19 ناۋرىز. Qamshy.kz - بۇگىن 26 ساۋىردە وتەتىن كەزەكتەن تىس پرەزيدەنت سايلاۋىنا ۇمىتكەر رەتىندە تىركەلگەن جارىلقاپ قالىباي الماتى قالاسىندا جۋرناليستەرگە ارنالعان باسپا ءسوز ءماسليحاتىن وتكىزدى. بۇل تۋرالى "قامشى" پورتالى حابارلايدى.
بۇعان دەيىن ءبىز پورتالىمىزدا "جۇلدىزدار وتباسى" مەن "اڭىز ادام" جۋرنالدارىنىڭ باس رەداكتورى جارىلقاپ قالىبايدىڭ ق ر پرەزيدەنت سايلاۋىنا ۇمىتكەر رەتىندە تىركەلگەنىن جانە وعان 23 ساۋىرگە دەيىن قازاقستاندىق سايلاۋشىلاردىڭ 93 مىڭ قولىن جيناۋ پاراعى بەرىلگەندىگى تۋرالى جازعان بولاتىنبىز. ال بۇگىنگى باسپا ءسوز ءماسليحاتىندا ۇمىتكەر جارىلقاپ قالىباي مىرزا وسى قىسقا مەرزىم اراسىندا داۋىس بەرۋشىلەردەن قول جيناۋ پروسەسى قالاي ءجۇرىپ جاتقانى، بەلگىلەگەن مەجەنىڭ قانشا پايىزى جينالعانى جانە اتالمىش سايلاۋعا قاتىستى كۇتپەگەن كەلەڭسىزدىكتەر مەن كەدەرگىلەر تۋرالى جۋرناليستتەرگە ايتىپ بەردى.
باسپا ءسوز جيىنىنا پرەزيدەنتتىككە ۇمىتكەر جارىلقاپ قالىبايدى قولداۋعا بەلگىلى جۋرناليست ەرمۇرات باپي مەن عابيدەن جاكەي، ال ونەر يەلەرىنەن تانىمال رەجيسسەر ەركىن راقىشيەۆ پەن اكتەر ەرلان ءبىلال مىرزالار عانا كەلىپ قاتىستى.
باسپا ءسوز جيىنىندا ءسوز باستاعان عابيدەن جاكەي پرەزيدەنت نازاربايەۆپەن ورەسى تەڭ، ناعىز ينتەلەكتۋالدى ۇلتشىل ازامات سايلاۋعا تۇسكەلى وتىرعانىن اتاپ ايتتى. عابيدەن جاكەي "رەسپۋبليكا كولەمىندە ۇلكەن سۇرانىسقا يە قوس بىردەي جۋرنالدى شىعارىپ وتىرعان جارىلقاپ ناعىز ءبىلىمدى، پاراساتتى، كەز-كەلگەن مينيسترلىكتىڭ تىزگىنىن ۇستاي الاتىن جان-جاقتى ازامات. قازىرگى قازاق قوعامى ەكى ساناتقا بولىنگەن. ءبىرىنشىسى بەلگىلى ءبىر لاۋازىمدى ورىندارعا جايعاسقان - رەسەيشىلدەر بولسا، ەكىنشىسى - تۋرا وسىعان قاراما-قايشى - ۇلتشىلدار. بۇگىنگى كۇنى سول اربانىڭ بەسىنشى دوڭگەلەگىنە اينالىپ بارا جاتقان ۇلتشىلدار بىرىگىپ، كۇش بولىپ جارىلقاپتى ۇسىنىپ وتىرمىز. ءبىز ليبەرالدى قۇندىلىقتاردى قولدايمىز. تازا دەموكراتيالىق قوعام قالىپتاستىرۋعا كۇش سالامىز"،-دەدى. ال ەرمۇرات باپي مىزرا الداعى سايلاۋ ناۋقانىنا دايىندىق جۇمىستارىن ءسوز ەتە وتىرىپ، جارىلقاپ قالىبايدىڭ كانديداتۋراسىن قولداۋشىلاردىڭ قولدارىن جيناۋ بارىسىندا كەزدەسىپ جاتقان ءتۇرلى كەلەڭسىزدىكتەرگە توقتالىپ ءوتتى. ەرمۇرات ءباپيدىڭ ايتۋىنشا ءقازىردىڭ وزىندە ۇيىمداسقان پروۆاكاتورلار جارىلقاپ قالىبايدىڭ قول جيناۋ پاراقشالارىن ءبۇلدىرىپ، ونداعى داۋىس بەرۋىشىنىڭ ەسىمدەرىن بۇرمالاعان فاكتىلەر دە كەزدەسكەن. "ءتىپتى، كەيبىر باق-تا ارنايى ادامداردىڭ تاپسىرماسىمەن جارىلقاپ قالىبايعا قاتىستى پروۆاكاسيالىق ماقالالار دا جاريالانا باستاعان"،-دەيدى ەرمۇرات باپي.
