18 ناۋرىز. Qamshy.kz - بۇگىن اقورداداعى ديپلوماتيالىق كەزدەسۋلەر بارىسىندا اقش-تىڭ قازاقستانداعى جاڭا تاعايىندالعان ەلشىسى دجورج كلور ەلباسىنىڭ الدىندا قازاق تىلىندە بايانداما جاسادى. بۇل تۋرالى "قامشى" پورتالى حابارلايدى.

رەسمي بايانداماسىنىڭ ءالقيسساسىن قازاق تىلىندە جاتقا سويلەۋدەن باستاعان  ەلشى مىرزا ارتىنشا ارنايى جازىلعان ءماتىنىن قاعازعا قاراپ وقىدى. بايانداماسىن اياقتاعان ەلشى دجورج كلور مىرزا ەلباسى نۇرسۇلتان ءابىشۇلىنا سەنىم گراموتاسىن تاپسىردى. ال قازاقستانعا كەلگەنىنە كوپ بولماعان ەلشى مىرزانىڭ رەسمي بايانداماسىن مەملەكەتتىك تىلدە جاساعانىنا  ەلباسى ءوز ريزاشىلىعىن ءبىلدىردى.

سونداي-اق، بۇگىن اقوردادا ەلباسىمەن كەزدەسكەن كۋۆەيت، پاكىستان، ساۋد ارابياسى جانە باسقا دا ەلشىلەر اۋدارماشىنىڭ كومەگىنە جۇگىنسە، بولگاريانىڭ قازاقستانداعى ەلشىسى ءوز بايانداماسىن رەسمي تىلدە(ورىس تىلىندە) جاساعان.

ەلباسى نۇرسۇلتان نازاربايەۆتىڭ الدىندا باياندامالارىن جاساپ، سەنىم گراموتالارىن تاپسىرىپ بولعان ەلشى مىرزالار جۋرناليستەرگە سۇحبات بەرگەن. امەريكالىق ديپلومات بۇل جەردە دە ەرەكشە كوزگە ءتۇسىپ، جۋرناليستەرگە بەرگەن سۇحباتىن تازا قازاق تىلىندە جاساعان. اقش ەلشىسىنەن كەيىن ءسوز العان بولگاريالىق ەلشى جۋرناليستەردىڭ الدىندا بىر-ەكى اۋىز ءسوزىن قازاق تىلىندە جاساۋعا نيەتتەندى.

ايتا كەتەتىنى، اقش ەلشىسى قازاقستانعا كەلگەنىنە كوپ ۋاقىت بولماسادا ءوزىنىڭ قازاقستانعا دەگەن كوزقاراسىن وسىلايشا ءبىلدىردى.  جۋرناليستەرگە رەسمي مالىمدەمە جاساعان ەلشى دجورج كلور مىرزا وزىنە قازاقتىڭ ۇلتتىق اسحاناسىن قاتتى ۇناتاتىنىن جانە قىمىز بەن شۇباتتىڭ ءدامى ءتىل ۇيىرەتىنىن دە ايتتى.

نۇرزات توعجان