«7-20-25. ءاربىر وتباسىنا باسپانا الۋدىڭ جاڭا مۇمكىندىكتەرىن بەرۋ» يپوتەكالىق تۇرعىن ءۇي كرەديتتەۋ باعدارلاماسىن بەكىتۋ تۋرالى قازاقستان رەسپۋبليكاسى ۇلتتىق بانكى باسقارماسىنىڭ 2018 جىلعى 31 مامىرداعى № 107 قاۋلىسىمەن «7-20-25. ءاربىر وتباسىنا باسپانا الۋدىڭ جاڭا مۇمكىندىكتەرىن بەرۋ» يپوتەكالىق تۇرعىن ءۇي كرەديتتەۋ باعدارلاماسى (بۇدان ءارى – باعدارلاما) بەكىتىلدى، دەپ حابارلايدى Qamshy.kz اقپارات اگەنتتىگى. 

باعدارلاما مەملەكەت باسشىسىنىڭ 2018 جىلعى 5 ناۋرىزداعى حالىققا ارنالعان «پرەزيدەنتتىڭ بەس الەۋمەتتىك باستاماسى» ۇندەۋىندە ايتىلعان ءبىرىنشى الەۋمەتتىك باستامانى ىسكە اسىرۋ شەڭبەرىندە ازىرلەندى.

اتاپ ايتقاندا، يپوتەكالىق قارىزداردى سىياقى مولشەرلەمەسى – جىلدىق 7%، باستاپقى جارنا – 20%، قارىز مەرزىمى – 25 جىلعا دەيىن بولاتىن تالاپتارمەن بەرۋدى كوزدەيتىن «7-20-25» باعدارلاماسىن ىسكە قوسۋ تاپسىرىلدى.

باعدارلاما يپوتەكالىق تۇرعىن ءۇي قارىزدارىن بەرۋدىڭ نەگىزگى تالاپتارىن، قارىز الۋشىلار مەن بانكتەرگە باعدارلاماعا قاتىسۋ ءۇشىن ولشەمشارتتاردى، بانكتەردىڭ وپەراتورمەن ءوزارا ىس-ارەكەت جاساۋ ءتارتىبىن، سونداي-اق باعدارلامانى ويداعىداي ىسكە اسىرۋ ءۇشىن زاڭنامالىق اكتىلەر دەڭگەيىندە قابىلدانۋعا ءتيىس شارالاردى ايقىندايدى.

باعدارلاماعا قازاقستان رەسپۋبليكاسىنىڭ ەڭبەك جانە (نەمەسە) كاسىپكەرلىك قىزمەتتەن الاتىن تابىسى بار، سونداي-اق مەنشىك قۇقىعىندا تۇرعىن ءۇيى جوق كەز كەلگەن ازاماتى قاتىسا الادى.

باعدارلامادا قازاقستان رەسپۋبليكاسىنىڭ كەز كەلگەن وڭىرىندە باستاپقى نارىقتا تۇرعىن ءۇي ساتىپ الۋ ءۇشىن مىناداي قۇن شەگىندە يپوتەكالىق تۇرعىن ءۇي قارىزىن الۋ مۇمكىندىگى قارالادى: 25 ملن تەڭگە – استانا، الماتى، اقتاۋ جانە اتىراۋ قالالارىندا؛ 15 ملن تەڭگە – باسقا وڭىرلەردە. باعدارلامانىڭ وپەراتورى قازاقستان رەسپۋبليكاسى ۇلتتىق بانكىنىڭ ەنشىلەس ۇيىمى – «باسپانا» يپوتەكالىق ۇيىمى» اق بولىپ تابىلادى.

وپەراتور وبليگاسيالاردى شىعارۋ جانە ورنالاستىرۋ ەسەبىنەن قارجىلاندىرۋدىڭ نارىقتىق تەتىكتەرىن پايدالانا وتىرىپ قازاقستان قور بيرجاسىنا (KASE) كەمىندە 1 ترلن تەڭگەنى تارتادى جانە الىنعان قاراجاتتى باعدارلامانىڭ تالاپتارى بويىنشا قاتىسۋشى بانكتەر بەرگەن يپوتەكالىق تۇرعىن ءۇي قارىزدارىن ساتىپ الۋعا جىبەرەدى.

باعدارلاما شەڭبەرىندە قاتىسۋشى بانكتەرگە قاتىستى ولشەمشارتتار ايقىندالاتىن بولادى. قاتىسۋشى بانكتەردىڭ تىزبەسى ولار «باسپانا» يپوتەكالىق ۇيىمى» اق-پەن ءتيىستى شارتتار جاساسقان سوڭ قازاقستان رەسپۋبليكاسى ۇلتتىق بانكىنىڭ رەسمي ينتەرنەت-رەسۋرسىندا جاريالانادى. باعدارلامانىڭ تالاپتارىنا سايكەس قاتىسۋشى بانكتەردىڭ قارىزدار بەرۋ جانە قىزمەت كورسەتۋ ءۇشىن قارىز الۋشىلاردان كوميسسيا الۋعا قۇقىعى جوق.

قاتىسۋشى بانكتەردىڭ قارىزداردى بەرۋ راسىمدەرىنىڭ باستالعانى تۋرالى اقپارات قازاقستان ۇلتتىق بانكىنىڭ ينتەرنەت رەسۋرسىندا دا ورنالاستىرىلاتىن بولادى.

«7-20-25» باعدارلاماسىن ىسكە اسىرا باستاۋدىڭ كۇتىلەتىن مەرزىمى – اعىمداعى جىلدىڭ ەكىنشى جارتىسى. «7-20-25» باعدارلامانىڭ تالاپتارىن ءتۇسىندىرۋ ءۇشىن قازاقستان ۇلتتىق بانكىنىڭ «قۇب «Online» موبيلدىك قوسىمشاسىندا 2018 جىلعى 19 ماۋسىمنان باستاپ «7-20-25» جاڭا ءبولىمى ىسكە قوسىلدى، وندا وسى باعدارلاماعا قاتىستى قىزىعۋشىلىق تۋدىراتىن سۇراقتارعا جەدەل جاۋاپ الۋعا بولادى.

«قۇب «Online» ءموبيلدى قوسىمشاسى AppStore  جانە PlayMarket دۇكەندەرىندە مەملەكەتتىك جانە ورىس تىلدەرىندە كوشىرىپ الۋ ءۇشىن قولجەتىمدى. باعدارلامامەن  سىلتەمە بويىنشا قازاقستان رەسپۋبليكاسى ۇلتتىق بانكىنىڭ رەسمي ينتەرنەت-رەسۋرسىندا تانىسۋعا بولادى.