اقتوبە وبلىسىندا جەر ءۇي ورتەنىپ كەتتى.
العا اۋدانىنداعى كۇلگە اينالعان ۇيدەن ورتا جاستاعى ايەل ادامنىڭ ءمايىتى تابىلعان. ال ءورت باسپانانىڭ ءتور بولمەسىنەن شىعىپتى. ساناۋلى ۋاقىت ىشىندە بارلىق بولمەلەردى شارپىپ ۇلگەرگەن.
وسى وقيعاعا بايلانىستى قايتىس بولعان ايەلدىڭ تۋىستارى سول ۇيدە بىرگە تۇرعان كۇيەۋ بالالارىنان كۇدىكتەنىپ وتىر.
"مەنىڭ اپام ۇيىقتاپ جاتقان. ال جيەن قارىنداسىم بولسا كۇيەۋىمەن ۇرىسىپ قالىپتى. ونى كۇيەۋى ۇيگە كىرگىزبەي قويعان. قارىنداسىمىز تاكسيمەن اجەسىنىڭ ۇيىنە بارعان بويدا ءۇيدىڭ ورتەنىپ جاتقانى تۋرالى حابار الادى. ءورتتى قاساقانا قويعان دەپ ويلايمىن. سەبەبى وت اسۇيدەن نەمەسە گاز قۇرىلعىلارى تۇرعان جاقتان شىقپاعان. قوناق بولمەگە بارىپ، بىرەۋ ادەيى وت تۇتاتپاسا، قالاي جانادى؟ 54 جاستاعى قايتىس بولعان اپامىزدىڭ دا ەس بىلمەي ۇيىقتاپ قالعانىنا كۇماندانامىز. ونى ورتتەن قۇتقارۋعا بولار ەدى عوي. تەرەزەلەر دە اشىق بولعان" ، - دەيدى العا قالاسىنىڭ تۇرعىنى دميتريي مانويلوۆ.
ءقازىر وسى وقيعاعا بايلانىستى تەكسەرۋ جۇمىستارى ءجۇرىپ جاتىر. ءورت سوندىرۋشىلەر وبلىستىق ىشكى ىستەر دەپارتامەنتىنە ساراپتاما ءۇشىن قاجەتتى ماتەريالداردى تابىستاپتى.
ەندى ولار ءمان-جايدىڭ اق-قاراسىن انىقتايتىن بولادى. Bnews.kz
