ون جىلدىق داعدارىستان كەيىن قازاقستان بانك نارىعى وزگەرە باستادى، دەپ جازادى Forbes Kazakhstan جۋرنالى. وعان ەلدەگى جوعارى بيلىكتىڭ ساياسي ىقپالى، ۇلتتىق بانكتىڭ قاتاڭ رەتتەۋى جانە حالىقارالىق قارجىلىق ەسەپ ستاندارتتارىنىڭ جاڭا ەرەجەلەرى، نارىقتاعى باسەكەلەستىكتىڭ ناشارلاۋى، بىلىكتى مامانداردىڭ بولماۋى جانە تاعى باسقالار اسەر ەتكەن.

«قازاقستاندىق بانكتەر مەملەكەتتىك اقشاسىز ءومىر سۇرۋگە قالاي دايىندالۋدا؟» دەپ باستالاتىن ماقالادا ەلدەگى شاعىن جانە ورتا بيزنەستى كرەديتتەۋ تالابى جوعارى ەكەنى، كەپىل سۇرالىپ، پايىزى تىم كوپ بولاتىنىنا نازار اۋدارىلعان. بانكتەردىڭ ءتۇرلى نارىقتا قوسىمشا تابىس تابا الاتىنىن جازعان ماقالا ساراپتامالاردىڭ جەتكىلىكسىزدىگى مەن اكسيونەر تاراپىنان جاڭا تەحنولوگيالاردى ەنگىزۋگە دەگەن ەنجارلىقتى دا سىنايدى.

ق ر ۇلتتىق بانكى مەن قازاقستان قور بيرجاسى kase.kz-كە،  جانە بانكتەردىڭ رەسمي سايتتارىنداعى اقپاراتتارعا نەگىزدەلىپ «Baker Tilly Kazakhstan Advisory» ج ش س قازاقستان بانكتەرىنىڭ رەيتينگىن جاساعان.

ءتىزىمنىڭ باسىندا بۇرىنعىشا «قازاقستان حالىق بانكى» اق تۇر.

73،6 پايىز اكسياسى «المەكس» كومپانياسى ارقىلى تيمۋر جانە دينارا قۇلىبايەۆتارعا قارايتىن ەلدەگى ەڭ ءىرى بانك وزبەكستانمەن ساياسي قاتىناس جاقسارعان سوڭ مامىردا وزبەكستاننان دا فيليال اشاتىنىن مالىمدەگەن. ءبىر جىل بۇرىن 5 شىلدەدە قازكوممەرسبانكتى كەڭەس راقىشيەۆتەن ساتىپ العان حالىق بانك كەشە عانا ەكى بانكتىڭ جۇيەسىن تولىقتاي بىرىكتىردى.

تىزىمدە ەكىنشى ورىندى «Kaspi Bank» اق العان. 10 پايىزعا جۋىق اكسياسى يەسى ميحايل لومتادزە مەنەدجەرلىگىندەگى بانكتىڭ 28،22% اكسياسى پرەزيدەنتتىڭ نەمەرە ءىنىسى قايرات ساتىبالدىعا تيەسىلى. بانك kaspi.kz ينتەرنەت ماگازينىمەن ەرەكشەلەنەدى.

ءۇشىنشى ورىن «قازاقستاننىڭ تۇرعىن ءۇي قۇرىلىس جيناق بانكىنە» تيەسىلى. لياززات يبراگيموۆا باسقارۋىنداعى بانك تولىقتاي مەملەكەتكە تيەسىلى. تۇرعىن ءۇي يپوتەكاسىن بەرۋ ءۇشىن 15 جىل بۇرىن قۇرىلعان. 2017 جىلى جەكە تۇلعالاردىڭ سالىمى 524،6 ملرد تەڭگەگە جەتكەن.

ءتىزىمدى ارى قاراي «سەسنابانك»، «سبەربانك»،  «بانك سەنتركرەديت»، «ForteBank»، «بانك حوۋم كرەديت» جالعايدى. وندىقتى بىلتىر عانا قىتايدىڭ China CITIC Bankء-ى 60 پايىز اكسياسىن ساتىپ العان «Altyn Bank» پەن «اتفبانك» تامامدايدى.

تىزىمگە قازاقستاننىڭ 32 بانكى كىرگەن.