الماتى وبلىسىنىڭ تۇرعىنى ءوزىنىڭ يدەياسىن الىپ، كەيىن اقىسىن بەرمەي كەتكەنى ءۇشىن بايان ەسەنتايەۆانى ايىپتادى.
«ەسەنتايەۆا اقىمدى جەدى» دەگەن ازاماتتىڭ اڭگىمەسىن NUR.KZ ءتىلشىسى تىڭداپ قايتقان ەدى.
مىنا سۋرەتتەگى جىگىتتىڭ ەسىمى — رينات كاريموۆ. رينات الماتى وبلىسىنىڭ تۋماسى. بۇگىندە ول بەلگىلى اكتريسا، ءانشى، پروديۋسەر بايان ەسەنتايەۆانى «ۋادەسىندە تۇرمادى» دەپ ايىپتاپ وتىر.
«مەن 2012 جىلى «تراكتورشىنىڭ ماحابباتى» فيلىمىندە كورسەتىلگەن نەگىزگى ويدى بايان ەسەنتايەۆاعا تەلەفون ارقىلى بايانداپ بەردىم. فيلمدەگى وقيعا جەلىسى مەن كەيىپكەرلەر — مەنىڭ يدەيام. ەسەنتايەۆاعا مەنىڭ ايتقاندارىم ۇنادى. ول فيلم شىققان سوڭ، نەگىزگى تابىستىڭ 30 پايىزىن بەرەمىن دەپ ۋادە ەتتى. بايان حانىم ءوزىنىڭ الماتىدا ەمەستىگىن ايتىپ، قالاعا كەلگەندە كەلىسىمشارتقا وتىراتىنىن ايتتى. الايدا، سول كۇننەن بەرى تەلەفون تۇتقاسىن كوتەرگەن ەمەس»، — دەيدى رينات.
رينات كاريموۆ ءوزىنىڭ ماتەريالدىق جاعدايى تومەن ەكەنىن، اناسىن شۇعىل اۋرۋحاناعا جاتقىزۋ قاجەتتىگىن ايتادى.
ال بايان ەسەنتايەۆانىڭ وزىنە حابارلاسقانىمىزدا، ول سۇراعىمىزدى ەستىگەن سوڭ ءبىراز كۇلىپ الدى. سودان كەيىن «سىزدەر جۋرناليستەر قىزىقسىزدار. مەنىڭ ونداي اداممەن مۇلدە بايلانىسىم جوق. ءبىراز ۋاقىت بولدى، سول جىگىت مەنى جامانداپ بىرنەشە ءجۋرناليستىڭ باسىن قاتىردى. مەن سىزگە ايتسام، ول — اقشا جاساعىسى كەلىپ، اشىعىپ جۇرگەن كەدەي، جاعدايى جوق جىگىت. ەرتەڭ تاعى ءبىر جىندى بولماشى جايتتى ايتىپ، مەنى جامانداعىسى كەلسە، سونى دا جازاسىزدار ما؟»، — دەپ وزىمىزگە سۇراق قويدى. رينات كاريموۆتىڭ وزىنەن قانداي دا ءبىر دالەل سۇراعانىمىزدا ەشتەڭە كورسەتە المايتىنىن ايتتى.
«قولىمدا ەشقانداي دالەلىم جوق. قۇقىعىمدى زاڭداستىرامىز دەگەن كەزدە بايان ەسەنتايەۆا تەلەفونىن كوتەرمەي قويدى. ول قاتەلەسىپ وتىر. ءفيلمنىڭ جارتىسى ەفيرگە شىققانىمەن، ءالى اياقتالعان جوق. ەگەر ول مەنىڭ اقىمدى تولەسە، كينونىڭ قالاي ءتامامدالارىن تۇسىندىرەر ەدىم»، — دەيدى رينات.
