Facebook الەۋمەتتىك جەلىسىندە تۇركىستان قالاسىنداعى كوپ قاباتتى پاتەردە بولعان قايعىلى وقيعاعا قاتىستى ۆيدەو تارادى، دەپ جازادى Qamshy.kz اقپارات اگەنتتىگى. 

تۇركىستان قالاسىندا اعىمداعى جىلدىڭ 1 شىلدەسىندە 9 ءۇي، 56 پاتەردە ورالبەك ارايلىم باۋىرجان قىزى ەسىمدى 15 جاستاعى قىزدى توق ۇرىپ، قىز كوز جۇمدى.

تۇرعىندار قايعىلى جاعدايدان كەيىن دابىل قاعىپ، ءىستىڭ ءمان-جايى تەكسەرىلۋىن تالاپ ەتىپ وتىر. ولاردىڭ ايتۋىنشا، تۇرعىنداردى توق سوققان جاعداي ءجيى بولىپ تۇرادى. ولار ءوز ءومىرى مەن جاقىندارىنىڭ ءومىرى ءۇشىن الاڭداپ وتىر.

«جاقىندا توقتاردى تەكسەردى. تەكسەرىس بارىسىندا دالىزدەن پەشكە جالعاناتىن زات جوق بولىپ شىققان. ادامدار پەشكە جاقىنداسا توق ۇرىپ جاتىر. ەدەندى جۋعاندا پەشكە جاقىنداپ قالساڭ كادىمگىدەي لاقتىرادى. ايەلىمنىڭ باسىنان سونداي جاعداي وتكەن. قىزدى كەشكى 9.30 بەن 22.00 ارالىعىندا توق ۇرسا، ايەلىمدى سول كۇنى تاڭعى 9-دار شاماسىندا ۇردى. بۇل ءۇيدى جيناپ جاتقاندا بولعان جاعداي» دەيدى تۇرعىن.

ارايلىم ورالبەكتىڭ تۋعان اپكەسى ىرىسالدى ورالبەك قىزدى قۋاتى كۇشتى توق ۇرعانىن ايتادى. ول ءمايىتحانادا قىزدىڭ قاسىندا بولعان.

«مەنى 9.30-دا ءىنىم قوڭىراۋ شالىپ شاقىرىپ الدى وسى جەرگە. مەن تاكسيمەن كەلەمىن دەگەنشە ولار ءسىڭلىمدى اۋلاعا كومىپ قويعان ەكەن. ءۇمىت قوي. تاڭعى ساعات جەتىدە بولمادى. تاڭ ەرتەڭ جەدەل جاردەم كەلدى. ولار كەلگەندە ونىڭ قايتىس بولعانىن ايتتى. ءمايىتحاناعا الىپ كەتتى. ءوزىم باسى قاسىندا بولدىم. ەڭ كۇشتى توقپەن ۇرعان دەيدى. ارقاسىنىڭ ءبارى كۇيىپ كەتكەن. ءوز كوزىممەن كوردىم ونى. توقتى قولىمەن ۇستاعان. ول قۇلاقتان شىققان. قۇلاعى قانتالاعان. قۇلاق تۇسىنىڭ ءبارىن كەسىپ كوردى. ارقاسى تولىعىمەن كۇيىپ كەتكەن. ءسىڭلىم قايتىپ كەلمەيدى عوي، ءبىراق مۇنداي جاعداي باسقا ادامنىڭ باسىنان ءوتۋى مۇمكىن عوي» دەيدى مارقۇمنىڭ اپكەسى.

الىبايەۆا ىرىسالدى باۋىرجان قىزى ءوزى جالعىزباستى انا ەكەنىن جانە ونىڭ 5 بالاسى بار ەكەنىن ايتادى. سىڭلىسىنەن ايىرىلىپ، قان جۇتىپ وتىرعان ول بالالارى ءۇشىن دە الاڭداپ وتىر.

«جۇمىسقا كەتكەندە بالالارىمدى اتاسىنىڭ ۇيىنە تاستاپ كەتەمىن. بالالارىمنىڭ باسىنان مۇنداي جاعداي وتپەسىنە كىم كەپىل؟ كىم جاۋاپ بەرەدى؟ ءسىڭلىم مىنانداي بولىپ وتىر. ەندى مەن قالاي جۇمىس ىستەيمىن؟» دەيدى ول.

كوپ قاباتتى ءۇي تۇرعىندارىنىڭ ايتۋىنشا، قايعىلى وقيعا بولعان كۇنى اكىمدىك، پروكۋراتۋرا مەن ءۇيدى سالعان فيرما باسشىلىعى بويى كورسەتپەگەن. قىزىنان ايىرىلعان ارايلىمنىڭ اكەسى ءۇيدى سالعان فيرما باسشىسى مەن اكىمدىك، پروكۋراتۋراعا ءوز رەنىشىن جەتكىزدى.

«اكىمدىك، پروكۋراتۋرا مەن ءۇيدى سالعان فيرمانىڭ ءبىر دە ءبىر وكىلى «مىنا جەردە نە بولىپ جاتىر؟» دەپ كوڭىلىمىزدى سۇراماق تۇگىلى، قاراسىن دا كورسەتپەدى. قىزىمىزدان ايىرىلىپ وتىرمىز عوي. جاعدايدى دا بىلىسكەن جوق. قىزدىڭ شەشەسى دە جوق. جالعىز ءوزىم تاربيەلەگەنمىن» دەيدى مارقۇمنىڭ اكەسى.

وسى جاعداي بويىنشا ءىستىڭ ءمان-جايىن انىقتاۋ ءۇشىن تۇركىستان قالاسى اكىمدىگىنە حابارلاستىق. اكىمدىكتىڭ بەرگەن مالىمەتىنە ساي، №9 ۇيدەگى توققا قاتىستى ماسەلە تەكسەرىلىپ جاتىر.

- وسى ءىس بويىنشا تەرگەۋ جۇمىستارى جۇرگىزىلىپ جاتىر. بارلىق جاۋاپتى بولىمدەردەن، تەندەردى العان ادامداردىڭ جۇمىستارى تەكسەرىلۋدە. تەرگەۋ جۇمىستارى اياقتالعاننان كەيىن ناقتى شەشىم شىعادى. اتالمىش ءىس بويىنشا ارنايى كوميسسيا دا قۇرىلعان، دەيدى اكىمدىكتىڭ باق-پەن بايلانىس قىزمەتىنىڭ وكىلى مادينا بايعۇت.