ۋنيۆەرسيتەت تۇلەكتەرىن العان بىلىمدەرى مەن كاسىبي دايىندىق دەڭگەيىنە ساي جۇمىسقا ورنالاستىرۋ ماقساتىندا الماتى تەحنولوگيالىق ۋنيۆەرسيتەتى داستۇرگە اينالعان جىل سايىنعى «ءوز جولىندى تاڭدا!» اتتى تۇلەكتەر جارمەڭكەسىن وتكىزىپ كەلەدى.

جۋىردا وتكەن تۇلەكتەر جارمەڭكەسى تاعام، وڭدەۋ، توقىما جانە جەڭىل ونەركاسىپ سالالارىندا، بيزنەس، قىزمەت كورسەتۋ جانە قوناقجايلىق يندۋسترياسىندا وتكەن جىلدارمەن سالىستىرعاندا بوس جۇمىس ورىندارىنىڭ كۇرت وسكەنىن اڭعارتسا كەرەك. بيىل ۋنيۆەرسيتەتتىڭ 22 ماماندىعى بويىنشا 1 418 تۇلەك جوعارى ءبىلىمى تۋرالى ديپلوم الادى، ونىڭ 20%-ى ۇزدىك بىتىرەدى. بۇل ورايدا جۇمىس بەرۋشىلەرمەن بايلانىس ورناتىپ، تۇلەكتەردى جۇمىسقا ورنالاستىرۋ ۋنيۆەرسيتەت ۇجىمىنىڭ باستى مىندەتى بولىپ وتىر.

جارمەڭكەنىڭ جۇمىسىن اشقان الماتى تەحنولوگيالىق ۋنيۆەرسيتەتىنىڭ ءبىرىنشى پرورەكتورى، پروفەسسور باۋىرجان نۇراحمەتوۆ: «بۇگىنگى شارانىڭ نەگىزگى ماقساتى – تۇلەكتەر مەن جۇمىس بەرۋشىلەردى كەزدەستىرۋ. جۇمىس بەرۋشى ءدال وسىنداي جيىنداردا جاس مامانعا جۇمىس ورنىن بەرمەس بۇرىن، ونىڭ شاما-شارقىن جان-جاقتى باعالاي الادى. ءوز كەزەگىندە، تۇلەكتەر، ءدال ءقازىر قاجەت دەپ تانىلاتىن قاندايدا ءبىر ماماندىق تۋرالى ۇسىنىستاردى جانە جۇمىس بەرۋشىلەردەن دايىن بوس جۇمىس ورىندارى تۋرالى تولىققاندى اقپارات الادى. جالپى، تۇلەكتەر جارمەڭكەسى بۇل تەك تۇلەكتەر مەن جۇمىس بەرۋشىلەردىڭ كەزدەسۋى عانا ەمەس، جوعارى وقۋ ورنى ۇجىمىنىڭ، جۇمىس بەرۋشىلەردىڭ، مەملەكەتتىك ورگاندار مەن قوعامدىق ۇيىمدار وكىلدەرىنىڭ ءوزارا پىكىر الماسۋ الاڭى بولىپ تابىلادى»، - دەدى. جارمەڭكەگە جالپى سانى 60-تان استام تاعام جانە جەڭىل ونەركاسىپ كاسىپورىندارى، قارجى سەكتورى، مەيرامحانا جانە مەيمانحانا بيزنەسى مەن تۋريزم ۇيىمدارى، مەملەكەتتىك ورگاندار وكىلدەرى، عىلىمي ينستيتۋتتار، سالالىق كاسىپورىندار مەن وداقتار قاتىستى. الماتى قالاسى جۇمىسپەن قامتۋ ورتالىعىنىڭ ماماندارى جارمەڭكەگە قاتىسۋشىلاردى قالالاداعى بوس ورىندار بانكىسىنىڭ اعىمداعى ۇسىنىستارىمەن تانىستىردى، سونداي-اق «جۇمىسپەن قامتۋ-2020 جول كارتاسى» مەملەكەتتىك باعدارلاماسىنىڭ جاستاردى جۇمىسپەن قامتۋ سالاسىنداعى مۇمكىندىكتەرى جايىندا حاباردار ەتتى. جارمەڭكەگە قاتىسقان ۋنيۆەرسيتەت تۇلەكتەرى جۇمىس ورنى جايىندا قاجەتتى اقپارات الىپ، جۇمىس بەرۋشىلەرگە تۇيىندەمەلەرىن وتكىزىپ جاتتى. ال ءاربىر جۇمىس بەرۋشى ولارعا كەم دەگەندە تورت-بەس جۇمىس ورنىن ۇسىندى.

اسحات ابىشيەۆ، قازاقستان جۋرناليستەر وداعىنىڭ مۇشەسى