ەلىمىزدە 18 جاسقا تولماعان قىزداردىڭ جۇكتى بولىپ قالۋى جيىلەپ كەتكەن. وڭتۇستىك ءوڭىرى بۇل تۇرعىدا كوش باسىندا تۇر. 

ستاتيستيكانى سويلەتسەك، اتالعان ولكەدە بىلتىر 853 جەتكىنشەك مەكتەپ قابىرعاسىندا ءجۇرىپ جۇكتى بولىپ قالعان. ونىڭ باسىم بولىگى قاراكوزدەر. ءبىر اينالدىرعاندى شىر اينالدىرادى. سونداي جانداردىڭ ءبىرى ايمان. انا اتانعانىنا 8 ايدان اسىپتى. ءجاسوسپىرىم 14 جاسىندا وت باسقان. وزىنەن ەكى جاس ۇلكەن بوزبالا بۇل تۋرالى ەشكىمگە ءتىس جارماۋدى بۇيىرىپ قورقىتقان كورىنەدى. اراعا از ۋاقىت سالىپ، اياعى اۋىر ەكەنىن بىلگەن. اتا-اناسى سۇيەككە تاڭبا بولماسىن دەپ، ۇيىنەن قۋىپ جىبەرگەن. سودان بەرى 16 جاسار قىزدىڭ كورمەگەن قۇقايى جوق.

"ەكى كۇن كوشەدە پانالادىم. بىرەۋگە بالا كۇتۋشى بولىپ جۇمىس ىستەدىم. سول ۇيدە تولعاتتىم. پەرزەنتحاناعا بارىپ، ول جەرگە الداپ كىردىم. 94ء-شى جىلعىمىن، 98 جىلعى ەكەنىمدى ايتقان جوقپىن. بوسانىپ بولعاسىن عانا دارىگەرلەر مەن تۋرالى مالىمەت ءبىلدى. اتا-انام مەنەن باس تارتتى"، - دەيدى جاس انا ايمان.

ءقازىر ايمان "انا ۇيىنە" نارەستەسىمەن بىرگە جايعاسقان. ول جەردە جاس انانىڭ بارلىق جاعدايى جاسالىپتى. ماتەريالدىق قاجەتتىلىگىنەن بولەك، ءسوز دەمەۋ بەرەتىن جاندار دا تابىلعان. جاڭا ۇيامەن قاۋىشقان ايماننىڭ ەندى ءوز وتباسىنا ورالعىسى جوق.

دەنساۋلىق ساقتاۋ باسقارماسىنداعىلاردىڭ ايتۋىنشا، بىلتىر وڭتۇستىكتە وڭ جاقتا وتىرعان 853 ءجاسوسپىرىم قىز جۇكتى بولىپ قالىپتى. ونىڭ 462ء-سى بوسانىپ ۇلگەرگەن. ۇلتتىڭ ۇيىتقىسى سانالاتىن وڭتۇستىكتەگى احۋال وسىلاي بولسا، قوستانايداعى دا جاعداي ءماز ەمەس.

"بىلتىر قوستاناي وبلىسى بويىنشا 322 ءجاسوسپىرىم قىز جۇكتى بولىپ قالعان. 14 جاسار قىز 20 جاستاعى جىگىتپەن كەزدەسىپ جۇرگەن. بۇل تۋرالى اكە-شەشەسىنىڭ دە حابارى بولعان. اقىرىندا ورىمدەي قىزدىڭ اياعى اۋىرلاپ، قولايسىز جاعداي تۋىندادى. وسىعان بايلانىستى 20 جاسار جىگىتتىڭ ۇستىنەن قىلمىستىق ءىس قوزعالىپ، ول جاۋاپقا تارتىلدى"، - دەيدى قوستاناي وبلىستىق پروكۋرورىنىڭ اعا كومەكشىسى دامير ايشيەۆ.

ەڭ سوراقىسى وسى جۇكتى بولىپ قالعان ءجاسوسپىرىم ارۋلاردىڭ اراسىندا 12 قىز جىنىستىق اۋرۋ جۇقتىرىپ الىپتى. قۇزىرلىلار بۇعان وتباسىنداعى تاربيە مەن مەكتەپ قابىرعاسىنداعى ءتالىمنىڭ تومەندىگى سەبەپ دەپ وتىر. دەنساۋلىق ساقتاۋ مەكەمەلەرى تاراپىنان جۇرگىزىلەتىن ناسيحاتتىڭ دا ماردىمسىزدىعى ستاتيستيكانىڭ ورشۋىنە اسەر ەتكەن.

قالاي دەگەنمەن دە، ءجاسوسپىرىم ارۋلار اراسىنداعى احۋال ەزىلىپ جىلايتىنداي جاعدايعا جەتىپ تۇر. جۇرتشىلىق بۇعان ءبىرىنشى كەزەكتە ۇلتتىق يدەولوگيانىڭ اقساعانى سەبەپ دەيدى. قىزعا قىرىق ۇيدەن تىيىم سالىپ كەلگەن قازاقى مەنتاليتەت سوڭعى كەزدەرى ءمانىن جوعالتقان سياقتى. بۇعاناسى قاتپاعان ارۋلاردىڭ مەكتەپ قابىرعاسىندا اياعى اۋىرلاپ جاتسا، اۋىر كۇرسىنىپ، ويلانۋىمىزعا تۋرا كەلەدى! 7 ارنا