اقپاننىڭ 22- سىندە   «قازاقستان داۋىسى» جوباسىنىڭ ەكىنشى ماۋسىمىنىڭ جەڭىمپازى باۋىرجان رەتبايەۆ پەن جاقىندا اتاۋىن وزگەرتكەن «داۋىس.كز» توبىنىڭ مۇشەسى بەردىبەك قۇلعارايەۆ تۋعان جەرگە ورالدى. اقتاۋ اۋەجايىنا كەلگەن ءانشى جىگىتتى اتا-اناسى جانە ءبىر توپ جانكۇيەرلەرى كۇتىپ الدى. ولار جاس ءانشىنى جەڭىسىمەن قۇتتىقتاپ، ەستەلىككە سۋرەتكە ءتۇستى. باۋىرجان ءوز كەزەگىندە وزىنە داۋىس بەرگەن بارشا قازاقستاندىقتارعا العىسىنىڭ شەكسىز ەكەنىن تاعى ءبىر رەت ايتتى.

ال بىزگە ماڭعىستاۋعا ورالعان باۋىرجانمەن سۇحباتتاسۋدىڭ ءساتى ءتۇستى. 

- جەڭىسىڭ قۇتتى بولسىن! جوباداعى ەڭ قيىن ساتتەرىڭ قاي كەزدەر بولدى؟

- ەڭ قيىن ساتتەر ءبىر ەفيردەن كەيىن ەكىنشى ەفيرگە  تۇسىرىلىمگە تاڭەرتەڭ  ەرتە بارعان كەزدەر دەر ەدىم. ول كەزدە ينتەرۆيۋ بەرىپ، دايىندىق جۇمىستارىمەن قىزۋ اينالىساسىڭ. ودان باسقا ايتارلىقتاي  قيىندىقتار بولا قويعان جوق.

 — جەڭىسكە جەتۋىڭ تالىمگەرىڭنىڭ نەمەسە ۇلىقپان جولداسوۆتىڭ ارقاسى ما؟

- مەن تالىمگەرىم نەمەسە ۇلىقپان اعانىڭ ارقاسى دەي المايمىن. ماعان ءبىرىنشى بولىپ كومەكتەسكەن حالىق. مۇنىڭ بارلىعى حالقىمنىڭ ارقاسى. بۇل جەردە بارلىعىن حالىقتىڭ داۋىسى شەشتى. مىقتى دەگەن داۋىس يەلەرى وتپەي قالىپ جاتتى. وزدەرىڭىز كوردىڭىزدەر.

- فينالدا ورىنداعان ولەڭدەرىڭنىڭ ىشىندە قايسىسى ەڭ قيىنى بولدى؟

-  فينالدا ورىنداعان اندەرىمنىڭ ىشىندە ەڭ قيىنى «سەن مۇڭىمدى بەر ماعان» ءانى بولدى. ويتكەنى، ءبىر اپتادا ءۇش ءاننىڭ ءسوزىن جاتتاۋ وڭاي ەمەس.

-ۇلىقپان جولداسوۆتان باسقا دا شاقىرعان پروديۋسەرلەر بولدى ما؟

-يا، شاقىرىپ جاتقاندار كوپ. اسا تانىمال پروديۋسەرلەر دەپ ايتا الماس ەدىم. ءبىراق ۇلىقپان اعانى ءبىز («داۋىس.كز» ايتادى) اكە دەپ ەسەپتەيمىز. ۇلىقپان اعانى دالاعا قالدىرمايمىز.

-5 ملن تەڭگەنى قايدا جۇمساماق ويىڭ بار؟

- وسىعان دەيىن شىعارماشىلىعىما جۇمسايمىن با دەپ ويلاپ ەدىم. ءبىراق ءقازىر ويلانىپ ءجۇرمىن. ۇستىنە قاراجات قوسىپ ءۇي العىم دا كەلەدى. الماتى نەمەسە استانا قالاسىنان.  ونى الداعى ۋاقىتتا كورەرمىز.

- «داۋىس.كز» جاقىندا گاسترولدىك ساپارعا شىعادى دەگەندى ەستىدىك. قاي قالالاردى ارالاماق ويلارىڭىز بار؟

- يا، گاسترولگە شىعۋ ويىمىزدا بار. قاي قالالاردى ارالايتىنىمىز ازىرگە بەلگىسىز.  ازىرگە ستۋديادا ءان جازىپ جاتىرمىز.

- جاڭا ءان جازىپ جاتىرسىز با؟ ولار قانداي مازمۇندا؟

- يا، جاڭا اندەر جازىپ جاتىرمىز. ون-جيىرما ولەڭدى البومعا دايىنداۋ ۇستىندەمىز. قازىرشە ەكى ولەڭ بار. بىرەۋى «اققانات ايداي پەرىشتەم» دەگەن ليريكالىق ءان. ەكىنشىسى «اقماڭداي» دەگەن قازىرگى جاستاردىڭ ستيلىندەگى «كلۋبنياك» دەپ جاتاتىن اندەردىڭ قاتارىنا جاتادى.

 — باسقا قانداي تىلدەردە ءان ايتاسىڭ؟

- يسپان، يتاليان، ورىس تىلدەرىندە ءان ايتامىن. ءبىراق «قازاقستان داۋىسىندا» شەت ەلدىك اندەردى ايتۋعا كوپ مۇمكىندىك بولمايدى. جوبادا ءبىر رەت قانا شەت تىلىندە ءان ورىندايسىڭ.

- سۇحباتىڭا راحمەت!

baistars.kz