ناۋرىزدىڭ 3-ىنەن 4-ىنە قاراعان ءتۇنى الماتىدا Mega Almaty ساۋدا ويىن-ساۋىق ورتالىعىندا قارۋلانعان شابۋىل ورىن الدى.

كاسىپكەرگە شابۋىل ساۋدا نۇكتەلەرىندەگى تولەم تەرمينالدارىنان كۇندىزگى تابىستى جيناپ جۇرگەن كەزدە جاسالدى. بۇل تۋرالى NUR.KZ قالانىڭ ىشكى ىستەر باسقارماسىنا سىلتەمە جاساپ حابارلايدى. بولعان وقيعاعا قاتىستى قىلمىستىق ءىس قوزعالدى. قاسكويلەر كاسىپكەرلەردى تراۆماتيكالىق قارۋمەن قورقىتا وتىرىپ، 500 مىڭ تەڭگەسىن تارتىپ العان. قىلمىسكەرلەردىڭ كولىكپەن ءىزىن سۋىتقانى عانا بەلگىلى. ءىىب-نىڭ حابارلاۋىنشا، ءقازىر ارنايى جەدەل-تەرگەۋ توبى قۇرىلىپ، كۇدىكتىلەردىڭ ورنىن انىقتاۋ جانە ۇستاۋ بويىنشا جۇمىستار جۇرگىزىلىپ جاتىر. بۇعان دەيىن جۋرناليست پولينا شيمانسكايا ءوز Facebook پاراقشاسىندا: "مەگانىڭ سىرتىندا 5 بلوكتا شابۋىل ورىن الدى. ءبارى جابىق، كولىكتەردى تۇگەل تەكسەرىپ جاتىر. باسى-قاسىندا بولعاندار اتىس جانە ينكاساتورلارعا شابۋىل بولعانىن ەستىپ-كورگەنىن ايتتى"، - دەپ جازعان بولاتىن. انىقتالعانداي، جەكە كاسىپكەر ينكاسساسيا كەزىندە قاۋىپسىزدىك شارالارىن ءتيىستى دەڭگەيدە ساقتاماعان. ول تولەم تەرمينالدارىنان اقشانى جيناۋ كەزىندە قاسىندا تەك ءوز تۋىستارىن الىپ جۇرگەن.