىردى.
ماڭعىستاۋ وبلىسى اكىمىنىڭ باسپا ءسوز قىزمەتى
