قازاقستان پرەزيدەنتتىگىنە كانديداتتار سانى 14 ادامعا جەتتى. بۇل تۋرالى بۇگىن ورتالىق سايلاۋ كوميسسياسىنىڭ مۇشەسى ءلاززات سۇلەيمەنوۆا ءمالىم ەتتى.
"2-9 ناۋرىز ارالىعىندا ورتالىق سايلاۋ كوميسسياسىنا ازاماتتاردان 14 ءوتىنىش كەلىپ ءتۇستى. ولاردىڭ بىرەۋى پارتيا اتىنان، 13 ادام ءوزىن-وزى ۇسىندى. تۇرعىن سىزدىقوۆ قازاقستان حالىقتىق كوممۋنيستىك پارتياسى اتىنان ۇسىنىلعان بولاتىن"، - دەدى ول.
سۇلەيمەنوۆانىڭ ايتۋىنشا، ورتالىق سايلاۋ كوميسسياسى قازىرگى ۋاقىتتا وسى ازاماتتاردىڭ قازاقستان رەسپۋبليكاسىنىڭ كونستيتۋسياسىنا جانە "سايلاۋ" تۋرالى زاڭىنا سايكەستىگىن تەكسەرىپ جاتىر.
ءتيىستى سۇرانىستار باس پروكۋراتۋراعا جانە ىشكى ىستەر مينيسترلىگىنە جىبەرىلدى.
"2 ازاماتقا، سىرعابايەۆ اسقار مەن الداجانوۆ سايفوللاعا مەملەكەتتىك ءتىلدى ەركىن مەڭگەرمەگەن دەگەن شەشىم شىعارىلدى. 6 ناۋرىز كۇنى قويشييەۆا ليمانا مەملەكەتتىك ءتىلدى ەركىن مەڭگەرگەندىگى تۋرالى انىقتاما الىپ، ازاماتتاردىڭ اراسىندا ءوزىن قولداۋ قولىن جيناۋعا كىرىسىپ كەتتى"، - دەدى وسك مۇشەسى.
بۇگىنگە دەيىن پرەزيدەنتتىككە ۇمىتكەر اتانعاندار: سىرعابايەۆ اسقار جوراباي ۇلى؛ الداجانوۆ سافيوللا قالاباي ۇلى؛ قويشييەۆا ليمانا؛ ابدىكارىموۆ باقىت تولەگەن ۇلى؛ مىرزاشوۆ سۋحراب امينجان ۇلى؛ وكتەشبايەۆ ەسەنبەك جاپار ۇلى؛ جۇنىسبەكوۆ ياكۋبجان؛ جۇمان قايرات توقتار ۇلى؛ سەرعازين ەرجان مەرەكە ۇلى؛ مايشيەۆ قايرات الەمباي ۇلى؛ قايساروۆ ءۋاليحان ءابىش ۇلى؛ ەستەمەسوۆ باقتيار وكسىكباي ۇلى؛ تۇراگەلدييەۆ قانات سىباش ۇلى.
