قحا كەڭەسىندە ۇسىنىلعان كەزەكتەن تىس   پرەزيدەنت سايلاۋىن وتكىزۋ باستاماسىن ۇكىمەت مۇشەلەرى مەن قوس پالاتا دەپۋتاتتارى، ەلدەگى بارلىق ساياسي پارتيالار مەن ۇيىمدار ءبىر اۋىزدان قولداعانى بەلگىلى. ءتىپتى، مەملەكەت باسشىسى ن.ءا.نازاربايەۆتىڭ ءوزى بيىل سايلاۋ وتكىزۋ يدەياسىنا رۇقساتىن دا بەرگەن بولاتىن. ياعني،  ساۋىردە قازاقستاندا پرەزيدەنت سايلاۋى وتەتىنى جاريا بولدى. ال ءقازىر جۇرت اراسىندا وزدەرىن پرەزيدەنتتىككە ۇمىتكەر رەتىندە كورسەتىپ جۇرگەن ءۇش ادام بار. ولار - قمو ءتوراعاسى- مۇرات تەلىبەكوۆ،  ق ر "تابيعات" قورىنىڭ ءتوراعاسى- مەلس ەلەۋسىزوۆ جانە "اتتان" قوزعالىسىنىڭ جەتەكشىسى - امانتاي قاجى. وسىعان وراي Qamshy.kz پورتالى الداعى سايلاۋدا پرەزيدەنتتىكتەن  ۇمىتكەر ۇشەۋىنىڭ  سايلاۋعا قاتىستى پىكىرلەرىن بىلگەن بولاتىن.

ءبىرىنشى بولىپ قمو ءتوراعاسىنا حابارلاسىپ ەك، تۇتقانىڭ ار جاعىنان كىجىرەيە جاۋاپ قاتتى ول. سىزبەن الداعى بولاتىن سايلاۋعا قاتىستى پىكىرىڭىزدى بىلسەك دەپ ەدىك دەگەن سۇراعىمىزعا، "ءقازىر جاۋاپ بەرە المايمىن. ماعان "فەيسبۋككە" جازىڭىزشى" دەدى. ءبىر دەگەننەن قازاق تىلىندە قويعان سۇراقتارىمىزعا قىسىلسا دا، جاۋاپ بەردى. - مۇرات اعا، الداعى بولاتىن سايلاۋعا ءسىزدىڭ كانديداتۋراڭىزدى كىمدەر ۇسىنىپ وتىر؟ - مەنى ۇسىنعان قازاقستان مۇسىلماندارى. - ءسىزدى ۇسىنىپ وتىرعان ۇيىم جالپى تىركەلگەن بە؟ - الماتىدا، ادىلەت باقارماسىنا تىركەلگەن. قۇدايىم-اي! مىڭ رەت وسىنى ايتتىم. سايلاۋعا ونىڭ نە قاتىسى بار؟ - اتالمىش ۇيىمعا (قمو) قانشا كىسى مۇشە، جالپى ءسىزدىڭ كانديداتۋراڭىزدى قانشا كىسى قولداپ وتىر؟ -  قازاقستان مۇسىلماندارى وداعىنا  523 747 كىسى مۇشە. ال قولداپ وتىرعاندار 1 456 329 كىسى. - ەگەر ءسىزدىڭ ءوتىنىشىڭىزدى قابىلداپ جاتسا، قانداي باعدارلاما ۇسىناسىز؟ - باعدارلامانى مىنا جەردەن وقىڭىز (ورىس ءتىلدى سايتتىڭ سىلتەمەسىن بەردى) - اعا، قازاقشا نۇسقاسى جوق پا؟ - وكىنىشكە وراي، جوق.

