ءقازىر ۇبت تازا "مايشەلپەككە" اينالعانىن ەكىنىڭ ءبىرى بىلەدى. "بالامنىڭ تابانىنا كىرگەن شوگىر مەنىڭ ماڭدايىما قادالسىن" دەيتىن اتا-انا سوڭعى تيىنىن بەرسە دە بالاسىن جۇرتتىڭ بالاسىنان قالدىرماۋعا تىرىسادى.

باياناۋىل اۋدانىنىڭ ەكى لاۋازىمدى قىزمەتكەرى مەن ءبىر "نۇروتاندىق" پارا بەرۋ بابى بويىنشا كۇدىككە ءىلىندى. پارانى الۋشى عانا ەمەس، بەرۋشى دە قىلمىسكەر ەكەنىن ءۇش شەنەۋنىك تە ۇمىتىپ كەتسە كەرەك. اڭگىمە اۋدان اكىمىنىڭ ورىنباسارى مەن ءبىلىم ءبولىمىنىڭ باسشىسى تۋرالى دەيدى بىلەتىندەر. "باقساق باقا ەكەن" دەمەكشى، ۇبت تاپسىراتىن وقۋشىلاردان جينالعان ءتورت ميلليون تەڭگەنى كوميسسياعا ۇسىنعاندا كوميسسيا الۋدان باس تارتقان. سويتسە، باياناۋىل اۋدانى ۇبت-دان جيناعان بالل كورسەتكىشى بويىنشا كورشى اۋدانداردان قالىپ قويىپتى. باسقا اۋداندار ورتاشا دەڭگەيدە 101،3 بالل جيناسا، باياناۋىل 66 باللمەن كوش سوڭىندا قالعان. ال اۋداننىڭ شەنەۋنىكتەرى ماسەلەنى ءتيىمدى شەشۋدىڭ جولى پارا بەرۋ دەپ تۇسىنسە كەرەك.

بيىل مينيسترلىكتىڭ شەشىمى بويىنشا اۋدان، قالا مەكتەپتەرىنىڭ رەيتينگىسى مەكتەپ تۇلەكتەرىنىڭ تاپسىرعان تەست بالىنا قاتىسى جوعىن وبلىستىڭ "باس ءمۇعالىمى" ءدىنيسلام بولاتحان ۇلى دا قاداپ ايتتى. بۇل ءىستى جەرگىلىكتى بيلىك (اۋداننان باستاپ وبلىستىق ارادا) بارىنشا جاسىرۋعا تىرىسىپ وتىر. ال سىبايلاس جەمقورلىققا قارسى كۇرەس اگەنتتىگى تەرگەۋ بىتكەن سوڭ رەسمي مالىمدەمە جاسايتىندارىن ايتۋدا.

وڭعار قابدەنوۆ