جاقىندا استانا قالاسىندا «KATEV» حالىقارالىق قوعامدىق قورىنىڭ ۇيىتقى بولۋىمەن جىل سايىنعى "جارقىن بولاشاق" قازاق ءتىلى وليمپياداسى مارەسىنە جەتتى. بۇل تۋرالى "قامشى" پورتالى حابارلايدى.

بيىل جەتىنشى رەت وتكىزىلىپ وتىرعان "جارقىن بولاشاق" قازاق تىلىنەن ءبىلىم بايگەسىنىڭ اقتىق مارەسىندە قازاقستاننىڭ وبلىستارى مەن ايماقتارىنان كەلگەن 7-11 سىنىپ وقۋشىلارى 5 كونكۋرس بويىنشا، ياعني، تىلشى-ادەبيەتشىلەر، ءانشى-بۇلبۇلدار، جاس عالىمدار، ءسوز شەبەرلەرى جانە جازۋشىلار باعىتتارى بويىنشا ب ا ق سىناستى.

بيىلعى رەسپۋبليكالىق وليمپيادانىڭ قورىتىندى باسەكەسىنە جۇزدەن جۇيرىك، مىڭنان سۋىرىلىپ شىققان 171 وقۋشى قاتىسىپ، ءبىلىم بايگەسىنەن وزا شاۋىپ، جۇلدەگەر اتانعان وقۋشىلارعا وليمپيادالىق مەدال جانە باعالى سىيلىقتار تابىستالدى. سونداي-اق، جۇلدەلى 1، 2، 3 ورىن يەگەرلەرىنە ەلىمىزدەگى بەدەلدى سانالاتىن جوو-نىڭ 29 ءبىلىم گرانتتارى تابىس ەتىلدى.

ءۇش كۇنگە سوزىلعان ءبىلىم بايگەسىنىڭ قورىتىندى گالا-كونسەرتى استانا قالاسىندا "قازمەديا" ورتالىعىندا ءوتتى.

"جارقىن بولاشاق" قازاق ءتىلى وليمپياداسىنىڭ جابىلۋى سالتاناتىنا ق ر پارلامەنتى دەپۋتاتتارى مەن قوعام قايراتكەرلەرى، قازاقستاننىڭ وبلىستارىنان ارنايى كەلگەن قوناقتار مەن الىس-جاقىن شەت ەلدەردەن سىيلى مەيماندار قاتىستى. سونداي-اق، ءبىلىم وليمپياداسىنىڭ جابىلۋى سالتاناتىندا قازاقستان رەسپۋبليكاسىنىڭ ءبىلىم جانە عىلىم ۆيسە-مينيسترى ن.يمانعالييەۆ مىرزا ساحنا تورىنە شىعىپ، ق ر پرەمەر-مينيستردىڭ ورىنباسارى ب.م.ساپاربايەۆتىڭ قۇتتىقتاۋ حاتىن جەتكىزدى.

نۇرگەلدى ءابدىعاني ۇلى