ەلدىڭ ءبىرىنشى پەدوگوگى سانالاتىن بعم اسلان سارىنجىپوۆكە قازاقستاندىقتاردىڭ جاعدايى ءبارىبىر سياقتى.  نۇر وتان پارتياسىنىڭ "جەمقورلىققا قارسى" وتكىزگەن قوعامدىق كەڭەسىنىڭ كەڭەيتىلگەن وتىرىسىندا ءماجىلىس دەپۋتاتى مەرۋەرت قازبەكوۆا  وسىلاي دەپ مالىمدەدى.

"قازاقستاندىقتاردىڭ تاراپىنان ءبىلىم جانە عىلىم مينيسترىنە قاتىستى شاعىمدار ءجيى كەلىپ تۇسەدى. مىسالى، كىشكەنە بالالارىن بالاباقشاعا ورنالاستىرۋ ءۇشىن مەكەمە باسشالىرى "پارا" سۇراعاندارىن ايتادى. ال قاراپايىم تۇرعىندار مينيستر مىرزاعا جولىعۋعا مۇمكىندىكتەرى جوق. اسلان ءسارىنجىپوۆ مىرزاعا  تۇرعىندار تۇرماق، ءبىزدىڭ دەپۋتاتتاردىڭ ءوزى جولىعا المايدى. سەبەبى، ءبىزدىڭ ءبىلىم ءمينيسترى تىم جۇمىسباستى. قابىلداۋعا ۋاقىتى جوق"، - دەيدى دەپۋتات  مەرۋەرت قازبەكوۆا.

مەرۋەرت قازبەكوۆا،  ق ر ءماجىلىس دەپۋتاتى:

- مينيسترلىك باسشىلىعى رەسمي اقپارات بەرۋگە اسا ءمان بەرمەيدى.  ءبىلىم جانە عىلىم مينيسترلىگىنىڭ رەسمي سايتىنا ءتۇرلى ساناتتار بويىنشا (پارا الۋ، پارا بەرۋ، بالاباقشاعا ورنالاستىرۋ ءتارتىبىنىڭ بۇزىلۋى، ورتا مەكتەپتەردەگى مۇعالىمدەردىڭ وقۋشىعا قول كوتەرۋى، مەكتەپ ديرەكتورلارىنىڭ تاعايىندالۋى ت.ب. ) كەلىپ تۇسكەن 534 شاعىمنىڭ ەسكەرىلمەۋى، اتالمىش شاعىمدارعا ەشقانداي  جاۋاپتىڭ بەرىلمەۋى ءسوزىمىزدىڭ ءدالىلى بولماق. سونداي-اق، 2014 جىلعى 12 ايدىڭ 6 ايىندا مينيستر اسلان مىرزا  ءتيىستى حالىقتىق  قابىلداۋلارىن مەزگىلىندە وتكىزبەگەن. ءمينيستردىڭ كابينەتىنە قاراپايىم حالىق تۇرماق، ءبىز - دەپۋتاتتاردىڭ ءوزى كىرى الماي كەتكەنبىز.

ال اسلان باكەن ۇلى ق ر مينيسترلەر كابينەتىندەگى جاس مينيسترلەردىڭ ءبىرى عوي. ول حالىقتى تىكەلەي قابىلداپ، ولاردىڭ ساۋالدارىنا ناقتى جاۋاپ بەرەتىن بىردەن-بىر ادام - ءوزى ەكەنىن بىلمەيدى مە؟! سونىمەن قاتار، مينيستر مىرزا ءبىلىم جانە عىلىم مينيسترلىگىنىڭ پورتفەلىن ۇستاعالى بەرى ەشبىر ايماقتارعا رەسمي ساپارمەن بارماعان. وسىعان قاراپ، ەگەر مينيستر مىرزا ايماقتاردى ءجيى-جيى ارالاپ، مينيسترلىكتىڭ سايتىنا كەلىپ تۇسكەن ساۋالدارعا مەزگىلىندە جاۋاپ قايىرىپ تۇرعاندا ءبىلىم سالاسىنداعى جەمقورلىق ازايار ەدى.

سالىستىرمالى تۇردە الىپ قاراساق، 2012 جىلى ءبىلىم بەرۋ سالاسىنىڭ شەنەۋنىكتەرى ىشىندە 5 بىردەي پارا الۋ فاكتىسى تىركەلسە، ال 2013 جىلى 9 شەنەۋنىك پارامەن ۇستالعان بولاتىن. ال 2014 جىلداعى جارتى جىلدىقتىڭ وزىندە 19 شەنەۋنىك قىلمىستىق جاۋاپقا تارتىلعان. ال ءبىلىم جانە عىلىم مينيسترلىگىنىڭ ايماقتىق قىزمەتكەرلەرى اراسىندا 2013 جىلى 117 قىلمىستىق ءىس تىركەلگەن بولسا، وتكەن 9 ايدىق وزىندە 228 ءبىلىم بەرۋ سالاسى ماماندارى قىلمىسقا شاتىلعان.

