پولشاداعى پرەزيدەنتتىك سايلاۋعا ۇمىتكەرلەر ىشىندە قازاق قىزى دا بار. ۇلتى قازاق باللي ماجەس پولشاداعى قازاقتار قاۋىمداستىعىنا باسشىلىق ەتەدى. مۇنداي اقپاراتتى NewsBalt ينتەرنەت پورتالى تاراتتى.

باللي ماجەستىڭ پولشاداعى قازاق قاۋىمداستىعىنا باسشىلىق ەتىپ كەلە جاتقانىنا 12 جىل بولعان. ول ادام قۇقىعىن ساقتاۋ جانە پوستكەڭەستىك مەملەكەتتەردەگى دەموكراتيالىق وزگەرىستەر ماسەلەسىمەن اينالىساتىن كورىنەدى. سونداي-اق باللي قۇقىعى بۇزىلعاندارعا كومەكتەسۋ ارقىلى قوعامدىق ىستەرگە ءجيى ارالاسىپ وتىرادى.

ارينە، ونىڭ 100 مىڭ قول جيناۋعا مۇمكىندىگى شەكتەۋلى، الايدا باللي ءوزىنىڭ پرەزيدەنتتىك سايلاۋ ناۋقانىنا قاتىسۋ فاكتىسى پولشاداعى مۇسىلماندارعا دەگەن قارىم-قاتىناستىڭ وزگەرۋىنە تۇرتكى بولادى دەپ ۇمىتتىنەدى.

"مەن ادام قۇقىعى مەن ازاماتتاردىڭ بوستاندىعى ءۇشىن كۇرەسەتىن قاراپايىم ەل تۇرعىنىمىن. بۇل - ءار ەلدىڭ دەموكراتيالىق نەگىزى. ەگەر قوعامدىق ىستەر تاجىريبەسى تۋرالى ايتاتىن بولساق، ول اسا ماڭىزدى. مەن نارازىلىق تانىتۋشى شاحتەرلەرمەن دە، فەرمەرلەرمەن دە كەزدەسىپ، ولاردىڭ وكپە-نازىن تىڭدادىم. ءبىر پوليسەي جوعالتىپ العان ساقيناسىن ىزدەپ 5 وتباسى تۇراتىن ۇيگە تاڭعى التىدا ەشقانداي ەسكەرتۋسىز باسا-كوكتەپ كىرگەن جاعدايعا دا ارالاسقانمىن. بۇل سوڭعى ايلارداعى وقيعالار عانا. كوپتەگەن جىلدارى بويىنا مۇنداي فاكتىلەر قاتارى دا ارتا تۇسەدى. بۇل پولشا دەموكراتيالى ەل بولسا دا ۇنەمى قۇقىق بۇزۋشىلىقپەن بەتپە-بەت كەلەتىن، كۇندەلىكتى ومىردە ورىن الىپ جاتاتىن ەل تۇرعىندارىنىڭ قۇقىعىنا قاتىستى"، - دەپ سۇحبات بەرگەن اتالعان باسىلىمعا.

باللي ماجەس بىرنەشە جىل بۇرىن قازاقتار قاۋىمداستىعىنىڭ باسشىسى بوپ تۇرعاندا مۇحاممەد پايعامباردىڭ كاريكاتۋراسى جاريالانىمىنا قارسى نارازىلىق بىلدىرگەن. الايدا ول كاريكاتۋراعا قارسى وقپەن نەمەسە كۇشپەن جاۋاپ بەرمەۋ كەرەكتىگىن باسا ايتقان.

ايتا كەتەلىك، پولشاداعى پرەزيدەنت سايلاۋىن وتكىزۋ مەرزىمى 2015 جىلدىڭ 10 مامىرىنا بەلگىلەنگەن. باللي ماجەستىڭ تۋعان كەزدەگى ءاتى-جونى - بالجان ناۋرىزبايەۆا.

ول وڭتۇستىك قازاقستان وبلىسى شاردارا اۋدانىندا دۇنيەگە كەلگەن. مەكتەپتى ءتامامداعان سوڭ ول ءبىلىم ىزدەپ ماسكەۋگە بارادى. سول ارادا كۇيەۋگە شىعىپ، پولشاعا كەتەدى. ودان بەرى 20 جىلدان استام ۋاقىت وتكەن.