24 ناۋرىز. Qamshy.kz - بۇگىن "Germanwings" اۋە كومپانياسىنا تيەسىلى ا320 ۇشاعى فرانسيانىڭ الپى تاۋىندا اپاتقا ۇشىرادى.  سوڭعى اقپاراتتارعا سۇيەنسەك، بارسەلونادان - ديۋسسەلدورفقا باعىت العان ۇشاقتىڭ بورتىندا  154 ادام بولعان. سونداي-اق، 6 ەكيپاج مۇشەسى بار.

اتالمىش اپاتقا قاتىستى فرانسيا پرەزيدەنتى فرانسۋا وللاند: "ازىرگە ۇشاقتا بولعاندار تۋرالى ناقتى اقپاراتتار دايىن ەمەس. الدىن الا بولجامدار بويىنشا ۇشاق اپاتىنان ءتىرى قالعاندار بولماۋى مۇمكىن. " Germanwings " كومپانياسىنا تيەسىلى ۇشاقتىڭ بورتىندا گەرمانيا ازاماتتارى كوپ بولعان. سونداي-اق، 45 جولاۋشى يسپانيا ازاماتى دەپ تانىلعان"،- دەپ مالىمدەدى.

ال  ۇشاق اپاتىنا بايلانىستى گەرمانيا كانسلەرى انگەلا مەركەل بۇگىنگە جوسپارلانعان بارلىق شارالاردى كەيىنگە شەگەرگەن.

سونىمەن قاتار، اپاتقا ۇشىراعان ا320 اەروبۋسىنىڭ  ىزدەستىرۋ جۇمىستارىنا رف تونەنشە جاعدايلار مينيسترلىگى ارالاسۋعا نيەت بىلدىرگەن.  ءقازىردىڭ وزىندە رف  50-گە جۋىق  حالىقارالىق كلاسستاعى،  ارنايى اپلپينيستيكاعا دايىندالعان،  مامانداندىرىلعان قۇتقارۋشىلاردى جىبەرمەكشى.

ال  ديۋسسەلدورف اۋە جايىنداعىلار قازا بولعاندار مەن ۇشاقتا بولعانداردىڭ ناقتى سانىن بىلمەيتىندىكتەرىن حابارلاعان.

اپاتقا ۇشىراعان "Germanwings" اۋە كومپانياسى  ايگىلى گەرمانيالىق "Lufthansa" كومپانياسىنا تيەسىلى بولعان.  "Lufthansa" كومپانياسىنىڭ باسقارما ءتوراعاسى كارسەن شپور ۇشاق اپاتىنا قاتىستى مالىمەت بەرۋدەن باس تارتقان. "4U 9525 رەيسى بويىنشا بارسەلونادان ديۋسسەلدورفقا باعىت العان ا320 ۇشاعىنا قاتىستى ناقتى اقپارات بەرە المايمىن. ەگەر ءبىزدىڭ بولجامىمىز تۋرا كەلەتىن بولسا، بۇل ءبىز ءۇشىن قارالى كۇن بولماق. اپاتتان ءتىرى قالعاندار بار دەپ ۇمىتتەنەيىك"،-دەدى شپور.

قازىرگە بەلگىلى بولعانداي ۇشاقتا فرانسيا، يسپانيا، رەسەي جانە گەرمانيا ازاماتتارى بولعان.  اپاتقا ۇشىراعان ۇشاقتان ءتىرى قالعانداردى ىزدەستىرۋ جۇمىستارىنا گەرمانيا، فرانسيا جانە رەسەي قۇتقارۋشىلارى جۇمىلدىرىلعان.

ازىرگە نەمىس جانە رەسەيلىك اقپارات قۇرالدارى اپاتقا ۇشىراعان ۇشاق سۋرەتىن جاريالاپ وتىر.

 نۇرگەلدى ءابدىعاني ۇلى