استانا رەسەيدەن قىتايعا تاسمالداناتىن كوگىلدىر وتىن ءترانزيتىن قازاقستان تەرريتورياسى ارقىلى وتكىزۋدى ۇسىندى. بۇل تۋرالى "قامشى" پورتالى "كوممەرسانتقا" سىلتەمە جاساي وتىرىپ حابارلايدى. "قازمۇنايگاز" باسشىسى ساۋات مىڭبايەۆ رەسەيدەن قىتايعا تاسىمالداناتىن گازدى ترۋبانى قازاقستان رەسپۋبليكاسى تەرريتورياسى ارقىلى وتكىزۋدىڭ جولدارىن كورسەتتى. مىڭبايەۆتىڭ ايتۋىنشا، بۇل ءۇشىن قازىرگى تاڭداعى رەسەيدەن قازاقستاننىڭ وڭتۇستىگىنە كوگىلدىر وتىن تاسىمالداناتىن "بۇقارا - ورال" جانە "بوزوي - شىمكەنت" ماگيستراللىن قولدانۋ تيىمدىرەك بولماق. سەبەبى، بۇلار "ورتا ازيا - جۇڭگو" گاز ترۋبالارىنا قوسىلعان. ال بۇل ارقىلى ءقازىر تۇركىمەنستاننان قىتايعا كوگىلدىر وتىن تاسىمالدانۋدا. "قازىرگى تاڭدا "بوزوي - شىمكەنت" كوگىلدىر وتىن تاسىمالداۋ ماگيسترالدەرى اسا ءىرى كولەمدە گاز تاسىمالداۋعا جارامسىز. سەبەبى، اتالمىش ترۋبالاردىڭ قىسىمى تومەن. الايدا قازاقستاننان ورتا ازيا جانە قىتايعا گاز تاسىمالداۋ ءۇشىن "بوزوي - شىمكەنت ترۋبالارىنىڭ قۋاتتىلىعىن كومپرەسسورلىق ستانسيالار ەسەبىنەن 2،5 ميللياردتان 10 ميلليارد كۋبمەترگە دەيىن ارتتىرۋعا بولادى. ءقازىر وسى ماسەلە تالقىلانۋدا. ماقۇلدانۋى بەك مۇمكىن بۇل جوبا قولعا الىنسا، ەشقانداي دا جاڭا ترۋبالار ەمەس، بۇرىنعى جولدار، ياعني، قازاقستان اۋماعى ارقىلى ەركىن تاسىمالداۋعا مۇمكىندىكتەر تۋادى. الداعى ۋاقىتتا رەسەي گازىن قازاقستان ارقىلى قىتايعا تاسىمالداۋ ءۇشىن ءبىز اتالمىش باعىتتا شاعىن كومپرەسسورلىق ستانسيالار ورناتۋدامىز. "،- دەيدى "قازمۇنايگاز" باسشىسى ساۋات مىڭبايەۆ. قازاقستاننىڭ كوتەرگەن باستاماسىنا قاتىستى رەسەيلىك "گازپروم" قانداي دا ءبىر مالىمدەمە بەرگەن جوق. الايدا بۇل باستاما رەسەي ءۇشىن ءتيىمسىز بولۋى مۇمكىن. رەسەيلىك جانە قىتايلىق ساراپشىلار گاز تاسىمالداۋ ىسىنە قازاقستاننىڭ ترانيتتىك زونا رەتىندە ارالاسۋىنا قارسى ەكەندەرىن بىلدىرگەن. ەسكە تۇسىرە كەتەيىك، جاقىندا "گازپروم" رەسمي تۇردە پەكينمەن "سيلا سيبيري" كوگىلدىر وتىن تاسىمالداۋ ماگيسترالىنىڭ قۇرىلىسىن باستاۋ تۋرالى كەلىسىمگە كەلگەن ەدى. اتالمىش قۇرىلىس ناتەجيەسىندە رەسەي گازى باتىس باعىت، التاي ارقىلى تىكەلەي قىتايعا جەتكىزىلەتىن ەدى. ال بىلتىرعى جىلدىڭ جازىندا استانا اتالمىش باعىتتاعى گاز ترۋباسىنىڭ قۇرىلىسىن استانادان وڭتۇستىككە قاراي، قورعاس بەكەتى ارقىلى قىتايعا تاسىمالداۋدى ۇسىنعان بولاتىن.

نۇرگەلدى ءابدىعاني ۇلى