راحىمجان وتاربايەۆتىڭ "جاس الاش" گازەتىنە بەرگەن سۇحباتىندا ءتىلشى وسى ساۋالدى قويعان. بۇل ساۋالعا ر.وتاربايەۆ: "
ەرتە مە، كەش پە وسى ساۋالدىڭ الدىمنان شىعاتىنىن سەزىپ جۇرەتىنمىن. جانە كوپ قالامداستارىمنىڭ كوكەيىن تەسىپ جۇرگەن نارسە ەدى. شىندىعى بىلاي. الدىمەن ايتارىم، مەن وسى ايتۋلى ەكى تۇلعادان ولشەۋسىز جاقسىلىق كورگەن اداممىن. تىزبەلەپ كەتسەم، كوپكە سوزىلار. ايتماتوۆ پەن شاحانوۆتىڭ دوستىعىن ەل بىلەدى. بىشكەكتە ەلشىلىكتە جۇرگەن كەزىمىز. ەكى اعام اڭگىمەلەسىپ وتىرىپ: «وسى بىرلەسىپ كىتاپ جازساق قايتەدى؟» – دەستى.
– ەكى ەلدىڭ تاريحى مەن تاعدىرىن قوزعايىق، بيلىكتەگىلەردىڭ تاعى مەن باعىن ايتايىق، اراسىندا ءوز ءومىرىمىزدىڭ كەيبىر بەلەستەرىن دە كىرىستىرىپ وتىرايىق...
سونىمەن بولاشاق كىتاپتىڭ تاراۋلارى مەن تاقىرىبى تالداندى. مەن دە ءوز ويىمدى قوستىم. كەيبىر دەرەكتەردى بەردىم. ءسويتىپ، اركىم ءوز ۇلەسىن جازاتىن بوپ شىقاڭ بريۋسسەلگە اتتاندى. مۇحاڭ بىشكەكتە قالدى. ەكەۋى ەكى جاقتا جاتىپ الىپ جارتى جىل جازىستى. قولجازبالارىنىڭ ءۇزىندىسىن بىر-بىرىنە تەلەفونمەن وقىسادى. كوبىنە كەلىسىپ، كەيدە ءتىپتى شەكىسىپ الادى.
شەكىسەتىندەرى مۇحتار اعا جەدەل، شالت قيمىلدايدى دا، شىقاڭ بولسا اسىعار ەمەس. وزگە جۇمىسى، جازۋى باستان اسىپ جاتقان شىعار. سوسىن ءبىرى قازاقشا، ەكىنشىسى ورىسشا جازادى. سايكەسسىزدىكتەر دە از ەمەس.
التى ايدان سوڭ جازعاندارىن بىرلەسىپ تالقىلادى، تالدادى. تاراۋ-تاراۋعا بىرىكتىردى. سوسىن شىڭعىس اعا: –راحىمجان باۋىر، سەن مەنىڭ جازعاندارىمدى تىگىسىن جاتقىزىپ قازاقشاعا اۋدار. قول كومەگىڭدى بەر. كىتاپ الدىمەن الماتىدا قازاقشا، سوسىن بارىپ ورىسشا، قىرعىزشا شىعادى، –دەدى. اۋدارىپ شىقتىم. مۇحاڭنىڭ جازعانىنان دا سول اۋدارماعا لايىقتاپ مۇرتىن باستىم. ستيلدىك جاقتان بىر-بىرىنەن الشاق كەتپەسىن دەپ. بار-جوعى سول! بۇل كىتاپقا مەنىڭ سىڭىرگەن ەڭبەگىم 10-15 پايىز شاماسىندا-اق شىعار. مەن مۇنى ەكى تۇلعانىڭ الدىنداعى ىنىلىك پارىزىم، ولاردان كورگەن شاپاعاتىمنىڭ وتەۋى دەپ ىستەدىم. باسقا بوتەن وي بولعان جوق.
كەزىندە زامانانىڭ قىرىنا ءىلىنىپ، ۇمىت بولا جازداعان مۇحتار اۋەزوۆتىڭ «قيلى زامان» پوۆەسىن ايتماتوۆ ىزدەپ تاۋىپ، ءوزى ورىسشاعا اۋدارىپ «نوۆىي مير» جۋرنالىنا جاريالاپ، ادەبيەتىمىزدىڭ اسىل قازىناسىنا قايتا قوسىپ ەدى. سوعان جارىلا قۋانعان قازاقتىڭ، مەن شىڭعىس اعانىڭ 170 بەتتىك ورىسشا جازعانىن قازاقشا سويلەتە قويىپ ەم، جەلتوقسان وقيعاسى زۇلماتىن الەم نازارىنا الىپ شىققان شاحانوۆتىڭ قولجازباسىنىڭ مۇرتىن باسا قويىپ ەم، مۇنشاما شامداناتىنىن قايدان بىلەيىن؟!
مەنىڭ وتارىمنان قوي ورگىزگىسى كەپ تۇراتىن اعالارىما ازىرگە ايتارىم وسى. سول اعالاردان ءبىر اتاقتى جازۋشىمىزدىڭ تورت-بەس تاريحي رومانى قالايشا بىر-بىرىنە جۇعىسپاس تورت-بەس ستيلدە جازىلعانىن ءبىزدىڭ دە سۇرايتىن ۋاقىتىمىز جەتەر بالكىم؟!" دەپ جاۋاپ بەردى.
پىكىر قالدىرۋ