قىرعىزستان رەسپۋبليكاسىنىڭ پرەزيدەنتى المازبەك اتامبايەۆ ءوزىنىڭ جەكە مەنشىگىنە تيەسىلى جەر تەلىمىن مەشىت قۇرىلىسىنا ارنادى. بۇل تۋرالى قىرعىز پرەزيدەنتىنىڭ باسپا ءسوز قىزمەتى حابارلاعان.

باسپا ءسوز قىزمەتىنىڭ اقپاراتىندا، جاڭا مەشىت 2010 جىلى ءساۋىر وقيعاسى كەزىندە قازا بولعان قىزعىزستان ازاماتتارىنىڭ قۇرمەتىنە سالىنۋدا. ول ءۇشىن قىرعىز پرەزيدەنتى المازبەك اتامبايەۆ 1990 جىلدارى جەكەشەلەندىرىپ العان، بىشكەكتىڭ 7ء-شى شاعىن اۋدانىنداعى جەر تەلىمىن ۇسىنىپ وتىر دەلىنگەن.

"7ء-شى ءساۋىر شەيىتتەرى" مەشىتىنىڭ قۇرىلىسى قىرعىز پرەزيدەنتىنىڭ مۇرىندىق بولۋىمەن باستالىپ كەتكەن. مەشىت قۇرىلىسىنىڭ اشىلۋى سالتاناتىندا قىرعىزستان پرەزيدەنتى المازبەك اتامبايەۆپەن بىرگە ەلدەگى ءتۇرلى قوعامدىق ۇيىم باسشىلارى، ب ا ق وكىلدەرى مەن شەيىت بولعان ازاماتتارىدىڭ تۋىستارى قاتىسقان.

ەسكە تۇسىرە كەتسەك، 2010 جىلدىڭ ساۋىرىندە قىرعىزستاندا مەملەكەتتىك ريەۆوليۋسيا ورىن الىپ، جاپپاي تارتىپسىزدىكتەر كەزىندە 87 ادام قازا بولعان جانە 100-دەگەن ادام ءتۇرلى دەنە جاراقاتتارىن العان بولاتىن. اتالمىش ريەۆوليۋسيانىڭ جالعاسى ۇلتارالىق جانجالعا ۇلاسىپ، ەلدىڭ وڭتۇستىگىندە قىرعىزدار مەن وزبەكتەر اراسىندا الاۋىزدىق وتى تۇتانعان. بۇل ۇلتارالىق جانجالدار كەزىندە 400-دەن استام ادام قازا بولىپ، 2000-نان استام ادام جاراقاتتانعان ەدى. قىرعىز بيلىگىنە اتامبايەۆ كەلگەننەن سوڭ، 7ء-ساۋىر قىرعىزستاندا قارالى كۇن اتانىپ، سول كۇنى ريەۆوليۋسيا قۇرباندارىن ەسكە الۋ كۇنى بولىپ جاريالانعان.