بۇگىن ەكسپو نىساندارى بويىنشا ينسپەكسيالىق ساپارمەن حالىقارالىق كورمەلەر بيۋروسىنىڭ باس حاتشىسى ۆيسەنتە لوسسەرتالەس استاناعا كەلدى. جۋرناليستتەر بولاشاق ەكسپو-2017 قۇرىلىس الاڭىندا العاشقى رەت بولىپ، جۇمىستار قالاي ءجۇرىپ جاتقانىن ءوز كوزدەرىمەن كورىپ قايتتى.

البەتتە، ەڭ الدىمەن ولار كورمەنىڭ باستى نىسانى – سفەرا تۇرىندە سومدالاتىن قازاقستان ۇلتتىق پاۆيلونىنىڭ بولاشاق عيماراتىنا باردى. ازىرگە بۇندا بولاشاق قۇرىلىستىڭ نولدىك كەزەڭى اياقتالعان. ديامەترىنىڭ كولەمى 80 م، ال بيىكتىگى 8 قاباتتى ۇيگە تەڭ كەلەتىن عيمارات، ارحيتەكتورلاردىڭ ويلاستىرۋىنشا استانانىڭ ەڭ كورىكتى جەرلەرىنىڭ بىرىنە اينالادى. سول سەبەپتى، ول «بايتەرەك» مونۋمەنتىمەن ءبىر بەلدەۋدە ورنالاسقان.

سفەرانىڭ شىنى قابىقشاسىنىڭ استىندا مۇراجاي مەن قازاقستاندىق پاۆيلون ورنالاسادى. دەگەنمەن دە، بۇلاردىڭ ءبارى – قۇرلىسشىلار جۇزەگە اسىراتىن جوسپارلار عانا.

تەكسەرۋدىڭ ەكىنشى نىسانى كورمە ۇيىمداستىرۋشىلارىنىڭ عيماراتى بولدى. «استانا ەكسپو-2017» ۇلتتىق كومپانياسى» اق باسقارما باسشىسى تالعات ەرمەگيايەۆ بۇل نىساندى ۋاقىتىنان بۇرىن قولدانىسقا وتكىزۋ جوسپارلانۋدا ەكەنىن لوسسەرتالەس مىرزاعا جەتكىزدى.

 «جىلدىڭ اياعىندا اياقتاۋلارى كەرەك ەدى، ءبىراق ءبىز بۇندا كۇزدە كىرۋدى جوسپارلاۋدامىز. تامىز ايىنىڭ 3-ىنە قاراي ءبىرىنشى عيماراتتى ۇسىنعىمىز كەلەدى، سوعان بايلانىستى ارى قاراي جۇمىس ىستەيمىز»، - دەپ ۇلتتىق كومپانيا باسشىسى ءتۇسىندىردى.

«ەگەر سىزدەر ەرتەرەك اياقتاساڭىزدار، تاماشا بولار ەدى، ەلدەردەن ادامدار كەلىپ، قالاي بولىپ جاتقاندىعىن كوزدەرىمەن كورۋگە مۇمكىندىك الادى»، - دەپ قازاقستاندىق تاراپتىڭ باستاماسىنا ۆيسەنتە لوسسەرتالەس قولداۋ ءبىلدىردى.

ۋاقىتشا قۇرىلعان توڭىرەكتى قاراۋ الاڭىنىڭ تەرەزەسىنەن حالىقارالىق كورمەلەر بيۋروسىنىڭ باس حاتشىسى قۇرىلىسى ءجۇرىپ جاتقان بارلىق نىساندارعا كوز جۇگىرتتى. ايتا كەتۋ كەرەك، توڭىرەكتى قاراۋ الاڭىن 2015 جىلدىڭ اياعىنا قاراي الىپ تاستايدى.

«استانا ەكسپو-2017» باسشىسى تالعات ەرمەگيايەۆ قۇرىلىس جۇمىستارى كەستەگە سايكەس، ساپالىلىقتى ساقتاي وتىرىپ جۇرگىزىلۋدە ەكەندىگىن ءسوز ەتتى.

 «جارتى جىلعا ەرتەرەك اياقتايتىن شىعارمىز. وسى جىلدىڭ اياعىنا دەيىن بارلىق عيماراتتار كوتەرىلەدى جانە ولاردىڭ قاسبەتتەرىن جاۋىپ، ءبىر بولىگىن اباتتاندىرۋعا كۇش سالامىز. ياعني ازىرلىك 70-80% بولادى. بارلىق عيماراتتار، بارلىق ينجەنەرلىك جەلىلەر... ءبىزدىڭ جوسپار بويىنشا كەلەسى جىلدىڭ باسىندا ىشكى ارلەۋ جۇمىستارىنا كىرىسۋگە بولادى. الايدا بۇنىمەن قاتىسۋشىلاردىڭ وزدەرى اينالىساتىن بولادى. كونگرەسس-حولل، وتەل ءتارىزدى نىساندار ءۇشىن – ولارعا ۋاقىت قاجەت، كەلەسى 2016 جىلدىڭ جازىندا اياقتايدى. ويتكەنى دايىندالۋعا، شەرۋلەر وتكىزۋگە ۋاقىت قاجەت»، - دەپ اتاپ ءوتتى تالعات ەرمەگيايەۆ.

حالىقارالىق كورمەلەر بيۋروسىنىڭ باس حاتشىسى كورگەندەرىنە ريزا بولدى.

 «قۇرىلىس الاڭىنداعى ۇيىمشىلدىقتان مەن وتە ۇلكەن اسەر الدىم. قۇرىلىس كەستەگە ساي عانا ەمەس، ودان ءبىراز الدىدا كەلە جاتىر. قۇرىلىس جۇمىستارىنىڭ جەتىستىكتەرى ءتورت مىڭ جۇمىسشىنىڭ قولىندا. قۇرىلىس الاڭىن ءوز كوزىڭمەن كورگەن كەزدە ءبارى قالاي جاسالعانىن ءتۇسىنۋ جەڭىلىرەك بولاتىنىن ايتقىم كەلەدى»، دەپ ۆيسەنتە لوسسەرتالەس ءوز اسەرىمەن ءبولىستى.

سالىنىپ جاتقان نىسانداردى كورىپ بولعاننان كەيىن ۆيسەنتە لوسسەرتالەس ەكسپو-2017 جوباسى اياسىنداعى ماستەر-جوسپار، تاقىرىپتىق پاۆيلوندار مەن بۇقارالىق شارالارعا ازىرلىك بويىنشا ماسەلەردى تالقىلاۋعا قاتىستى. سونداي-اق، ەكى كۇندىك ساپارى بارىسىندا حالىقارالىق كورمەلەر بيۋروسىنىڭ باسشىسى ءبىرقاتار رەسمي كەزدەسۋلەر وتكىزەدى.

اينۇر كوسكينا