"قازاق حاندىعىنا 550 جىل" شىعارماشىلىق بايگەسىنە ارعى جىلدار ارعىماقتىڭ جالىندا، قۇس ۇيقىمەن ءتۇن قاتىپ، جاۋعا ءدۇبىر تىڭداتىپ، تەرلىگى اتتىڭ ۋلانىپ، قونىستانىپ نۋ بارىپ، توعىز قابات تورقالى، رۋح سىڭگەن تۋدى الىپ، جاۋعا شاپقان ەل ەدىك. ارعى جىلدار قارا ناردىڭ بەلىنە، كەرەگەنى قوم قىلىپ، تۋىرلىقتى شوم قىلىپ، قىلدان بۇيدا ەستىرىپ، توبىلعى مۇرىندىق جوندىرىپ، اق سامايلى اجەنى، نار ۇستىنە قوندىرىپ، ساپارىمىزدى وڭ بۇرىپ، جايلاۋعا كوشكەن ەل ەدىك. ارعى جىلدار سىرىكتى تاۋدا قوي باعىپ، قوي كۇيىسىمەن ويلانىپ، سەگىز ءورىم قامشى الىپ، جوتالى جوننان اڭ شالىپ، جورتۋىلداپ جون كەزىپ، ءبورى سوعىپ قانشالىق، قانجىعامىز قان ساسىپ، ايۋدان ىشىك جامىلىپ، مومىندىعىنان جاڭىلىپ، كورمەگەن قوڭىر ەل ەدىك. ارعى جىلدار ارقان ءتىلىپ تالىستان، شالما تاستاپ الىستان، ورمەسى سەگىز تاسپالى، سەسكەندىرەتىن باسقانى، ەر استىنا ارقان ساپ، تاقىمنان سەركە لاقتىرىپ، سەرىلىكپەن تاڭ اتتىرىپ، بەتەگەلى بەلدەرگە، بەس تۇلىگىن باقتىرىپ، ەركىن وسكن ەل ەدىك. ارعى جىلدار اتالى سوزگە دەس بەرىپ، القالى توپتى ەسكەرىپ، سامايىن شالعان اق قىراۋ، ساقالدى قارتتان سەسكەنىپ، قوڭىر كوڭىلى قوزداعان، دالا تىلىندە بوزداعان، قوبىزدىڭ ءۇنى تىم ىزگى، سانانىڭ سىرىن ساپىرىپ، سارناعان سازدى سىبىزعى، ساعىم جىلداردى ەسكە الىپ، ساپىرىپ ىشكەن قىمىزدى، ساليقالى ەل ەدىك. بەرگى جىلدار بەرى قايتتى كوشىمىز، جوتالى جوندا جوسىپ ءىز، ءبىرىمىز ءسال-پال قينالىپ، ءبىرىمىز نۇرلى بۇيدا الىپ، ساياسي ۇلى كوشكە ەرىپ، ءبارىمىز سونى قوش كورىپ، التايدا ءبىرىڭ الاڭداپ، ارعى تاۋدا بالاڭ قاپ، سەنىمىن جۇكتەپ ارقاعا، تاريح تەڭىن تەڭدەگەن، كوش كەلدى سارىارقاعا، قوش كەلدىڭ ۇلى مەرەكە، تارقاما شاتتىق تارقاما...

دۇرگىنباي ۇلى قىزىربەك – 1990 جىلى دۇنيەگە كەلگەن. شىعىس قازاقستان مەملەكەتتىك ۋنيۆەرسيتەتىنىڭ فيلولوگيا فاكۋلتەتىنىڭ تۇلەگى. ءقازىر وسكەمەن قالاسىنداعى و.بوكەي اتىنداعى قالالىق كىتاپحانا قىزمەتكەرى.