22 ناۋرىز. استانا. Qamshy.kz –ۇلىستىڭ ۇلى كۇنى ناۋرىز مەرەكەسىنە وراي استانا قالاسىندا «انسار كرۋيز» كومپانياسى قاجىلارعا ارنايى مەرەكەلىك داستارحان جايدى.

اللا تاعالا قاسيەتتى قۇران كارىمنىڭ «ءالي-عيمران» 97-اياتىندا؛ «مۇندا كەلۋگە شاماسى كەلگەن ادامنىڭ ءبارى اللا ءۇشىن سول ۇيگە (قاعباعا) قاجىلىق جاساۋعا مىندەتتى»،-دەيدى. سوندىقتان دا قاجىلىق – قاسيەتتى بەس پارىزدىڭ ءبىرى. ياعني، داۋلەتى جەتكەن مۇسىلمانداردىڭ مىندەتى. بۇگىن، ەلوردامىزداعى «سۇڭقار» مەيرامحاناسىندا، قاجىلىق پارىزىن وتەۋشى وتانداستارىمىزعا كوپ جىلدان بەرى قىزمەت جاساپ كەلگەن، «انسار كرۋيز» قاجىلىق كومپانياسىنىڭ باسشىسى نۇرجامال تاششانوۆا اپامىزدىڭ باستاماسىمەن، ەلىمىزدىڭ تۇكپىر-تۇكپىرىنەن جينالعان قاجىلار ناۋرىز داستارحانىندا باس قوستى. مەرەكەلىك داستارحانعا ءار جىلدارى استانا، الماتى قالالارى مەن اقمولا، شىعىس قازاقستان، قاراعاندى، پاۆلودار، جامبىل، قوستاناي، ت.ب وبلىستاردان قاسيەتتى مەككە مەن مەدينا قالالارىنا بولىپ قاجىلىق پارىزىن اتقارعان 200-گە جۋىق قاجىلار جينالدى.

اۋەلى، مەرەكەلىك داستارحان جايىپ، يگى ءىس-شارانىڭ ۇيىمداستىرىلۋىنا تۇرتكى بولعان، «انسار كرۋز» قاجىلىق كومپانياسىنىڭ باسشىسى نۇرجامال تاششانوۆا قاسيەتتى پارىز بولعان قاجىلىقتىڭ ءمان-ماڭىزىنا توقتالىپ، جينالعان قاجىلاردى مەن بارلىق قازاقستاندىقتاردى سامارقاننىڭ كوك تاسى جىبىگەن ءاز ناۋرىز مەرەكەسىمەن قۇتتىقتادى. وسىدان كەيىن ەلىمىزدىڭ ءاربىر وبلىستارىنان كەلگەن قاجىلار قۇتتىقتاۋ سوزدەرى سويلەپ، مەرەكەلىك كوڭىل-كۇيلەرىمەن ءبولىسىپ، نۇرجامال اپايعا دەگەن ىستىق ىقىلاستارىمەن ءبولىستى. داستارحان بارىسىندا تاعىلىمدى ءدىني ادەبيەتتەر تاراتىلىپ، «انسار كۋرز» كومپانياسىنىڭ 2014 ج. اكبار قاجىلىقتاعى مەككە-مەدينا قالالارىنداعى قاجىلىق ساپارىنىڭ ارناۋلى ديسكىسى بەرىلدى.