بۇگىن ياعني 29 قاراشا كۇنى استاناداعى ءماجىلىس ۇيىندە پارلامەنت ءماجىلىسىنىڭ دەپۋتاتى، «Qazaqstan ardagerleri» قاۋىمداستىعىنىڭ ءتوراعاسى، بەلگىلى قوعام قايراتكەرى، جازۋشى، اقىن باقىتبەك سماعۇلدىڭ «نۇرسۇلتان نازاربايەۆ.التىن عاسىر» اتتى كىتابىنىڭ تۇساۋكەسەر سالتاناتى ءوتتى.
ءىس-شارا ۇلتىمىزدىڭ ۇلىق مەرەكەلەرى – «تۇڭعىش پرەزيدەنت كۇنىنە» جانە «تاۋەلسىزدىك كۇنىنە» ارنالىپ وتىر. تۇساۋكەسەر راسىمىنە ءماجىلىس پەن سەنات دەپۋتاتتارى، سونداي-اق پرەزيدەنت اكىمشىلىگىنىڭ، ءبىرقاتار ورتالىق مەملەكەتتىك ورگانداردىڭ، زيالى قاۋىمنىڭ وكىلدەرى، ۇكىمەتتىك ەمەس ۇيىمدار جەتەكشىلەرى قاتىستى.
سالتاناتتى راسىمدە سەنات ءتوراعاسىنىڭ ورىنباسارى بەكتاس بەكنازاروۆ، ءماجىلىس ۆيسە-سپيكەرى گۇلميرا يسيمبايەۆا جانە باسقا دا مارتەبەلى قوناقتار ءسوز سويلەدى.
ب.سماعۇلدىڭ كوركەم تىلمەن جازىلعان بۇل عىلىمي زەرتتەۋ ەڭبەگى ءىرى 7 تاراۋدان تۇرادى. ءار تاراۋ ەلباسى-قازاقستاننىڭ تۇڭعىش پرەزيدەنتى نۇرسۇلتان ءابىش ۇلى نازاربايەۆ تۇلعاسىنىڭ جەتى قىرىن اشادى.
اتاپ ايتقاندا، «تاۋەلسىزدىك – ماڭگىلىك ءۇشىن كۇرەس كەڭىستىگى» تاراۋىندا ەلباسىنىڭ جاڭا قازاقستاندىق مەملەكەتتىلىكتىڭ نەگىزىن قالاۋشى رەتىندەگى تاريحي ءرولى سومدالادى، ماڭگىلىك ەل قۇرۋ جولىنداعى سىن-تەگەۋرىندەر تۇجىرىمدالادى.
«ەلباسى شاپاعاتى» تاراۋىندا اۆتوردىڭ ن.ءا.نازاربايەۆپەن كەزدەسكەن 1984 جىلدان بەرگى ەستەلىكتەرى، مەملەكەت باسشىسىنىڭ سوعىس ارداگەرلەرىنە قامقورلىعى باياندالادى.
«ەلباسى – جاڭا ۇلتتى قالىپتاستىرعان فەنومەن» اتتى تاراۋدا مەملەكەتقۇراۋشى قازاق ۇلتىنىڭ اينالاسىندا ۇيىسقان قازاقستان حالقىن – «بولاشاعى ءبىرتۇتاس ۇلتتى» ءتۇزۋ كەزەڭدەرى مەن سول جولداعى قيىنشىلىقتار ناقتى وقيعالار نەگىزىندە سارالانادى.
«استانا – جاڭعىرۋدىڭ ءرامىزى» تاراۋى ەلوردانى جاريالاۋ جانە تۇرعىزۋ كەزەڭىندە بولعان، ءبىراق بۇعان دەيىن ەل نازارىنان تاسادا قالىپ كەلگەن توسىن وقيعالار مەن تىڭ دەرەكتەرگە قۇرىلعان.
«ءومىر شىنايىلىعىن وزگەرتكەن ليدەر» تاراۋىندا ب.سماعۇل اسكەري ساراپشى رەتىندە قازاقستان پرەزيدەنتىنىڭ دۇنيەجۇزىندەگى ءارتۇرلى قاقتىعىس وشاقتارىنىڭ ءوشىپ، تۇرعىندارىنىڭ بەيبىت ومىرگە ورالۋىنا ىقپال ەتكەن بىتىمگەر بەينەسىن سوزبەن سومدايدى.
«ازشىلىق ۇلتتى الىپقا اينالدىرعان» تاراۋىندا حالقىنىڭ سانى از بولعانىمەن، الەمدىك كوشباسشى مەملەكەتكە اينالعان دامىعان ەلدەر تاجىريبەسى ساراپتالادى، سونداي-اق «ۇلت اتاسى» اتانعان تاريحي ليدەرلەر قاتارىندا سانالاتىن ن.نازاربايەۆتىڭ قازاقستاندى وزىق «وتىزدىق» قاتارىنا قوسۋ ستراتەگياسىنىڭ ءمان-ماڭىزى عىلىمي تالدانادى.
«پرەزيدەنتكە باعىنۋ – جاعىنۋ ەمەس، ساياساتىن قولداۋ – تابىنۋ ەمەس» قورىتىندى تاراۋىندا تۇڭعىش پرەزيدەنتتىڭ «رۋحاني جاڭعىرۋ» باعدارلاماسىنا جانە سودان ءوربيتىن ماسەلەلەرگە ءمان بەرىلەدى، شىن جۇيرىكتەردى ەمەس، ءتىل جۇيرىكتەردى ىلگەرى شىعارعان «پوستشىندىق» («post-truth») داۋىرىندەگى دەماگوگيا مەن ءپوپۋليزمنىڭ قاۋىپتىلىگى، پراگماتيزمنىڭ قاجەتتىلىگى الەمدىك تاريحي دەرەكتەر ارقىلى دايەكتەلەدى.
باقىتبەك سماعۇل ءوزىنىڭ ۇزاق جىلدارداعى وي-تولعانىسىنىڭ جەمىسى بولىپ تابىلاتىن بۇل ەڭبەگىندە ەلباسى اتىمەن ۇشتاسقان «ەلدىكتىڭ التىن عاسىرىنا» قاتىستى بەتبۇرىستاردىڭ تەك كۋاگەرى عانا ەمەس، تىكەلەي قاتىسۋشىسى رەتىندە ءداۋىر رۋحىن، قازىرگى زامان بەينەسىن عىلىمي نەگىزدە، ءبىراق وي مەن ءتىل ورنەگىن توگە وتىرىپ، اسا قىزىقتى سۋرەتتەيدى.
كىتاپ قالىڭ وقىرمانعا، ءار سالا ماماندارىنا، سونداي-اق بولاشاق «نازاربايەۆتانۋشىلارعا» ورنىقتى وي، دايەكتى دەرەك، تاعىلىمدى ءتۇيىن، ۇلاعاتتى ۇيعارىم ۇسىنادى.
