ومىردە ەشبىر وقيعا سەبەپسىز بولمايدى. سول سەكىلدى مەنىڭ جۇبايىممەن تانىسۋعا ونەر سەبەپشى بولدى. تولقىن ەكەۋمىزدى تابىستىرعان تەمىربەك جۇرگەنوۆ اتىنداعى ونەر اكادەمياسى. ونى العاش رەت وسى قارا شاڭىراقتا كەزدەستىرگەن ەدىم. اقىلىنا كوركى ساي قىزعا كىم ىنتىق بولماسىن؟ ستۋدەنتپىز، البىرت كەزىمىز، جاستىقتىڭ جالىنىمەن تولقىندى ءبىر كورگەننەن ۇناتتىم. جولىعىسا قالساق ەكەۋمىزدىڭ اڭگىمەمىز جاراسا كەتەتىن. مەن حالىق ءارتىسى تىلەكتەس مەيراموۆتىڭ شاكىرتى بولسام، ول حالىق ءارتىسى ەسمۇحان وبايەۆتان ءدارىس الدى. 1997 جىلى وقۋدى ءتامامداپ، «تاماشا» ويىن -ساۋىق وتاۋىندا رەداكتور ءارى اكتەر بولىپ قىزمەت جاسادىم. وسى كەزدە تولقىن 2-كۋرستا وقىپ جۇرەتىن. 1998 جىلى «تاماشانىڭ» 20 جىلدىق مەرەيتويىنداعى ۇلكەن كونسەرتتە لۇقپان ەسەنوۆ اعامىز ونىڭ ونەردەگى تۇساۋىن كەستى. ونەر باسپالداعىنىڭ ءدال وسى تەاتردان باستالعانىنا جانە ءبىر ۇجىمدا جۇمىس ىستەيتىنىمىزگە قاتتى شاتتاندىم. ول دراما تەاتردا جۇمىس ىستەۋدى ارماندايتىن. شىعارماشىلىعىنىڭ كەنەتتەن ساتيرا جانرىنا بۇرىلىپ كەتكەنىن ءوزى دە بايقاماي قالسا كەرەك. وسىلايشا وقۋ مەن جۇمىستى قاتار الىپ ءجۇردى. قازاقستاننىڭ بارلىق وبلىستارىن ارالاعان «تاماشانىڭ» گاسترولدىك ساپارلارى ەكەۋمىزدى ودان سايىن جاقىنداستىرا ءتۇستى.
ءساعادىلدا ءۇسىپالى، اكتەر: «مۋزارتتىڭ» تۇساۋى ءبىزدىڭ تويدا كەسىلىپ، اتاۋىن دا ءوزىم قويعانمىن»
تولقىن ەكەۋمىزدىڭ قىز بەن جىگىت بولىپ جۇرگەن ارالاستىعىمىز بىرنەشە جىلدان كەيىن، ياعني 2001 جىلى وتباسىن قۇرۋعا ۇلاستى. الماتىدا ەلدىڭ ەسىندە قالعان دۇركىرەتىپ توي وتكىزدىك. قازاقستان ەستراداسىنىڭ جۇلدىزدارى كوپتەپ اتسالىسقان كەرەمەت توي بولعانىن ءالى كۇنگە دەيىن ساعىنىشپەن ەسكە الامىز. بەتاشاردى قازاقتىڭ ارداقتى اقىنى، دوسىمىز، مارقۇم ءورازالى دوسبوسىنوۆتىڭ سۋىرىپ سالىپ ايتقان توكپە جىرلارىمەن اشقانى دا كۇنى كەشەگىدەي. تويىمىزدىڭ تاعى ءبىر جارقىن ەستەلىگى سول كەشتە «مۋزارت» توبىنىڭ تۇساۋى ءبىزدىڭ ۇيلەنۋ تويىمىزدا كەسىلىپ، توپتىڭ اتاۋىن قويۋ باقىتى دا ماعان بۇيىرعان ەدى.
2003 جىلى تۇڭعىش قىزىمىز ايشا دۇنيەگە كەلدى. ال، 2006 جىلى ۇلىمىز ايقىنجارىق ءومىردىڭ ەسىگىن اشتى. ال، 2012 جىلى الماتىدان استاناعا قونىس اۋداردىق. استاناعا كەلگەننەن كەيىن ارۋ دەگەن قىزىمىز تۋىلدى. اللاعا شۇكىر، وتاسقان جىلداردان بەرى بىر-بىرىمىزبەن جامان سوزگە كەلمەي وتباسىنىڭ ءتۇتىنىن ءتۇزۋ شىعارۋعا بەكىنگەنبىز. قۇداي قوسقان قوساعىم بۇگىندە «شالقار» ۇلتتىق ارناسىندا رەداكتور-جۇرگىزۋشى بولىپ قىزمەت ەتىپ كەلەدى. ومىردە دە، ونەردە دە جۇبىمىز جازىلماي كەلە جاتقانى ۇلكەن سىيلاستىقتىڭ، ماحابباتتىڭ جەمىسى دەپ بىلەمىن.
اينۇر وڭعارباي
