بۇگىن قازاقستان مەن وزبەكستان شەكاراسىنان زاڭسىز قارۋ الىپ وتپەك بولعان ەكى ازامات ۇستالدى، دەپ "قامشى" پورتالى ق ر ۇقق شق باسپا ءسوز قىزمەتىنە سىلتەمە جاساي وتىرىپ حابارلايدى.

ۇقق مالىمدەمەسىندە ايتىلعانداي، قازاقستان مەن وزبەك  شەكاراسىندا ورنالاسقان  "قاقپاق" مەملەكەتتىك شەكارا زاستاۆاسىنىڭ قاتارداعى جاۋىنگەرى شەكارالىق ايماقتى باقالاۋ بارىسىندا كۇدىكتى ەكى ادامدا بايقاعان. "قاقپاق" شەكارا زاستاۆاسىندا كەلىمىسشارت بويىنشا قىزمەت ەتەتىن قاتارداعى داۋىنگەرلەر ۋ.جۇماحوۆ پەن ن.ءابدىراشوۆ دەرەۋ راسيا ارقىلى راديوستانسياعا حابارلاعان. زاستاۆانىڭ باستىعى، كاپيتان ت.جاقىپوۆ جەتەكشىلىك ەتكەن  "دابىل" ارنايى جاساعى كەلگەندە، شەكارانى زاڭسىز باسىپ وتپەك بولعان كۇدىكتىلەر ەكى جاققا قاشا جونەلگەن. ارنايى جاساق بىرەۋىن تەز ارادا قۇرىقتاعىنىمەن، ەكىنشىسى قارۋلى شابۋىل جاساپ، قارسىلىق كورسەتكەن. سول كەزدە، زاستاۆانىڭ اعا سەرجانتى ن.ايداروۆ ءوز ومىرىنە ءقاۋىپ ءتونىپ تۇرعانىنا قاراماستان، ارنايى ادىستەر قولدانۋ ارقىلى  قاراقشىنى زالالسىزداندىرعان.

كەيىن بەلگىلى بولعانداي، ۇستالعانداردىڭ بىرەۋى 30 جاستاعى  قازاقستان ازاماتى بولسا، ەكىنشىسى 35 جاستاعى وزبەكستان ازاماتى بولىپ شىققان جانە ولار اعايىندىلار ەكەنى انىقتالعان.

مەملەكەتتىك شەكارادا قارۋلى شابۋىل جاساپ، زاڭسىز قارۋ الىپ وتپەك بولعانداردى تەرگەۋ بارىسىندا، ولاردىڭ وزبەكستان رەسپۋبليكاسىندا زاڭسىز قارۋ ساقتاعانى جانە ۇرلىق جاساعىنى ءۇشىن ءىستى بولعاندىقتارى انىقتالعان.

اتالمىش وقيعاعا قاتىستى  ق ر قىلمىستىق كودەكسىندە كورسەتىلگەندەي، "ق ر مەملەكەتتىك شەكاراسىنان زاڭسىز وتپەك بولعان جانە قۇزىرلى ورگان قىزمەتكەرىنە قارسىلىق تانىتقانى" ءۇشىن قىلمىستىق ءىس قوزعالعان.

نۇرزات توعجان