ەستەرىڭىزدە بولسا، اپتا باسىندا ق ر پارلامەنت دەپۋتاتتارىنىڭ جالاقىلارىن قىسقارتۋ تۋرالى داۋلى ماسەلەگە ماجىلىستە وتىرعان حالىق قالاۋلىلارى ورە-تۇرەگەلىپ قارسى شىققان ەدى. ەندى ەلىمىزدەگى ءىرى حولدينگ "سامرۇق-قازىنانىڭ" باسشىسى ءومىرزاق شۇكەيەۆتە ءوز قاراماعىنداعى قىزمەتكەرلەردىڭ جالاقىسىنىڭ ازدىعىن ايتىپ جىلارمان بولدى.
"ءبىز شەت ەلدىك مەملەكەتتىك حولدينگتەردىڭ بيۋدجەتتىك شىعىندارىن ەسەپتەپ كوردىك. سالىستىرمالى تۇردە "سامرۇق-قازىنا" ۇلتتىق حولدينگىنىڭ قىزمەتكەرلەرى وزدەرىنىڭ شەتەلدىك ارىپتەستەرىنە قاراعاندا بىرنەشە ەسە تومەن جالاقى الادى. سوعان قاراماستان، 2012 جىلدان بەرى قاراي ءبىز قىسقارتۋلار جاساپ كەلەمىز. كۇنى بۇگىنگە دەيىن حولدينگتىڭ 2 مىڭعا جۋىق قىزمەتكەرلەرى قىسقارتۋعا ىلىنگەن. ساپانى ارتتىرۋ ءۇشىن جۇمىسشىلارعا تولەنەتىن جالاقى دا سوعان ساي بولۋى ءتيىس. وسى رەتتە ءبىزدىڭ قىزمەتكەرلەردىڭ ايلىعى شايلىعىنا جەتپەي جاتادى. مىسالى، كورشى رەسەيدىڭ وزىندە بۇل كورسەتكىش ايتارلىقتاي جوعارى. ءبىزدىڭ قىزمەتكەرلەر كومپانياعى ءتۇسىم اكەلگەن جاعدايدا عانا جوعارى جالاقى الا الادى. جالقاۋلىق تانىتىپ، بوس جۇرگەندەرگە جالاقى تولەمەيمىز "، - دەيدى ءو. شۇكەيەۆ. 600 مىڭ تەڭگەنى مىسە تۇتپاي جۇرگەن قالاۋلىلار مەن ءىرى-ىرى حولدينگ باسشىلارىنان باسقا تاعى كىمدەردىڭ جالاقىلارى تومەن؟ Qamshy.kz پورتالى قازاقستان مەن رەسەيدەگى الەۋمەتتىك قىزمەتكەرلەردىڭ ورتاشا ايلىق كورسەتكىشىن سالىستىرا وتىرىپ، ساراپتاما جاساعان ەدى.
- ق ر ءبىلىم بەرۋ سالاسىنىڭ قازمەتكەرلەرىنە مينيمالدى سومادا 50 مىڭ تەڭگە، ماكسيمالدى سوممادا 154577 تەڭگە جالاقى تولەنەدى. بۇل كورسەتكىش كورشىلەس رەسەيدە ءسال وزگەشەلەۋ. ول جاقتا مۇعالىمدەردىڭ ورتاشا جالاقىسى-20000-39000 رۋبل اراسىندا. تەڭگەگە شاققاندا 100000-195000-دى قۇرايدى.
- ق ر ينجينەر-قۇرىلىسشىلارى ورتاشا ايلىق ەسەپ كورسەتكىشى 55 مىڭنان 120 مىڭعا جۋىقتاۋ كەلەدى. ال رەسەيلىك ينجينەرلەردىڭ ايلىق جالاقىسى 25-60 مىڭ رۋبل بولسا، تەڭگەگە شاققاندا ورتاشا جالاقى-300 مىڭدى قۇرايدى.
- ق ر دەنساۋلىق ساقتاۋ سالاسى قازمەتكەرلەرى ايلىق ەسەپ كورسەتكىشى بويىنشا 117 مىڭنان 179 مىڭعا جۋىقتى باعامدايدى. بۇل كورسەتكىش بەلورۋسيالىق دارىگەرلەرمەن سالىستىرعاندا ەكى ەسە جوعارى. ال ماسكەۋلىك دارىگەرلەردىڭ ورتاشا ايلىق جالاقىسى-39833-104000 رۋبل. تەڭگەگە شاققاندا-199165-520000 تگ.
- ق ر زەينەتكەرلەرى مينيمالدى كورسەتكىشتە 20782 تەڭگە، ماكسيمالدى بازامەن 54171 تەڭگە كولەمىندە زەينەتاقى الادى. رەسەيلىك وسى كورسەتكىش ايىنا-10889 رۋبل. بۇل سومما قازاقستان ۆاليۋتاسىمەن -54445 تگ بولادى.
- ق ر ءورت سوندىرۋشىلەر ايىنا 60 مىڭ تەڭگەدەن 120 مىڭ تەڭگەگە دەيىن جالاقى الادى ەكەن. رەسەيلىك ءورت ءسوندىرۋ قىزمەتكەرلەرى ايىنا 34500 رۋبلدەن 77500 رۋبلگە دەيىن وسكەن.
سونداي-اق، اۋىلشارۋاشىلىق، ورمان جانە بالىق شارۋاشىلىعى سالاسىنداعى قىزمەتكەرلەردىڭ ورتاشا جالاقىلارى 96 مىڭ تەڭگە بولسا، تراكتوريست-ماشينيستتەردىڭ جالاقىلارى ودان ءسال تومەندەۋ 79-90 مىڭ ارالىعىندا. ەكونوميستەر-157 مىڭ، بۋحگالتەرلەر- 113 مىڭ تەڭگەنى قاناعات تۇتادى. رەسپۋبليكا كولەمىندە ورتاشا جالاقىنىڭ ەڭ جوعارعى كورسەتكىشى استانا جانە الماتى قالالارىندا تىركەلگەن. بۇل قالالاردا ورتاشا جالاقى كولەمى 484 مىڭ مەن 542 مىڭ تەڭگەنى قۇرايدى. ال اۋىلدىق جەرلەردەگى مۇعالىمدەردىڭ ورتاشا جالاقىسى - 82 مىڭ تەڭگە بولسا، جەكە مەنشىك اقىلى مەكتەپتەردەگى وقىتۋشىلاردىڭ ايلىق جالاقىسى 74 مىڭ تەڭگەنى قۇراعان. ال بالاباقشالارداعى تاربيەشىلەر 55 مىڭ تەڭگەگە جۇمىس ىستەيدى. ەلباسى نۇرسۇلتان ءابىش ۇلى ءوز سوزىندە قازاقستانداعى ەڭ تومەن جالاقى 50 مىڭ تەڭگەدەن كەم بولماۋى ءتيىس دەپ باسا ايتقان بولاتىن. بۇل الەۋمەتتىك قىزمەت تۇرلەرىن كورسەتەتىن قىزمەتشىلەردىڭ ورتاشا ايلىق جالاقى كورسەتكىشى بولاتىن. ال ءىرى بيزنەس ورتالىقتارىندا ساندار مۇلدەم باسقاشا سويلەيدى. كەيبىر دەرەك كوزدەرىنە سۇيەنسەك، الماتىداعى ءبىر ءىرى كومپانيانىڭ ديرەكتورى لاۋازىمىن يەمدەنگەندەر ايىنا 1،8 ميلليون تەڭگە الاتىن كورىنەدى.
تۇران مۇرال
