قازاقستاندا "كەزەكتەن تىس پرەزيدەنت سايلاۋى ءوتۋى مۇمكىن" دەگەن اقپارات بارلىق ب ا ق بەتتەرىندە كەڭىنەن تارالدى. بۇل الەۋمەتتىك جەلىلەردە قىزۋ تالقىعا ءتۇسىپ، ءتۇرلى پىكىرلەر ايتىلا باستادى. وسىعان بايلانىستى Qamshy.kz پورتالى قوعام قايراتكەرلەرى مەن زيالى قاۋىمنىڭ پىكىرىن بىلگەن بولاتىن.
باقىتبەك سماعۇل، ءماجىلىس دەپۋتاتى:
– جالپى قازاقستان حالقى اسسامبلەياسى ۇسىنىپ وتىرعان بۇل باستامانى بارشا حالىق قولدايدى دەپ ويلايمىن. "ماڭگىلىك ەل"، "نۇرلى جولدا" ايتىلعانداي حالىقتىڭ ۇستانىمى - تىنىشتىق، بەيبىتشىلىك، تاتۋلىق. ەلباسىنىڭ ەلىمىزدىڭ دامۋى جولىندا جاساعان ەڭبەگى ولشەۋسىز. مۇنى جاڭساق تۇسىنۋگە بولمايدى. قازاقستان حالقى اسسامبلەياسى ءوز ۇپايىن تۇگەندەۋ ءۇشىن ەمەس، ەلدىڭ تىنىشتىعى، جارقىن بولاشاققا باعىت العان جاس قازاقستاننىڭ بولاشاعىن ويلاناعدىقتان وسىنداي باستامانى ۇسىنىپ وتىر دەپ ءتۇسىنۋ كەرەك. ءبىز اۋعان سوعىسى ارداگەرلەرى ءارقاشان ەلباسىن قولدايمىز، قولداپ قانا قويماي قورعايمىز دا. شىنداپ قاراساڭىز، اينالامىزداعى كورشىلەس ەلدەر قانشا جەردەن كۇلىپ قاراپ وتىرعانىمەن، ءبىر ساۋساعىن ىشىنە بۇگىپ وتىرعانى انىق. وسىنداي ساياسي سوعىس، اقپاراتتىق سوعىس كەزەڭىندە ءبىز جۇمىلعان جۇدىرىقتاي بولىپ، ءبىر اۋىزدان ەلباسىن قولداۋىمىز كەرەك. جانە مىنانى بىلە جۇرگەن ابزال. پرەزيدەنتكە باعىنۋ-وعان تابىنۋ ەمەس، ساياساتىن قولداۋ-جاعىنۋ دەگەن ءسوز ەمەس. دەموكراتيالىق ەلدە ءومىر ءسۇرىپ وتىرعان سوڭ، كەز كەلگەن ۇمىتكەر سايلاۋعا قاتىسا الادى، ارينە. ءبىراق، 98 پايىز حالىق ەلباسىن قولدايدى دەپ سەنىممەن ايتا الامىن.
اسلى وسمان، قوعام قايراتكەرى:
– ەل باسقارۋ، باسشىنى تاعايىنداۋ، بۇل وتە ماڭىزدى، جاۋاپكەرشىلىكپەن قارايتىن شارۋا. بۇعان ءاتۇستى قاراي سالۋعا بولمايدى. قازىرگى تاڭدا ەلباسى سەكىلدى شىن مانىندەگى دارىندى ساياساتكەر، ۇمىتكەر جوق. سوندىقتان مەن، ارينە، ەلباسىن قولدايمىن.
قاسىم امانجول ۇلى، جۋرناليست:
– سايلاۋ بولادى. ناتەجيەسى دە بەلگىلى. اسسامبلەيا باستاپ، "نۇر وتان" قوستاپ، تاعى قاپتاعان جۇرت جاپا تارماعاي جالىنىپ جاتىپ پرەزيدەنتتى كەزەكتەن تىس سايلاۋدى جاريالاۋعا كوندىرەمىز. سوسىن، نازاربايەۆ تاعى ءبىر مارتە 98 پايىز داۋىس الىپ، ەل سەنىمىن جانە بەس جىل ارقالاۋعا كەلىسەدى.
