وتكەندە ءماجىلىس دەپۋتاتى ايقىن قوڭىروۆ باستاعان قكحپ فراكسياسىنىڭ دەپۋتاتتارى پرەمەر-مينيستر باقىتجان ساعىنتايەۆتىڭ جانە ۇلتتىق بانكتىڭ ءتوراعاسى دانيار اقىشيەۆتىڭ اتىنا دەپۋتاتتىق ساۋال جولداپ، تەڭگە كۋرسىنىڭ تومەندەۋىنە سايكەس حالىقتىڭ زەينەتاقى قورىنداعى (بجزق) سالىمى مەن بانكتەردەگى تەڭگەمەن سالىنعان دەپوزيتتەرىن يندەكساسيالاۋ كەرەكتىگى تۋرالى ايتىپ دەپۋتاتتىق ساۋال جولداعانىن جازعانبىز.

سوعان جۋىردا ۇكىمەتتەن دە، ۇلتتىق بانكتەن دە جاۋاپ كەلدى. كەلگەنى نە كەرەك، ەكەۋى دە اۋىزدارىن قۋ شوپپەن ءسۇرتىپ، جارىتپادى.  دەپۋتات يندەكساسيالاۋ كوزدەرىن دە كورسەتىپ بەرگەنىن ەسكە سالا كەتەيىك. «ءقازىر مۇناي باعاسى 80 دوللارعا جاقىندادى. ال تەڭگەنىڭ 1 دوللارعا شاققانداعى كۋرسى 380-گە جاقىندادى دەسەك، وسىنىڭ ناتيجەسىندە ءاربىر باررەل مۇناي كومپانيالارىنا 30 400 تەڭگە تازا تابىس اكەلەدى. ءسويتىپ، ارتىق شىعىنسىز، تەك تەڭگە كۋرسىنىڭ وزگەرۋىمەن عانا مۇناي كومپانيالارى جالپى ەل بويىنشا تريلليون تەڭگەگە جۋىق قوسىمشا تازا پايدا كورىپ وتىر. وسىنىڭ ءوزى حالىقتىڭ زەينەتاقى قورى مەن دەپوزيتتەگى سالىمدارىن يندەكساسيالاۋعا ەركىن جەتەر ەدى،»- دەگەن بولاتىن دەپۋتات.

ۇكىمەتتىڭ جاۋابىندا بۇل ماسەلەنى اۋىزعا الۋدىڭ وزىنەن قورىققان سياقتى. ويتكەنى جاۋابىندا مۇناي سالاسىنان تۇسەتىن تابىستىڭ ءبارى ۇلتتىق قورعا باعىتتالاتىنىن، ال ونىڭ اقشاسىنا ۇكىمەت ءقايسىبىر قاۋلىلارعا سايكەس تيىسە المايتىنىن جازىپتى. جالعىز-اق «باس دەسە قۇلاق» دەگەندەي بولىپ  جۇرتتىڭ ءبارى بىلەتىن - بجزق-نىڭ ءوزى جوبالارعا ينۆەستيسيا قۇيۋ ارقىلى تابىس تاباتىنىن كورسەتىپتى... ال دەپوزيتتىك سالىمدارعا بايلانىستى ايتقاندا، حالىقتىڭ ءوزى ولاردىڭ ساقتالۋى ءۇشىن ارەكەت ەتۋى كەرەك دەگەنگە توقتاپتى. ءسويتىپ، ۇلتتىق قورعا باعىتتالعان ۇستەمە تابىستىڭ ءوزىن حالىققا بەرۋگە شاماسى جوق ەكەنىن بىلدىرگەن.

ال ۇلتتىق بانك ءتوراعاسى د.اقىشيەۆ جاۋابىن «قازاقستان رەسپۋبليكاسى ازاماتتارىنا جيناقتاۋشى زەينەتاقى جۇيەسىندەگى جيناقتارىنىڭ ينفلياسيا ناتيجەسىندە قۇنسىزدانۋدان ساقتالۋىنا كەپىلدىك بەرەدى» دەپ باستاپتى. سويتسە، ول كەپىلدىك بىلاي ەكەن. ءبىر ادام زەينەتكە شىقسا، ونىڭ سالىمى سول ۋاقىتتاعى ينفلياسيا دەڭگەيىنە سايكەس كوبەيتىلەدى ەكەن. ال ول ادامنىڭ سالىمى ءوزى زەينەتكە شىققانعا دەيىنگى 5-6 نەمەسە ودان كوپ جىلداردا تيىنعا اينالىپ كەتەتىنىنە ۇلتتىق بانك باس اۋىرتپايتىن سياقتى...

ال دەپوزيتتەرگە قاتىستى جاۋاپتا بىلاي جازىلعان: «قازاقستان ازاماتتارىنىڭ جيناق اقشالارىن قانداي ۆاليۋتادا ساقتاۋىنا قاتىستى تاڭداۋ قۇقىعى بار. ازاماتتار ەكىنشى دەڭگەيدەگى بانكتەردە ۇلتتىق ۆاليۋتادا دا، شەت مەملەكەتتەردىڭ ۆاليۋتاسىندا دا دەپوزيتتەر اشا الادى، بۇل جيناق اقشانى وزدىگىنەن ءارتاراپتاندىرۋعا مۇمكىندىك بەرەدى». ءسويتىپ، جاۋاپتا ءوز اقشالارىڭدى ساقتاعىلارىڭ كەلسە، شەتەلدىك ۆاليۋتامەن جيناقتاۋعا مۇمكىندىگىڭ بار دەگەندى ايتادى ءتوراعا.

مىنە، حالىققا جانى اشيتىن ۇكىمەتىمىز بەن ۇلتتىق بانكىمىزدىڭ جاۋابى وسىنداي بولىپتى.

س.ەلەۋ، ساراپشى