26 ءساۋىر - ەلىمىزدە كەزەكتەن تىس پرەزيدەنت سايلاۋى وتەدى.  پرەزيدەنت سايلاۋى بولادى دەگەننەن باستاپ دايىندىقتار باستالىپ كەتتى. جەر-جەردە ۇگىت-ناسحات جۇمىستارى جالعاسۋدا. بۇل سايلاۋعا شەت ەل ازاماتى بولىپ جۇرگەن 5 ميلليون قازاق تا ەلەڭدەپ، ەل ەرتەڭىنە الاڭداپ، ۇلت كوشىندە جۇك قالتىرماس نار تۇلعاسىنىڭ ەلگە باسشى بولۋىن قالاپ وتىر.

جاقىندا عانا «قامشى-اقپارات» پورتالى «قازاق حاندىعىنىڭ 550 جىلدىعىن» ەل كولەمىندە ۇلكەن مەركەلىك شارامەن تويلاپ، ەلدىڭ ءىشى-سىرتىنان قازاقتىڭ نار قاسقا ازاماتتارىن شاقىرىپ، ۇلتى ءۇشىن جاساعان ەڭبەكتەرىنىڭ ماراپاتىن بەرگەن ەدى. بۇل شاراعا قحر-دا تۇراتىن قانداسارىمىز دا ارنايى كەلدى. ول كىسىلەر «قازاق حاندىعىنىڭ 550 جىلدىق» مەدالىمەن ماراپاتتالعان ۇلت قايراتكەرلەرىنىڭ ىشىندە ءماجىلىس دەپۋتاتى نۇرتاي سابيليانوۆ مىرزا بارىن ەستىپ، كەزدەسىپ جاتساق سىرتتاعى ەل تىلەگىن اۋىزبا-اۋىز ايتارمىز دەپ قاتتى قۋانعان ەدى. وكىنىشكە وراي، نۇرتاي مىرزا سايلاۋعا بايلانىستى جۇمىستارىنىڭ قاربالاستىعىمەن بۇل شاراعا كەلە المادى.

شەتتەگى اعايىننىڭ ايتار سالەمى ۇكىمەت 8 اي جاساپ، پارلامەنتتىڭ 3 اي قاراپ ءالى ءبىر شەشىمىن شىعارا الماعان «كوشى-قون تۋرالى» زاڭعا جاسالاتىن وزگەرتۋلەر مەن تولىقتىرۋلار ەدى. شەتتەگى اعايىن بۇل جولعى ەل پرەزيدەنتىن سايلاۋعا ۇلگەرىپ قاتىسا الالماساق تا، سايلاۋعا دەيىن زاڭ قابىلدانىپ ەلباسىمىزدىڭ قولى قويلىپ، كەلەر جىلعى پارلامەنت سايلاۋىنا ءوز داۋىسىمىزدى بەرەتىندەي كۇنگە جەتسەك دەيدى.

ءيا، بۇل سىرتتاعى 5 ميلليون قازاق پەن ەل ەرتەڭىنە الاڭداپ وتىرعان بارشا قازاقتىڭ تىلەگى. "ماڭگىلىك ەل" مۇراتىمىزعا جەتۋ جولىندا بىزگە ءار قازاق قىمبات، «ءار قازاق ءبىزدىڭ جالعىزىمىز». تاۋەلسىز ەلىمىزدى ءتۇرلى ىشكى-سىرتقى الابوتەن كۇشتەردەن قورعاۋ ءۇشىن قازاقتىڭ ساندىق جانە ساپالىق جاعىنان ارتۋى ماڭىزدى. سان بولماي، ساپا بولمايتىنى تاعى انىق. سوندىقتان ەل ەرتەڭىنە ماڭىزدى شەشىمدەر جاسالعالى جاتقاندا وسىنداي كەلەلى ىستەردى بىرگە اتقارىپ كەتكەن ءجون بولار.

دەنساۋلىق ساقتاۋ جانە الەۋمەتتىك دامۋ مينيسترلىگى ازىرلەگەن زاڭ جوباسى وسى جىلدىڭ 6 قاڭتارىندا پارلامەنت تابالدىرىعىن اتتاعان ەدى. ءبىر وقىلىمنان سوڭ ازداپ سىن-پىكىرلەر ايتىلعان سوڭ ۇشتى-كۇيلى جوق بولدى. شىنىندا، بۇل زاڭ پارلامەنت پەن ۇكىمەتتىڭ اراسىندا شاقپىلاپ ءجۇرىپ جوعالىپ كەتپەسە يگى. ال، ىشتەگى جانە سىرتتاعى قانداس اعايىن كوشى-قون تۋرالى زاڭ جايلى حاباردى ءار تاڭ سايىن ەلەڭدەپ كۇتىپ وتىر.

قازاقتىڭ ۇلى كوشىن 23 جىل بۇرىن ەلباسى نۇرسۇلتان نازاربايەۆ باستاپ ەدى. ال بۇگىن سول كوش پارلامەنتتىڭ قولىندا تۇر. الدا سايلاۋ، پارلامەنت ەلباسىمىز ن. نازاربايەۆتى شىنىمەن قولداسا، كوپ كۇتتىرمەي «كوشى-قون تۋرالى» زاڭدى پرەزيدەنتتىڭ سايلاۋ الدى باعدارلاماسى رەتىندە قابىلداپ، سايلاۋدا ەلباسىمىزعا ءوز قولداۋلارىن ءبىلدىرۋى كەرەك.

تۇردىبەك قۇرمەتحان