جارىلقاپ قالىباي، "جۇلدىزدار وتباسى" مەن "اڭىز ادام" جۋرنالدارىنىڭ باس رەداكتورى:
- مەنىڭ سايلاۋ دوداسىنا تۇسۋدەگى باستى ماقساتىم قازاقستاندى 25 جىل باسقارعان ادامدى ورنىنان قۇلاتۋ ەمەس. ول مۇمكىن ەمەس تە. الايدا ءوزىمنىڭ كونستيتۋسيالىق قۇقىمدى پايدالانا وتىرىپ، وسى سايلاۋدا حالىقتىڭ كەم-كەتىگىن بيلىككە جەتكىزۋ. ب ا ق ارقىلى الەۋمەتتىڭ الدىنا شىعارۋ. ۇلتشىلداردىڭ ءبىر مۇددەگە ۇيىسقاندىعىن كورسەتۋ. بۇگىنگى كۇندە ۋاقىت وتە قىسقا بولسا دا، قازاقستاننىڭ ايماقتارىنان كەلىپ قولداۋ ءبىلدىرىپ جاتقانداردىڭ قاراسى مول. وبلىستار مەن اۋداندارداعى ءتۇرلى ۇيىمدار مەن بىرلەستىكتەردىڭ جەتەكشىلەرى كەلىپ قول جيناۋ پاراقشالارىنا تولتىرىپ جاتىر. 23 ناۋرىزعا دەيىن 93 مىڭ ادامنىڭ قولىن جيناۋ جۇكتەلسە، بۇگىنگە دەيىن 35 مىڭنىڭ ۇستىندە داۋىس بەرۋشىلەردىڭ قولىن جيناپ ۇلگەردىك. بۇل شامامەن 50 پايىزدى قۇراپ وتىر. ءقازىر قول جيناۋ جۇمىستارى قىزۋ ءجۇرىپ جاتىر. قۇداي قالاسا 23 ناۋرىزعا دەيىن 120 مىڭداي داۋىس بەرۋشىلەردىڭ قولىن جينايمىز دەپ جوسپارلاپ وتىرمىز. ەسكەرتە كەتەتىنى مەنىڭ كانديداتۋرامدى قولداۋشى ەلەكتوراتتارىمنىڭ 50 پايىزى بەلسەندى جاستار. سونداي-اق، ءتۇرلى رەسپۋبليكالىق بىرلەستىكتەر مەن ۇيىمداردىڭ جەتەكشىلەرى مەنىڭ كانديداتۋرامدى قولداپ وتىر. مىسالى، دوس كوشىم اعامىز باستاعان "ۇلت تاعدىرى" قوزعالىسى، "مەملەكەتتىك ءتىل" ۇيىمى، "جۋرناليستەر قاۋىمداستىعى" سەكىلدى ءبىرقاتار ۇيىمدار ءقازىردىڭ وزىندە قول جيناۋ جۇمىستارىنا ارالاسىپ وتىر. سونىمەن قاتار، مەنى قولداۋشىلاردىڭ قاتارىندا جالپى ۇلتتىق سوسيال-دەموكراتيالىق پارتياسىنىڭ وكىلدەرى مەن «نۇر وتان» پارتياسىنىڭ مۇشەلەرى دە جوق ەمەس. وسىعان بايلانىستى الەۋمەتتىك جەلىلەردە "جسدپ جارىلقاپتىڭ كانديداتۋراسىن ۇسىنىپتى" دەگەن ماعىناداعى اقپاراتتار جاريالانا باستاپتى. بىرىنشىدەن جسدپ بۇل سايلاۋعا قاتىسپايتىنىن، پارتيا اتىنان ەشبىر كانديدات ۇسىنىلمايتىنىن مالىمدەدى. ءبىراق، بۇل پارتيا مۇشەلەرى سايلاۋعا ۇمىتكەرلىك ۇسىنعان ادامدى قولدامايدى دەگەن ءسوز ەمەس قوي. بۇل ۇلكەن سايلاۋ. ءبىر ەلدىڭ باسشىسىن تاڭدايتىن وتە جاۋاپتى ءىس. بۇنداي كەزدە مىندەتتى تۇردە وسىنداي ارانداتۋشى اقپاراتتارمەن شابۋىلداردىڭ جاسالاتىنى بەلگىلى. وسى ماقساتپەن دە مەن بۇگىن باسپا ءسوز ءماسليحاتىن وتكىزىپ وتىرمىن.
نۇرگەلدى ءابدىعاني ۇلى
