قازاقستان رەسپۋبليكاسى پارلامەنتى سەناتىنىڭ ءتوراعاسى ق.ك.توقايەۆقا اشىق حات
قۇرمەتتى، قاسىم-جومارت كەمەل ۇلى!
ءوزىڭىز جاقسى بىلەسىز، اتام قازاقتا «جاقسىنىڭ جاقسىلىعىن ايت، نۇرى تاسىسىن. جاماننىڭ جاماندىعىن ايت، قۇتى قاشسىن!» دەگەن كەرەمەت ءسوز بار. باسقانى بىلاي قويعاندا، ءسىزدىڭ سىرقى ىستەر ءمينيسترى، ق ر پرەمەر-مينيسترى بولعان جىلدارىڭىزدا ەلباسى جولعا قويعان كوشى-قون ساياساتىنىڭ دۇرىس جۇرگىزىلۋىنە، الىستان كەلەتىن قانداستارىمىزدىڭ شەتەلدەن ۆيزا راسىمدەۋ، ەلىمىزگە كەلىپ قۇجاتتانۋ جاعىندا سىڭىرگەن ەڭبەگىڭىزدى ءبىز بۇل كۇندە ساعىنا ەسكە الامىز، اۋزىمىزدىڭ سۋى قۇرىپ ايتىپ جۇرەمىز. ءسىزدىڭ كاسىبي ديپلوماتتىعىڭىزدىڭ، جۇڭگو تىلىنە جەتتىكتىگىڭىزدىڭ ارقاسىندا، كوپ كەدەرگىلەر شەشىلىپ، شىڭجاڭداعى ەتنيكالىق قازاقتاردىڭ اتاجۇرتقا ورالۋىنا جاقسى جاعداي جاسالدى، داڭعىل جول اشىلدى... ءتىپتى، سول ەلدە تۋىپ وسكەن، وقىعان ءبىزدىڭ ءوزىمىز ءسىزدىڭ «بەلاساۋ» كىتابىڭىزدىڭ «اسپان استىنداعى داۋىل» اتتى تاراۋىن وقىعاندا بارىپ، قىتايدىڭ بىزگە قۇپيا بولىپ كەلگەن كوپ سىرىن بىلدىك قوي! ۇكىمەت باسىنا ك.ءماسىموۆ قالاي كەلدى، اعىلىپ جاتقان ۇلى كوش ءدارياسى سولاي سۋالا باستادى. كەلە سالىپ، 1992 جىلى 23-قىركۇيەكتە قابىلدانعان «شەتەلدەردەگى قازاق دياسپوراسى وكىلدەرىنىڭ قازاقستان رەسپۋبليكاسىندا بولعان كەزىندە الەۋمەتتىك-ەكونوميكالىق جەڭىلدىكتەرمەن قامتاماسىز ەتۋ تۋرالى» №791 قاۋلىسىنىڭ كۇشىن جويدى. ۇكىمەت جاعىنان ءار جىلى 20 مىڭ وتباسىعا دەپ ءبولىنىپ كەلە جاتقان كۆوتانى پىشاقپەن قيعانداي توقتاتتى. جاڭاوزەننىڭ جالاسىن تۇگەلىمەن ورالماندارعا جاپتى. جاقتاستارىن لوندونعا دەيىن جۇگىرتىپ، قانداستارىمىزدى قارالاتتى. 2012 جىلى 28 ناۋرىزدا №362 قاۋلى قابىلداپ، «سوتتىلىعى» جانە «شىعۋ پاراعى» دەگەن پالەنى ويلاپ تاپتى. 2011 جىلدىڭ 22 شىلدەسىندە پرەزيدەنت قول قويعان، 16 تامىزدان باستاپ رەسمي قولدانىسقا ەنگەن №478 «قازاقستان رەسپۋبليكاسىنىڭ كەيبىر زاڭنامالىق اكتىلەرىنە حلىقتىڭ كوشى-قونى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» ق ر زاڭىندا: «سونداي-اق قازاقستان اۋماعىنان كەتكەن ادامدار مەن ولاردىڭ ۇرپاقتارىنان، ەگەر ولار تاريحي وتانى رەتىندە تۇراقتى تۇرۋ ءۇشىن قازاقستان رەسپۋبليكاسىنا قايتىپ ورالعان بولسا» دەگەن باتپانداي باپتى جول ورتادان الىپ تاستاعانىن الدىڭعى ماقالامدا ايتقانمىن. كەيىن قازاقستان حالقى اسسامبلەياسىنىڭ كەزەكتى ءبىر جينالىسىندا ەلباسىعا جازۋشى سماعۇل ەلۋباي ارقىلى ايتقىزىپ، «ءتۇسىپ قالعان» ءماتىندى 17 كۇندە قايتا قالپىنا كەلتىرتتىك... قايسى حالىق ەكەنى قاپەلىمدە ەسىمە تۇسپەي وتىر، سەمىز بۇقانىڭ ارقاسىنا اتپەن كەلىپ، نايزا سۇعىپ وينايتىن؛ قانسىراپ جاتقان جانۋاردى كورىپ، ءماز بولاتىن؛ ءلاززات الاتىن ءبىر ۇلت بولۋشى ەدى عوي. مىنا ك.ءماسىموۆ تا قۇددى سول سەكىلدى، شەتتەن كەلەتىن قانداستارىمىزدىڭ الدىنا الىنباس قامالداردى قويىپ، قۇجاتتانا الماي شۋلاپ، جىلاپ- ەڭىرەپ جۇرگەنىن كورىپ جانى سودان تويات تاباتىن، راحاتتاناتىن، ىشتەي ءماز بولاتىن كورىنەدى. ءجۇز جاساعىر ارداقتى نۇرسۇلتان ءابىش ۇلى «قانداستارىمىزعا جول اشۋىمىز كەرەك. قازاقتىڭ جەرى كەڭ. ورنالاسامىن دەگەن جەرىن ءوزى تاڭداسىن!» دەپ، قازاق كوشىن بۇرىنعى ارناسىنا سالماق بولىپ، تاپسىرما بەرۋىن عوي، بەردى! سول زاڭ جوباسىن ءقازىر ءماجىلىس تالقىلاپ جاتىر. اللا قالاسا، جاقىندا سەناتقا دا بارادى. ءبىراق، انا ەكى انىقتاما بۇل زاڭ اياسىندا ەمەس، تەك ۇكىمەت قاۋلىسى ارقىلى كۇشىن جويادى نە وزگەرتىلەدى ەكەن. بەس بىردەي سەناتور حات تا جازدى، كارىم قاجىمقان ۇلى وزگەرپەي، ءالى قاسارىسىپ وتىر. ەگەر، وسى ەكى كەدەرگى الىنباي، بەس الدە ونىنشى مارتە قايتالاۋىم شىعار بۇل، قوس پالاتانىڭ ماقۇلداعان زاڭىنىڭ قۇنى كوك تيىن بولماق! سىزدەردىڭ ەسىل ەڭبەكتەرىڭىز سەلگە كەتپەك!! ەلباسىمىزدىڭ تاپسىرماسى دالادا قالماق!!! وسى №111 قاۋلىداعى ەكى انىقتاما قۇجاتتى شەتەلگە شىعاتىن ازاماتتارىنا جۇڭگو ۇكىمەتىنىڭ بەرمەيتىنىن، ول تۋرالى ارنايى قابىلدانعان زاڭ-ەرەجەلەرىنىڭ بار ەكەنىن ك.ءماسىموۆ وتە جاقسى بىلەدى. ءبىراق، ورگەرتۋگە، قازاقتاردىڭ كەلۋىنە جول اشۋعا تىم ىنتالى ەمەس. جانە دە سول ۇلت كوشباسشىسى ن.نازاربايەۆتى قازاققا قارسى قويعىسى كەلەدى. الىستاعى اعايىندى اتاجۇرتىنا ورالتقىسى جوق! قازاقتىڭ سانىنىڭ كوبەيۋىن جانى قالامايدى. ودان وزگە سەبەبى جوق!!! سوندا، بۇل جىگىت ءبىر ەمەس، ەكى مارتە ۇكىمەت باسىنا اكەلگەن بىلدەي پرەزيدەنتتى تىڭىدامايتىن، ايامايتىن، «قانداستارىمىزعا جول اشۋىمىز كەرەك!» دەگەن تاپسىرماسىن ورىندامايتىن بولعانى ما؟! قايدا الگى «ءسىزدىڭ ادال كومەكشىڭىز بولعانمىن، ءقازىر دە سولاي، بولاشاقتا دا بولىپ قالا بەرەمىن!» دەگەنى؟!! سونداعى «ادالدىعىنىڭ» ءتۇرى وسى ما؟؟! مۇداي الدامكوستىككە نە داۋا ءوزى؟! ۋاجدەرىنە قاراعاندا، ۇكىمەت «ەكى انىقتاما» قۇجاتتى شەتتەن كەلەتىن قانداستارىمىزدان «مەملەكەتتىك جانە قوعامدىق قاۋىپسىزدىكتى قامتاماسىز ەتۋ ماقساتىنا» تالاپ ەتىپ وتىر ەكەن. تاۋەلسىز قازاقستاننىڭ تاريحىندا ۇكىمەت باسقارعان جالعىز ك.