وتكەن سەنبى كۇنى اۋىلعا باردىم. ناعاشىم كەلىپتى. 78 جاستاعى كىسى. 20 جاسىنان بەرى ناماز وقىپ، ورازا ۇستاعان، قالا كورمەگەن، "بۇزىلماعان" قاريا. الىستان ات ارىتىپ كەلگەن سوڭ، امان-سالامداسايىن دەپ الىپ-ۇشىپ جەتتىم. ناعاشىم كەيىپ وتىر ەكەن. اڭگىمەسىن بۇزباي قۇلاق مولدا بولدىم. اڭگىمەسىندە سۇراق كوپ... *** *** قازاقستاننىڭ قازاقتارىنىڭ (ءوزى قىتايدىڭ مۇڭعۇلكۇرە دەگەن جەرىنەن، حان ءتاڭىردىڭ قاق ماڭدايىنان كەلگەن قازاق) ءسوزىن ۇقپادىم. قازاقشا سايراپ تۇرسا دا، سالدىرلاق اربا
سياقتى سامبىرلاپ سويلەيدى ەكەن. ورىستىڭ ماقامى بايقالادى. ءاسىلى قازاقتار بۇلاي سويلەۋشى ەدى. بايىپتى، سالماقتى، ءسوزى جىلى، جۇقا، جىڭىشكە ءۇندى بولۋشى ەدى.
*** ***
تەلەديدارلارىڭنىڭ ءبارى ورىسشا عوي. قازاقشا ارنا جوق پا؟
*** ***
پرەزيدەنتتەرىڭ استانادا دا ورىسشا سويلەيدى ەكەن، ءا! سوندا قازاق ءتىلىن كىم قولدانادى؟
*** ***
الماتىدا كوشە اۆتوبۋستارىنداعى بيلەتشى قىز-جىگىتتەر نەگە كوشە اتىن قازاقشا ايتپايدى؟
*** ***
اۆتوبۋستىڭ ايالداماسىندا قىز بەن جىگىت ءسۇيىسىپ تۇر. قاسىنداعىلار قوي دەمەيدى، ءتىپتى قاراپ تا قويمايدى. ەتتەرى ءولىپ كەتكەن با؟
*** ***
شوشقا ەتىنەن جاسالعان شۇجىقتى جاس بالالار تالاسىپ-تارماسىپ، جەتپەي قالسا جىلاپ، سونداي قۇمارلىقپەن جەيدى ەكەن. اكە-شەشەلەرى دە نانعا قوسىپ سوعىپ وتىر. شوشقا ءالميساقتان حارام عوي. سونى تۇسىنبەيسىڭدەر مە؟
*** ***
حالىق ساقشىدان قاتتى قورقادى ەكەن. ساقشى دەگەن حالىقتى قورعايتىن جاساۋىل، كۇزەت ەمەس پە؟
*** ***
نارىنقولدىڭ سارباستاۋىندا جاتقان اتام مەن اپامنىڭ باسىنا قۇران وقىعالى باردىم. مەنى الىپ بارعان نەمەرە ءىنىم ءبىر بوتەلكە اراق الىپ الىپتى. بەيىت باسىندا سونى الىپ شىعىپ قۇيىپ جاتىر. دارەت الاتىن سۋى شىعار دەسەم، "ارۋاقتار جايلى جاتسىن!" دەپ تارتىپ جىبەردى. ءپاتشاعاردى ابدەن بوقتادىم! قايتار جولدا ەبىل-دەبىل جىلادىم.
*** ***
گرەستە ءبىر ءىنىم 45 جاسىندا قايتىس بولىپتى. سونىڭ اسىندا بولدىم. ولگەن ادامعا بەرىلگەن استا تويعا جينالعانداي، سوزگە تالاسقان جۇرت ەسىمدى الدى. قۇداي-وۋ، قازالى جەردە دۇعا-تىلەك قانا بولۋشى ەدى. بۇلار ولگەن ادامنىڭ سۋرەتىنە قاراپ الىپ، سونىمەن اڭگىمەلەسىپ، سوعان قاراپ، جىلاپ، سىرلاسادى ەكەن. ءتىپتى بەيىت باسىنا سۋرەتىن ءىلىپ قويادى ەكەن. بۇل ەڭ جامان ادەت قوي.
(جاراس كەمەلجاننىڭ فەيسبۋكتەگى پاراقشاسىنان)
