الماتىدا "جەڭگەتايلىقتى" كاسىپ ەتكەن قىرعىزستان ازاماتشاسى ۇستالدى. بۇل تۋرالى قالالىق ءىىد باسپا ءسوز قىزمەتى حابارلادى.

ۇيىمداسقان قىلمىسقا قارسى كۇرەس باسقارماسىنىڭ حابارلاۋىنشا، 23 جاستاعى بويجەتكەن جانسۇگىروۆ كوشەسىنىڭ بويىنداعى قوناق ۇيلەردىڭ بىرىندە جەزوكشەلەر ورداسىنىڭ جۇمىسىن ۇيلەستىرىپ كەلگەن.

"ءقازىر ازاماتشاعا قارسى قىلمىستىق كودەكستىڭ 309-بابى بويىنشا (جەزوكشەلەر ورداسىن ۇيىمداستىرۋ، جەزوكشەلىكپەن اينالىسۋدى ۇيىمداستىرۋ، جەڭگەتايلىق) تەرگەۋ جۇمىستارى قوزعالدى"، - دەدى ءىىد ۇيىمداسقان قىلمىسپەن كۇرەس باسقارماسىنىڭ باسشىسى تاڭات نازانوۆ.

ونىڭ ايتۋىنشا، قوعامدىق ورىنداردا جىنىستىق قاتىناس قىزمەتىن ۇسىنعان بويجەتكەندەرگە قارسى قالالىق پوليسيا كەشەندى جوسپار قۇرعان.

"وتكەن جىلى 96 قوناق ۇيدە جەزوكشەلەردىڭ قىزمەتى ۇسىنىلاتىنى انىقتالدى. ولاردىڭ يەلەرىنە 26 ملن تەڭگە كولەمىندە ايىپپۇل سالىندى. ءبىزدىڭ ۇسىنىسىمىزبەن 9 قوناق ءۇيدىڭ جۇمىسى توقتاتىلدى"، - دەپ قورىتىندىلادى نازانوۆ.

2014 جىلى الماتى پوليسياسى جەزوكشەلىكتى ۇيىمداستىرۋ بويىنشا 100 قىلمىستى اشكەرەلەدى. ونىڭ ىشىندە 2 جاعدايدا كامەلەتتىك جاسقا تولماعان جاس جەتكىنشەكتەر ساۋدالانعان. "قازاقپارات"