ق ر پرەزيدەنتتىگىنە ۇمىتكەر رەتىندە ورتالىق سايلاۋ كوميسسياسىنا ءوتىنىش بەرگەن ءۋاليحان قايساروۆتى سايلاۋ كوميسسياسى ۇمىتكەر رەتىندە تىركەۋدەن باس تارتتى. بۇل تۋرالى ق ر ورتالىق سايلاۋ كوميسسياسىنىڭ مۇشەسى ءلاززات سۇلەيمەن بۇگىن استانادا وتكەن بريفينگ بارىسىندا مالىمدەدى، دەپ حابارلايدى BAQ.KZ ءتىلشىسى.
«ۇمىتكەرلەردىڭ ءوز قولدارىمەن تولتىرعان مالىمەتتەرىن ورتالىق سايلاۋ كوميسسياسى مۇقيات تەكسەرۋدە. مىسالى، ءوز كانديداتۋراسىن ۇسىنعان ءۋاليحان قايساروۆ پرەزيدەنتتىككە كانديدات بولىپ داۋىسقا تۇسۋگە نيەت ءبىلدىرۋ تۋرالى وتىنىشىندە باسقا مەملەكەتتىڭ ازاماتتىعىندا تۇرعانىن ءوز قولىمەن كورسەتكەن. وسى ماسەلە بويىنشا ءبىز ق ر ىىم-گە اتالعان دەرەكتەردى تەسكەرۋ ءۇشىن سۇراۋ جىبەردىك. سونداي-اق، وسى ۇمىتكەردىڭ مەملەكەتتىك تىلدە تولتىرعان ءومىرباياندىق دەرەكتەرىندە بىرنەشە قاتەلەر بار ەكەنى انىقتالدى»، - دەدى ل.سۇلەيمەن.
ايتا وتەيىك، ءۋاليحان ءابىش ۇلى ق ر پرەزيدەنتىن سايلاۋ ناۋقانىندا وسىمەن ءۇشىنشى رەت قاتارىنان ءوزىن ءوزى ۇمىتكەر رەتىندە ۇسىندى. دەگەنمەن، ۇشەۋىندە دە ونىڭ ءوتىنىمى قابىلدانعان جوق.
