اقپاننىڭ 5 كۇنى ءال-فارابي اتىنداعى ءقازۇۋ-نىڭ شىعىستانۋ فاكۋلتەتىنىڭ ۇيىمداستىرۋىمەن "شىعىس مادەنيەتى" اتتى فەستيۆال وتەدى، - دەپ حابارلايدى Qamshy.kz پورتالى.

"فەستيۆالدى ۇيىمداستىرۋداعى باستى ماقسات – قوعام مۇشەلەرىن تاڭعاجايىپ   شىعىس مادەنيەتىمەن تانىستىرۋ جانە قوعامنىڭ  ۇلتارالىق ءھام مادەنيەتارالىق قارىم-قاتىناس پروسەسىنە بەلسەندى ارالاسۋىنا سەپ بولۋ"-دەيدى شارانى ۇيىمداستىرۋشىلار.

ءال-فارابي اتىنداعى قازۇۋ-دە 2014 جىلى 16 مامىردا تۇساۋى كەسىلگەن شىعىس مۇراجايى – بۇگىندە شىعىس حالىقتارىنىڭ رۋحاني جانە ماتەريالدىق مادەنيەتىنەن جان-جاقتى حاباردار ەتەتىن جادىگەرلەر جيناقتالعان ۇلكەن ورتالىققا اينالعان.

قازىرگى تاڭدا مۇراجايدا انتيكاۆارلىق بۇيىمدار، شىعىس حالىقتارىنىڭ ۇلتتىق مۋزىكالىق اسپاپتارى، ۇلتتىق كيىمدەرى، قولونەر بۇيىمدارى، اشەكەيلەرى، شىعىس حالىقتارىنىڭ كۇندەلىكتى تۇرمىسىنان حابار بەرەتىن بۇيىمدار جانە سيرەك كەزدەسەتىن كىتاپتار قويىلعان.

سونداي-اق، شىعىس مادەنيەتى فەستيۆالى بارىسىندا شىعىس حالىقتارىنىڭ باي رۋحاني جانە ماتەريالدىق مادەنيەتىن كورسەتەتىن اندەر مەن بيلەر، ۇلتتىق كيىمدەر  جانە  ۇلتتىق تاعامدار كورمەسى ۇيىمداستىرىلادى دەپ جوسپارلانۋدا.

"شىعىس مادەنيەتى فەستيۆالى اياسىندا شىعىس حالىقتارىنىڭ شاي ءىشۋ ءداستۇرى، سونىمەن قاتار، جۇڭگو، كورەي، جاپون، ءۇندى، تۇرىك، اراب، يران حالىقتارىنىڭ ءداستۇرلى تاعامدارىنان ءدام تاتىپ، سول تاعامداردىڭ دايىندالۋى ھاقىندا قۇندى اقپارات الا الاسىزدار"-دەيدى شارانى ۇيىمداستىرۋشىلار.