ال كەلەسى ۇمىتكەر ەكولوگ مەلس ەلەۋسىزوۆكە حابارلاسىپ ەك، ۋاقىت ءبولىپ سۇحبات بەرۋگە كەلىستى. -اللو، مەلس اعا! - دا، دا، گوۆاريتە... - اعا بۇل "قامشى" پورتالىنان مازالاپ تۇر. الداعى وتەتىن سايلاۋعا قاتىستى پىكىرىڭىزدى بىلسەك دەپ ەدىك. ءسىز ءوز كانديداتۋراڭىزدى ۇسىنعان ەكەنسىز... - ەندى،  ونى كورەمىز. ەگەر مەنى تىركەيتىن بولسا ۇسىنامىن. قاراجات كەرەك قوي وعان دا. - ناقتى شەشىم قابىلداماعانىڭىز عوي... - ناقتى شەشىم ءالى قابىلدامادىم. - ەگەر ۇمىتكەرلىككە ۇسىنىلىپ جاتساڭىز، قانداي ۇيىم نەمەسە وداقتىڭ اتىنان ۇسىنىلاسىز؟ ءسىزدىڭ كانديداتۋراڭىزدى كىمدەر ۇسىنۋى مۇمكىن؟ - ءوز اتىمنان شىعامىن. ورىسشا ساموۆىدۆيجەنيە دەيدى عوي. - سايلاۋ الدى باعدارمالاڭىز قانداي بولماق؟ - مەنى تىركەگەن جوق. تىركەگەننەن كەيىن عانا مەن ءوز باعدارلامامدى ايتاتىن بولامىن.

              مەلستىڭ ماردىمسىز جاۋابىنان سوڭ، الماتىنىڭ كوشەلەرىن جاياۋ كەزىپ، بۇرىش-بۇرىشقا قاعاز ءىلىپ، اتتانداپ الدىڭعىلاردىڭ ءبىرى بولىپ جۇرەتىن  ۇمىتكەر ايگىلى  اتتانشى امانتاي قاجىعا حابارلاستىق. - اعا، الداعى سايلاۋعا ءسىز ءوز كانديداتۋراڭىزدى ۇسىنعان ەكەنسىز... - ۇسىنعاندا قانداي. ۇسىنىپ، ۇلكەن ءبىر جەڭىستى، تابىستى بولسام با دەيمىن حالقىممەن بىرگە. - سايلاۋعا قانداي باعدارلامامەن كەلەسىز؟ - قازاق حالقىن ماڭگى جاسايتىن يماندى مەملكەت بولسىن دەگەن ۇرانمەن كەلەم. - سوندا ءسىز كەزىندە ءوزىڭىز قولداعان ەلباسىمەن بىرگە سايىسقا تۇسپەكسىز عوي... -  مەن ەلباسىن قولدايمىن. ءبىراق، ءقازىر ونىڭ اينالاسىنا جينالعاندار قۇرتىپ وتىر. "باندا" دەپ. مەن ونى 20 جىل بۇرىن ايتقام. مەن پرەزيدەنتكە ۇلكەن تىلەكتەسپىن. مەنىڭ قولىمنان ول ءزام-زام سۋ ءىشىپ، مەككەنىڭ ءتاسپىسىن العان. سوندىقتان مەن وعان تىلەكتەسپىن، ارينە. 26 ساۋىردەگى بولاتىن پرەزيدەنت سايلاۋىنا ەلباسى نۇرسۇلتان نازاربايەۆقا باسەكەلەس بولىپ قاتىساتىن ۇمىتكەرلەردىڭ ءتۇرى وسى بولدى. تەلىبەكوۆتىڭ ءتىلى كۇرمەلىپ ءجۇرىپ بەرگەن جاۋابىنا قاراپ، "قازاق تىلىنەن" ەمتيحاندى قالاي تاپسىرعالى جۇرگەنىن ۇعىنا المادىق. اۋىزشا ءتىل قاتىسۋعادا جارامادى. باعدارلاماسى رەسەيدىڭ مەملەكەتتىك تىلىندە دايىندالعان. ال تابيعاتتىڭ جالعىز جاناشىرى "تابيعات" قورىنىڭ ءتوراعاسى مەلستىڭ سايلاۋعا تۇسۋگە اقشاسى جوق ەكەن. اقشا بولسا ءبارى دە بولادى دەپ سەندىردى ول. ال امانتاي قاجىنىڭ جايى بارىڭىزگە بەلگىلى....