فورۋمعا قازاقستان رەسپۋبليكاسى پارلامەنتى ءماجىلىسىنىڭ دەپۋتاتتارى، عالىمدار، وقۋ ورىندارىنىڭ وقىتۋشىلارى، قوعام قايراتكەرلەرى، ءدىني بىرلەستىكتەر، مەملەكەتتىك ورگانداردىڭ وكىلدەرى، كوپبالالى باتىر-انالار مەن ستۋدەنتتەر قاتىستى.  ءىس-شارا باعدارلاماسىندا  «قوعامنىڭ دامۋى مەن رۋحاني جاڭعىرۋىنداعى ايەلدەردىڭ ءرولى»؛ «يسلام جانە قازاق حالقىنىڭ ۇلتتىق قۇندىلىقتارى»؛ «دىندەگى ايەل-انالار مارتەبەسى مەن ءرولى»؛ «ءدىن، قوعام جانە وتباسىلىق قۇندىلىقتار»  سەكىلدى تاقىرىپتار قاراستىرىلدى. فورۋمدا قازاقستان رەسپۋبليكاسى پرەزيدەنتىنىڭ كەڭەسشىسى، پرەزيدەنت جانىنداعى ايەلدەر ىستەرى جانە وتباسىلىق دەموگرافيالىق ساياسات جونىندەگى ۇلتتىق كوميسسيانىڭ ءتورايىمى گ.ن.ءابدىقالىقوۆا ءسوز سويلەپ، قوعامداعى جالپىادامزاتتىق قۇندىلىقتاردى دامىتۋ مەن وسكەلەڭ ۇرپاققا تاربيە بەرۋدەگى ايەل-انانىڭ ءرولىن جانە نازىك جاندىلاردىڭ ساياساتقا ارالاسۋىنا بارلىق جاعدايلاردىڭ جاسالۋى قاجەتتىگىن اتاپ ءوتتى.

قازاقستان رەسپۋبليكاسى حالقىنىڭ ساناعى ناتيجەلەرى بويىنشا ەل تۇرعىندارىنىڭ سانى 16009،6 مىڭ ادامدى قۇراسا، ولاردىڭ  8297،4 مىڭى ايەل قاۋىمىنىڭ وكىلدەرىنەن تۇرادى. قازاقستان الەمنىڭ  135 ەلىنىڭ ىشىندە گەندەرلىك تەڭدىك كورسەتكىشتەرى بويىنشا 31 ورىنعا كوتەرىلدى. قازىرگى تاڭدا مەملەكەتتىك قىزمەتكەرلەردىڭ  60%-ىن ايەلدەر قۇرايدى، ال سوت جۇيەسىندە – 61%، سوتتا – 42%، پارلامەنت دەپۋتاتتارى اراسىندا – 34%، كاسىپكەرلىكتە – 40% ايەل ازاماتتار قىزمەت اتقارادى. ەلباسى ن.ءا.نازاربايەۆ «قازاقستان-2050» ستراتەگياسى – قالىپتاسقان مەملەكەتتىڭ جاڭا ساياسي باعىتى» اتتى قازاقستان حالقىنا جولداۋىندا: «مەملەكەت ءۇشىن جانە مەنىڭ جەكە ءوزىم ءۇشىن دە انانى قورعاۋ – ەرەكشە ماسەلە. قىمباتتى حانىمدار! سىزدەر – وتباسىنىڭ دەمەك، مەملەكەتتىڭ تىرەگىسىزدەر.  