زاعيپا بالييەۆا، ءماجىلىس دەپۋتاتى:
– بۇل باستامانى تولىق قۇپتايمىن. وعان بىرنەشە وبەكتيۆتى سەبەپ بار. قازاقستان حالقى اسسامبلەياسىنىڭ ۇسىنىسىنا نازار اۋدارۋ كەرەك. مىسالى 2011 جىلى پرەزيدەنت جانە پارلامەنت سايلاۋى ءبىر مەزەتتە كەزەكتەن تىس وتكەنى ءمالىم. پرەزيدەنتتىڭ "نۇرلى جول - 2020" باستاماسى دا ورتا جولدا، اياقسىز قالماۋى كەرەك دەپ ويلايمىن. سونداي-اق، ەلدە كريزيس بولماعانىمەن، سىرتقى فاكتورلار بار. وسىنداي قىسىلتاياڭ كەزەڭدە پرەزيدەتتى كەزەكتەن تىس سايلاپ الساق، الداعى بەس جىلدا ساياسي تۇراقتىلىقتى ساقتاپ قالۋعا بولادى.
ايدوس سارىم، ساياساتتانۋشى:
– ءاربىر سايلاۋ ەلدىڭ، ساياسي ەليتانىڭ، ساياسي ۇرانداردىڭ جاڭارۋىنا الىپ كەلۋى قاجەت. سايلاۋدىڭ باستى مۇراتى مەن مىندەتى وسى. ەگەر وسىعان قول جەتكىزە الار بولساق، الداعى سايلاۋ ءوزىنىڭ ماقسات-مىندەتىن ورىندادى دەپ ايتا الامىن.
جامبىل احمەتبەكوۆ، قكپ مۇشەسى، ءماجىلىس دەپۋتاتى:
– كەز كەلگەن ساياسي پارتيا توسىن وزگەرىستەرگە، سونىڭ ىشىندە سايلاۋ پروسەسىنە دايىن بولۋى كەرەك. ءبىز دە حالىقتىق كوممۋنيستەر پارتياسى قازاقستان حالقى اسسامبلەياسىنىڭ بۇل باستاماسىن توىقتاي قۇپتايمىز.
راسۋل جۇمالى، ساياساتناۋشى:
– وسى جولعى كەزەكتەن تىس سايلاۋدان ايتارلىقتاي جاڭالىق، نە وزگەرىس كورىپ وتىرعانىم جوق. مۇنداي سايلاۋلار بۇعان دەيىندە بولعان. بۇل سايلاۋعا دا ادەتتەگىدەي بالاما ۇمىتكەرلەر قاتىسارى انىق. ءبىراق ول قورىتىندى ناتەجيەگە ەش اسەرىن تيگىزبەيدى. ال بيىلعى سايلاۋعا ۇمىتكەرلەرگە كەلەتىن بولساق، م.ەلەۋسىزوۆتىڭ ەسىمى ەستىلىپ قالدى. جانە وزدەرى تاراپىنان، ساياسي پارتيالاردان ۇمىتكەرلەر بولۋى مۇمكىن. ءبىراق، وپپازيسيا تاراپىنان ورتاق ءبىر ۇمىتكەر بولۋى نەعايبىل. سەبەبى بىزدەگى بىتىراڭقى وپپوزيسيا سايلاۋ الدىندا بىرىگە قويماسى انىق. سوندىقتان ولاردان بىرنەشە ۇمىتكەر بولىپ قالۋى ىقتيمال. ءبىراق، مۇنىڭ ءبارى قورىتىندى ناتيجەگە ىقپال ەتە المايدى.
ەسكە سالا كەتەيىك، 14 اقپان كۇنى قازاقستان حالقى اسسامبلەياسى كەڭەسى مۇشەلەرى قازاقستاندا كەزەكتەن تىس سايلاۋدى وتكىزۋ تۋرالى باستاما كوتەرگەن.