اسلان باكەن ۇلى ءسارىنجىپوۆ مىرزا  ءبىلىم جانە عىلىم مينيسترلىگىن باسقارىپ وتىرعان 10-شى مينيستر. سونداي-اق، اسەكەڭنىڭ ءبىلىمى دە وزگە قىزمەتتەستەرىمەن سالىستىرعاندا جوعارى. اسلان مىرزا 3 بىردەي جوو ديپلومى بار ءبىلىمدى باسشى. سونىمەن قاتار، قازىرگى بعم باسشىسىنىڭ سوناۋ گارۆاردتا تاجيىربيە جيناپ قايتقانىن تاعى ەسكەرىڭىز. سونىڭ ىشىندە اسلان مىرزا ءوزىنىڭ 3 بىردەي ديپلومىنىڭ تەك بىرەۋىنە عانا قازاقستاندا يە بولعان.

سول اسلان ءسارىنجىپوۆ مىرزا 2013 جىلدىڭ 2 قىركۇيەگى كۇنى مينيستر لاۋازىمىنا تاعايىندالعان ەدى. اسلان مىرزاعا دەيىن وسى پوستتى باسقارعان باقىتجان جۇماعۇلوۆ مىرزانىڭ ىسىنەن شيكىلىك شىعىپ، تيىسىنشە ول قىزمەتىنەن بولاتىلعان بولاتىن. دەسە دە مينسترلىككە جاڭاشىلدىقپەن اكەلەدى دەپ سەنگەن مينيستر اسلان مىرزا دا باقىتجان مىرزانىڭ كەبىن كيگەندەي بولعان. سوڭعى كەزدەرى باسپا ءسوز بەتتەرىندە اسلان باكەن ۇلىنىڭ اتىنا ءتۇرلى سىن تاعىلا باستاعانى تاعى راس. مىسالى، مينيستر لاۋازىمىنا تاعايىندالا سالا، "ورتا مەكتەپتەردە باستاۋىشتان باستاپ كاسىپتىك ماماندار دايارلاۋ كەرەك. وقۋشىلاردى كاسىپكە باۋلۋ كەرەك" دەپ شىققان. ال وتكەن جىلدىڭ ناۋرىزىندا بەلگىلى بولعانداي، بقو-دا بالاباقشالاردا "ءبىرجىنىستى وتباسى" تۋرالى ەرتەگىلەر وقىتىلعان. سونداي-اق، الماتى وبلىسىنىڭ ۇيعىر اۋدانىندا ورتا مەكتەپتەردە "مەكتەپ باعدارلاماسىنا ەنگىزىلمەگەن ءپاندى وقىتقان" بولاتىن. بۇل تۋرالى قازاقستاندىق بۇقارالىق اقپارات قىزمەتكەرلەرى جازعانىمەن مينيستر مىزرا مىڭق ەتپەگەن ەدى. ەندى مىنە، مينيستر ءسارىنجىپوۆ قازاقستاندىقتاردىڭ بعم رەسمي سايتىنا  جولداعان ساۋالدارىنا قۇلاق تۇرمەك تۇگىلى بۇرىلىپ نازار سالماعان دا. ءتىپتى، ول كىسىنىڭ ورىنباسارى تاحير بالىقبايەۆ مىرزانىڭ وزىنەن جاۋاپ الۋ تىم قيىن. ءوزى قازاق حاندىعىنىڭ 550 جىلدىعىن وتكىزۋ جونىندەگى جۇمىس توبىنىڭ مۇشەسى. سويتە تۇرا مەملەكەت باسشىسىنىڭ باستاماسىمەن قولعا الىنعان ءىس-شارانى ستۋدەنتتەر سارايىندا وتكىزۋگە ىقپال ەتۋدى سۇراعان جۋرناليستەرگە ءبىر اۋىز جاۋاپ جازۋعا ۋاقىت تاپپاعان.

سوعان قاراعاندا ءسارىنجىپوۆتىڭ دە، بالىقبايەۆتىڭ دا ەلدەندە ماڭىزدى  باسقا جۇمىستارى بار سياقتى....

نۇرزات توعجان