ءماسىموۆ ەمەس! الاشتىڭ ايماڭداي ۇلدارى كەزەك-كەزەگىمەن بۇل سالانى ۇرشىقشا ۇيىرگەنىن ءبىز جاقسى بىلەمىز. سوناۋ س.تەرەششەنكو(1991-1994)، ءا.قاجىگەلدين(1994-1997)، ن.بالعىمبايەۆتاردان(1997-1999) باستاپ، قاسىم-جومارت كەمەل ۇلى(1999-2002)، ءوزىڭىز، كەشەگى يمانعالي تاسماعامبەتوۆ (28.01.2002-11.06.2003) پەن د.احمەتوۆكە(2003-2007) دەيىن الىس-جاقىن شەتەلدەردەن تىپ-تىنىش، جىم-جىرت كەلىپ قازاقستان اۋماعىنا قونىستانىپ جاتقان ورالماندار، بۇگىن ك.ءماسىموۆ ۇكىمەت باسىنا كەلگەندە، اياق-استىنان اتا جاۋ بولىپ شىعا كەلگەنى مە؟؟! قازاق ەلىنىڭ «مەملەكەتتىك جانە قوعامدىق قاۋىپسىزدىگىن» بۇلدىرە قويىپ پا؟!! ايتىڭىزشى، ءسىز ءوز قانداستارىڭىزدى وسىنشاما قورلاتۋعا، ارىن تاپتاتۋعا قالاي شىداپ تۇرا الاسىز!؟؟ دانا نۇرەكەڭ قانداستارىن بولاشاقتاعى سول «مەملەكەتتىك جانە قوعامدىق قاۋىپسىزدىكتى» ساقتاۋ ماقساتىندا شاقىرىپ وتىرعان جوق پا؟!! شەتتە تارىداي شاشىراپ جۇرگەن قانداستارىمىزدىڭ ۇلتارالىق دوستىق پەن قوعامدىق تىنىشتىقتى ساقتاۋداعى ساۋاتتىلىعى مەن ەڭبەگىنە، ءتىپتى، ەلباسىمىزدىڭ ءوزى ءدان ريزا! سەنبەسەڭىز، مىنا ۆيديو-جازبانى كورىڭىز. سول قازاقتار سول دەڭگەيىنەن جوعارلاماسا، ەش تومەندەگەن جوق ءالى. مىنە، مەرزىمىنەن بۇرىن پرەزيدەنت سايلاۋىن وتكىزۋ تۋرالى ۇسىنىس ايتىلىپ جاتىر. سوندا تۇراقتى تىركەۋگە تۇرا الماي نە ازاماتتىققا قولى جەتپەي، قانداستارىمىز تاعى شۋلاپ جۇرسە، ەلباسىمىزدان ۇيات ەمەس پە؟! ك.ءماسىموۆ شىمىرىكپەگەنىمەن، ۇياتتىڭ وتىنان ءبىزدىڭ بەتىمىز كۇيىپ بارادى...
سوندىقتان، قۇرمەتتى قاسىم-جومارت كەمەل ۇلى، سىزدەن وتىنەرىمىز بىرەۋ-اق: مىنا «جۇڭگو حالىق رەسپۋبليكاسى ءتولقۇجات بەرۋ ءتارتىبى» مەن «جۇڭگو حالىق رەسپۋبليكاسىڭ ازاماتتىق تۋرالى زاڭىنىن» وقىپ، انا «اقىماق» باۋىرىڭىزعا جازباشا ءتۇسىندىرىپ بەرسەڭىز عانا بولعانى!
ەسكەرتۋ: جۇڭگو زاڭىنىڭ كوشىرمەسىن سىزگە حاتپەن ارنايى جىبەرەم!
http://youtu.be/KyosRWV-RQ0اۋىت مۇقيبەك، اقىن
24.02.2015 استانا
