ۆلاديمير پۋتين اقپارات قۇرالدارىندا پايدا بولعان ءوزىنىڭ دەرتى تۋرالى قاۋەسەتتەرگە قاتىستى پىكىر ءبىلدىردى، - دەپ حابارلايدى ريا نوۆوستي. ونىڭ ايتۋىنشا، "وسەكسىز ءومىر قىزىق ەمەس". ەسكە سالايىق، ونىڭ اۋرۋى قازاقستانعا جاساۋى ءتيىس ساپارىنىڭ كەيىنگە قالۋىنا سەبەپ بولدى دەگەن اقپارات 11 ناۋرىز كۇنى تاراعان ەدى. مۇنداي اقپاراتتاردىڭ ءبارىن ءپۋتيننىڭ باسپا ءسوز حاتشىسى دميتريي پەسكوۆ قايتا-قايتا جوققا شىعارىپ وتىردى.
پەسكوۆ سانكت-پەتەربۋرگتە رەسەي مەن قىرعىزستان پرەزيدەنتتەرىنىڭ كەزدەسۋى وتكەن كونستانتينوۆ سارايىندا رەسەي باسشىسىنىڭ "جوعالىپ كەتۋى" تۋرالى مالىمدەمەلەرگە قاتىستى تۇسىنىك بەرە وتىرىپ، قاۋەسەتتەردى ازىلگە اينالدىردى. "تۇلا بويى سال بوپ قالعان"، "گەنەرالدار باسىپ العان" پرەزيدەنتتى كوردىڭىزدەر مە؟ جاڭا عانا شۆەيساريادان كەلدى، ول جاقتا ونىڭ الدەكىمدى بوساندىرعانىن بىلەسىزدەر"، - دەدى پەسكوۆ.
16 ناۋرىز كۇنى رەسەي باسشىسى قىرعىز ارىپتەسىمەن بىرگە جۋرناليستەردىڭ الدىنا شىقتى. قىرعىزستان پرەزيدەنتى المازبەك اتامبايەۆ ۆلاديمير ءپۋتيننىڭ ءوزىن جاقسى سەزىنەتىنىن حابارلادى. "جاڭا عانا ۆلاديمير ۆلاديميروۆيچ مەنى اۋماقتا قىدىرتتى، ءوزى رۋلدە وتىردى. وسەك تاراماۋى ءۇشىن. رەسەي پرەزيدەنتى ءجۇرىپ قانا قويماي، قوناقتاردى كولىكپەن الىپ تا جۇرە الادى. ورىسشا ايتقاندا، مۇندايدى ۇزاق كۇتۋ كەرەك"، - دەدى اتامبايەۆ. "وسەكسىز ءومىر قىزىق بولمايدى"، - دەدى ۆلاديمير پۋتين. ايتا كەتەيىك، المازبەك اتامبايەۆ ءقازىر سانكت-پەتەربۋرگتە رەسمي ساپارمەن ءجۇر.
پىكىر قالدىرۋ