سوڭعى كەزدەرى الەۋمەتتىك جەلى بەتتەرىندە قازاق اقىندارى مەن كۇيشىلەرىنىڭ شىعارمالارىن ارزان كۇلكىگە، ەرسى ەرمەككە، ءارىسى كەلەمەجگە اينالدىرۋشىلار جيىلەپ بارادى. اۋەلگىسى قازاق تويلارىندا اتاقتى كۇيشى قۇرمانعازى ساعىرباي ۇلىنىڭ "اداي" كۇيىن ايەلدىڭ اۋەرتتى جەرىنە بالاپ، شوۋ جاساعاندا جاعامىزدى ۇستاپ، مۇنداي باسسىز ارەكەتكە بارعاندار جازالانۋى ءتيىس دەدىك. ايتىلعان ءسوز ايتىلعان جەرىندە قالدى. قۇزىرلى مەكەمەلەردەگىلەردەن "ءلام-ميم" دەگەن جان تابىلمادى. وسىعان بايلانىستى "قامشى" پورتالىندا "قۇرمانعازىنىڭ كۇيىن ماقازتاعاندار جاۋاپقا تارتىلۋى ءتيىس" دەگەن ماقالا جارىق كوردى، ءارى ول ەشقاشان وزەكتىلىگىن، ماڭىزدىلىعىن جويمايدى.

جالپاق جۇرت بولىپ ءجۇرىپ، اتاقتى كۇيشىنى ارزان كۇلكى، ەرسى كەلەمەجگە ەرمەك قىلعان اسابانى جازالاي الماي جۇرگەنىمىزدە قازنەتتە تاعى ءبىر ەسەرسوق پايدا بولىپتى.

"اتىڭ شىقپاسانىڭ" كەرىن قىلعان بۇل جىگىت، اناۋ-مىناۋدى قويىپ، قازاقتىڭ باس اقىنى سانالاتىن ابايدىڭ "ايتتىم سالەم، قالامقاس" ءانىن قورلاعان.

قورلاعان. ءبىز قورلادى دەپ باجايلاعانىمىزبەن، ءانشى سىماق جىگىت مۇنى ولاي قابىلدامايدى ەكەن.

ءساۋىردىڭ 4ء-ى كۇنى ۋكراينا استاناسى كييەۆ قالاسىندا وتكەن  "ۋكراينا دارىنداردى ىزدەيدى" («ۋكراїنا ماє تالانت-7″) جوباسىنىڭ جەتىنشى كەزەڭىنە، كاستينگكە بارعان قازاقستاندىق رەپەر-انشى تاكەجان وتەعالييەۆ بىلدەي ۋكراينا ساحناسىنان قازاق اقىنىنىڭ ليريكالىق تۋىندىسىن جىن-ويناق قىلعان.

وعان ءماز بولعان زالداعى كورەرمەندەر مەن قازىلار القاسى رەپەردى شوۋدىڭ ەكىنشى كەزەڭىنە وتكىزىپ جىبەرگەن. ال، جەكەلەگەن مۇددەنى كوزدەيتىن، كەيبىر قازاقستاندىق ب ا ق "قازاقستاندىق رەپەر ۋكراينالىقتاردى تاڭ قالدىردى" دەپ جازىپ، ءانشىسىماقتى اسپەتتەپ-اق جاتىر. ۇستىنە قازاقتىڭ ۇلتتىق شاپانى مەن بورىك كيىپ شىققان تاكەجان وتەعالييەۆ ءاندى وتە كەرەمەت ورىندادى، ەنەرگەتيكاسى مول ەكەن دەگەن سىڭارجاق ماقتاۋلار مەن قوشەمەتكە ماسايىپ قالعان تاكەجاننىڭ ءوزى دە نەلىكتەن ابايدىڭ ءانىن ءارىن كەتىرە ورىنداعانىن ءتۇسىندىرىپ باققان.

"اقىننىڭ بۇل ءانى ماحاببات جايلى. ءبىراق، ماحابباتتىڭ ەكى جاعى بولادى عوي. مەن بۇل ليريكالىق ءاندى جاستاردىڭ ستيلىندە ديناميكاسىن جوعارىلاتىپ ورىندادىم"،-دەيدى تاكەجان.

دۇنيەنىڭ جەر-جەرىنەن تالانتتاردى ىزدەيتىن شوۋدىڭ قازىلارى ۆلاديسلاۆا يامى، سلاۆا فرولوۆا جانە يگوريا كوندراتيۋك تاكەجانعا العىستارىن ايتىپ، شوۋدىڭ كەلەسى كەزەڭىنە وتكىزىپ جىبەرگەن. ال وتەعالييەۆتىڭ ءوزى بولسا، كەلەسى كەزەڭدە قانداي كومپازيسيا ورىندايتىنىن بىلمەي باسى دال بولىپ ءجۇر.

بۇل ءبىرىنشى مارتە ورىن الىپ وتىرعان ماسەلە ەمەس. قازاق ونەرىنىڭ التىن جاۋھارلارى ءبىرىنىڭ ارتىنان ءبىرى قورلانىپ جاتقاندا، مۇنداي باسسىزدىقتارعا بەي-جاي قاراپ وتىرۋعا بولماس. كىم ءبىلسىن، ەرتەڭ وتەعالييەۆ شوۋدىڭ ەكىنشى كەزەڭىندە تاعى ءبىر قازاق اقىنىىنىڭ شىعارماسىن مازاققا اينالدىرۋى ابدەن مۇمكىن عوي؟!

نۇرگەلدى ءابدىعاني ۇلى