اتىراۋ وبلىسىنىڭ قىلمىستىق ىستەر بويىنشا مامانداندىرىلعان اۋدانارالىق سوتى 4 جاسار قىزدى زورلاۋعا ارەكەت جاساۋ ءىسى بويىنشا ۇكىم شىعاردى.

قىلمىس وتكەن جىلدىڭ قىركۇيەگىندە وبلىس اۋداندارىنىڭ ءبىرىنىڭ ورتالىعىندا جاسالعان ەدى. 38 جاستاعى ماس جەرگىلىكتى تۇرعىن بالمۇزداق الىپ بەرەم دەپ ءسابيدى الداپ، ءوز ءۇيى اۋلاسىنداعى مونشاعا كىرگىزگەن.

سول جەردە ول قىزدى شەشىندىرىپ، قارسىلىق كورسەتكەندىكتەن ونى ۇرعان. بۇل ۋاقىتتا پوليسەيلەر ۇلگەرىپ كەلىپ، مونشا ەسىگىن بۇزىپ كىرىپ، قاسكۇنەمدى ۇستادى.

سوتتالۋشىنىڭ كىناسى تولىقتاي دالەلدەنىپ، قىلمىستىق كودەكستىڭ 121-بابى 4-تارماعى ("ون ءتورت جاسقا تولماعان تۇلعاعا قاتىستى جىنىستىق سيپاتتاعى زورلىق ارەكەتتەرىن جاساۋ") بويىنشا وعان قاتاڭ رەجيمدەگى كولونياعا 15 جىل باس بوستاندىعىنان ايىرۋ جازاسى كەسىلدى.