الماتىدا اۆتوتۇراقتا ءجۇز تەڭگە ءۇشىن تۋىنداعان جانجال جالعاسىن تاپتى. اۆتوتۇراق قىزمەتكەرىن اتىپ، جاراقاتتاعان جۇرگىزۋشى استانا ارناسىنىڭ تىلشىلەرىنە وقىس وقيعا تۋرالى ءوز شىندىعىن باياندادى.
ءبارى تۇراق ءۇشىن اقى تولەمەۋدەن باستالعانىن ايتادى. ال اقى سۇراعاندار زاڭدى قىزمەتى تۋرالى كۋالىكتى كورسەتپەسە كەرەك. اكىمدىك وكىلدەرى الماتى قالاسىندا جول جيەگىندەگى اۆتوتۇراقتار ءۇشىن، ەگەر تولەم تەرمينالدارى بولماسا، تۇرعىندار اقشا تولەۋگە مىندەتتى ەمەس دەپ مالىمدەدى.
"ماعان كەلىپ اۆتوتۇراق ءۇشىن اقشا تولە، دەدى. مەن بۇل جەر تۇراق تەگىن ەمەس پە، دەدىم. ول "مەن ەشتەڭە بىلمەيمىن، تولە!" دەدى. چەك بار ما؟ قۇجات بار، دەدىم. جوق پا، وندا تولەمەيمىن، دەپ ەدىم. ول مەنىڭ كۇرتەشەمنەن ۇستاپ، بەتىمنەن ۇرا جونەلدى"، - دەپ باياندايدى كۇدىكتى يۆان حۋتور. كۇدىكتى ازامات قارۋدى قورعانۋ ءۇشىن قولدانعانىن ايتادى. جۇدىرىقتىڭ استىندا قالعان سوڭ، قارۋدى الىپ شىققانىن جەتكىزدى. ەكى رەت اۋاعا، سوسىن اۆتوتۇراقشىنىڭ اياعىنا اتقان. بۇل ارەكەتىممەن اشۋلى توپتى توقتاتپاق بولدىم، دەپ ءتۇسىندىردى. ءبىراق تەپكىدەن قۇتىلا الماعانىن ايتادى. ءقازىر جىگىت قارالىپ جاتقان قاراساي اۋداندىق اۋرۋحاناسىنىڭ جاراقات دارىگەرى اسەت ەسقۇلوۆ: "ناۋقاس 17ء-سى كۇنى ساعات 22.40 ءتۇستى اۋرۋحاناعا. كەلىپ تۇسكەندەگى شاعىمدارى - باس اۋرۋى، باس اينالۋى، ەسىنەن تانۋى. ءقازىر ەمىن الىپ جاتىر، جاعدايى ورتاشا اۋىرلىقتا. دياگنوزى - جابىق مي جاراقاتى، باس ميىنىڭ شايقالۋى"، - دەيدى. بۇل وقيعاعا قاتىستى قالا باسشىلىعى دا تۇسىنىكتەمە بەردى. الماتى قالاسى تابيعي رەسۋرستار جانە تابيعاتتى پايدالانۋ باسقارماسى باسشىسىنىڭ مىندەتىن اتقارۋشى ەركەبۇلان ورازالين: "ايتا كەتەتىن اقپارات: الماتى قالاسىنىڭ ءتۇرعىندارىنا، وزدەرى بىلەتىندەي، جالپى ولاردىڭ، ەشقايسىسى اۆتوماتتاندىرىلماعان جاعدايدا، قىزمەتكەرلەرگە ءجۇز تەڭگەدەن اقشانى تولەۋ مىندەتتى ەمەس"، - دەيدى.
ال بەلگىلى زاڭگەر سەرگەي ۋتكين وسى توڭىرەكتە ارنايى زاڭنىڭ جوقتىعى ازاماتتاردى اداستىرىپ كەلەتىنى ايتادى.
"وسىدان بارىپ ادامداردىڭ اراسىندا تۇسىنبەۋشىلىك تۋىندايدى. ارنايى زاڭنىڭ جوقتىعىنان، جۇرگىزۋشى تولەمەۋىم كەرەك دەيدى، ال اۆتوتۇراق قىزمەتكەرلەرى بارلىعى تولەۋگە ءتيىس دەيدى. ەكى جاق تا ءوز تالاپتارى زاڭدى ەكەنىنە سەنەدى. ەگەر جاقىن ارادا بۇل جاعدايدى توقتاتپاساق، اتىسپەن اياقتالاتىن جايتتار قايتالانا بەرەدى. ويتكەنى جۇرت تەكتەن-تەك اقشا تولەگىسى كەلمەيدى"، - دەيدى زاڭگەر. الماتى اكىمدىگىنىڭ مالىمەتىنە سۇيەنسەك، كوشەدەگى تۇراقتاردان جينالعان قارجىنىڭ تەك 20 پايىزى قالا قازىناسىنا تۇسەدى. وتكەن جىلى بۇل سوما 75 ميلليون تەڭگەنى قۇراعان. اكىمدىك ەشكىم تولەۋگە ءتيىستى ەمەس دەپ ايتقاندىقتان، سەرگەي ۋتكين وسىنشاما قارجىنىڭ بارلىعى جۇرگىزۋشىلەردەن زاڭسىز جينالدى دەپ وتىر. ال تۇراق ءۇشىن اقى تولەۋدەن باس تارتقان يۆان حۋتورعا بايلانىستى قىلمىستىق ءىس قوزعالعان، تەرگەۋ جالعاسۋدا. ول قايتكەنمەن دە، قوعامدىق ورىندا قارۋ قولداندى.
