الماتىدا بەلگىلى رەجيسسەر ەرمەك تۇرسىنوۆتىڭ شىعارماشىلىق كەشى ءوتتى. سوڭعى جىلدارى ەلىمىزگە «كەلىن» جانە «شال» فيلمىمەن تانىمال بولعان رەجيسسەر ءوزىنىڭ شىعارماشىلىعى مەن ءومىرى تۋرالى كوپتىڭ كوڭىلىندە جۇرگەن سۇراقتارعا جاۋاپ بەردى. ەرمەك تۇرسىنوۆ ءوزىنىڭ ناشار ستۋدەنت بولعانىن ايتا كەلىپ، قيقار مىنەزى ءۇشىن وقۋدان دا شىعىپ قالعانىن جاسىرعان جوق. كەزىندە قازمۋ-دىڭ جۋرناليستيكا فاكۋلتەتىنىڭ دەكانى تەمىربەك قوجاكەيەۆ: «تۇرسىنوۆ، سەن مەنىڭ قارا تىزىمىمدە ەكىنشى تۇرسىڭ» دەپ ايتا بەرگەن سوڭ، «اعاي، وندا ءبىرىنشى بولىپ كىم تۇر؟» دەپ سۇراپتى. سوندا عالىم-ۇستازى: «ول باياعىدان بەرi تۇرمەدە وتىر» دەپ جاۋاپ بەرىپتى. – ستۋدەنت كەزىمدە 40 سوم ستيپەنديا الدىم، ەت كومبيناتىندا جۇمىس ءىس­­تەپ، قوسىمشا اقشا دا تاپتىم، – دەيدى رەجيسسەر. وندا جۇمىسقا كىرۋ دە وڭاي بولماپ­تى. ايتەۋىر امالىن تاۋىپ، ەت كومبيناتىندا قاساپشىلىقتى ۇيرەنىپ قاراجات تاۋىپتى. ال ماسكەۋدە وقىعاندا وت جاعۋشى، بالاباقشادا كۇزەتشى دە بولعان. ال اقش-تا ءتۇرلى كاسىپتى مەڭگەرىپ، ومىردەن كوپ نارسە ۇيرەنەدى. قازاقستانعا ورالعان سوڭ تەليەۆيدەنيا مەن راديو كورپوراسياسىن باسقارىپ، گازەت تە اشقان. كەشتە «شال» ءفيلمى ءسوز بولدى. ال ناۋرىز ايىندا «كەنجە» اتتى كارتينانى ءتۇسىرۋدى باستاماقشى. ول «كەنجە» ءتۇسىرىلىمى ءۇشىن كونە مەشىت ىزدەپتى. سەبەبى رەجيسسەر ءبىراز جىل تاياۋ شىعىستا تۇرعاندىعىن ايتا كەلىپ، سونداعى مەشىتتەرگە ۇقساس عيماراتتى قاراستىرعان. داماسكىدە ەڭ جاڭا مەشىتكە 800 جىلداي بولسا، الماتى وبلىسىنان بىردە-بىر كونە مەشىت تاپپاپتى. رەجيسسەر الەمنىڭ ءار تۇكپىرىندە بولۋمەن قاتار، ونداعى قازاقتارمەن كەزدەسىپ، قوناقتا بولعاندىعىنا توقتالدى. ولار؛ «و، قازاق كەلدى!» دەپ قۋانا قارسى العان. ولاردىڭ اراسىندا ءوز ءتىلىن بىلمەيتىندەر كەزدەسكەنىمەن، ۇلتىنا كورسەتەر قۇرمەتتەرى شەكسىز ەكەن. تانىمال رەجيسسەر ەرمەك تۇرسىنوۆقا شەتەلدەن سۇرانىس تا ءتۇسىپتى. «جۇلدىز» جاساۋعا كەپىلدىك تە بەرىپ­­ءتى. ءبىراق ول بارلىعىنان باس تارتقان. ولاردىڭ سەنارييلەرىنەن ادام شوشيتىندىعىن ايتقان رەجيسسەر: «ەت كومبيناتىندا جۇرگەندەگى ءومىرىم ەسىمە تۇسەدى دەيدى ول. سوندىقتان ۆامپيرلەر تۋرالى تۇسىرۋدەن باس تارتىپتى. ەرمەك تۇرسىنوۆتىڭ بۇل شىعارماشىلىق كەشى كوپتىڭ كوڭىلىنەن شىقتى.