ەلىمىزدىڭ بولاشاقتا قانداي بولاتىنى بالالارىمىزدىڭ بويىنا ءوزىمىز قانداي تاربيەنى سىڭىرەتىنىمىزگە تىكەلەي بايلانىستى. ەڭ الدىمەن، ءبىز قىزدارىمىزدىڭ تاربيەسىنە كوپ كوڭىل ءبولۋىمىز كەرەك. ولار – بولاشاق جار، بولاشاق انا، شاڭىراقتىڭ شىراقشىلارى»، - دەي كەلە: «ءبىز ايەل زاتىنا – اناعا، جارعا، قىزعا دەگەن قاپىسىز قۇرمەتتى قايتا ورالتۋعا ءتيىسپىز»، - دەپ ايرىقشا اتاپ وتكەن بولاتىن. قازاقستان رەسپۋبليكاسى ءدىن ىستەرى اگەنتتىگىنىڭ ءتوراعاسى قايرات لاما شاريف ءوز سوزىندە بۇل فورۋمنىڭ ەلىمىزدە تۇڭعىش رەت «ايەل جانە ءدىن» اتاۋىمەن بىرەگەي وقۋ ورداسى – قازاق مەملەكەتتىك قىزدار پەداگوگيكالىك ۋنيۆەرسيتەتى قابىرعاسىندا ءوتۋىنىڭ وزىمەن-اق رامىزدىك جانە تاريحي مانگە يە بولىپ تۇرعانىن باسا ايتتى. فورۋمدا قاراستىرىلعان تاقىرىپتاردىڭ وزەكتىلىگى بۇگىندە ەلىمىزدە قازاق مادەنيەتى مەن سالت-داستۇرلەرىن جوققا شىعاراتىن، حيجاب كيىنىپ، قوعام ومىرىنەن الشاقتاعان قىزدار سانىنىڭ ارتا تۇسۋىمەن دە بايلانىستى بولىپ وتىر. ولاردىڭ كوپشىلىگى ءوز قاۋىمدارىنىڭ اياسىمەن شەكتەلىپ، تۇيىقتالۋدا. بۇل رەتتە ق.لاما شاريف ايەلدەردىڭ دىندەگى قۇقىقتارى جونىندە وي قوزعاي وتىرىپ، قاسيەتتى قۇراندا ەر مەن ايەلدىڭ اللا الدىنداعى قۇقىقتارى مەن مىندەتكەرلىكتەرى بىردەي ەكەندىگىن كۋالاندىراتىن تۇستاردىڭ كوپتىگىن ايرىقشا اتاپ ءوتتى. قازاق حالقىندا ايەلدەر كۇندەلىكتى ومىردە ءجۇزىن جاۋىپ جۇرمەگەن، وزگەلەردەن وقشاۋلانىپ نەمەسە ەرلەرىنىڭ رۇقساتىنسىز باسقالارمەن سويلەسۋ قۇقىعىنان ايىرىلىپ كورگەن ەمەس. قازاق ءتىلىنىڭ باي دا قۇنارلى سوزدىك قورىندا «حيجاب» ۇعىمى جوققا ءتان. فورۋم بارىسىندا قازاق مەملەكەتتىك قىزدار پەداگوگيكالىك ۋنيۆەرسيتەتىنىڭ كەشەنىندە ۇيىمداستىرىلعان «قىز جىبەك» كلۋبىنىڭ تۇساۋكەسەرى ءوتتى. بۇل باستامانىڭ باستى ماقساتى – قىزداردى ۇلتتىق داستۇرلەر مەن ءتول دۇنيەتانىم اياسىندا تاربيەلەۋ جانە ولارعا وزىق زاماناۋي قۇندىلىقتاردى ءسىڭىرۋ. ۇيىمداستىرۋشىلار «قىز جىبەك» كلۋبىنىڭ اياسىندا وزىندىك تاربيە مەكتەبىنىڭ قالىپتاسۋىن كوزدەيدى. ياعني، كلۋب الدىڭعى بۋىن وكىلدەرى مەن زامانداس قۇربىلاردىڭ سىرلاسىپ، پىكىر الماساتىن سۇحبات الاڭىنا اينالۋعا ءتيىس. بولاشاقتا كلۋب تاجىريبەسى يگى باستاما رەتىندە ەلىمىزدىڭ باسقا دا ايماقتارىنا تارالاتىن بولادى، سونداي-اق وسى تەكتەس كلۋبتار ەلىمىزدىڭ وزگە دە جوعارعى وقۋ ورىندارىندا اشىلادى.