قازاقستانداعى ەكىنشى اتوم ەلەكتر ستانسياسىنىڭ (اەس) قۇرىلىسىن سالۋ جونىندەگى كونسورسيۋمنىڭ جەتەكشىسى رەتىندە قىتايدىڭ CNNC (China National Nuclear Corporation) كومپانياسى تاڭدالدى. بۇل تۋرالى اتوم ەنەرگياسى جونىندەگى اگەنتتىك ءتوراعاسى الماسادام ساتقالييەۆ مالىمدەدى.

ونىڭ ايتۋىنشا، الدىن الا ىرىكتەۋگە قاتىسقان بارلىق ۇمىتكەرلەردىڭ وزىنە ءتان بىرەگەي تەحنولوگيالارى بولعانىمەن، ەڭ تارتىمدى ۇسىنىستار جۇڭگو مەن رەسەي كومپانيالارىنان تۇسكەن.

 «قىتايمەن يادرولىق سالاداعى ىنتىماقتاستىق تۋرالى جەكە كەلىسىمگە قول قويۋ جوسپارلانىپ وتىر. ءبىز تاعى ءبىر اەس سالۋ ءۇشىن جۇڭگو تەحنولوگيالارىن قازاقستاندا كورگىمىز كەلەدى. وبەكتيۆتى تۇردە ايتساق، الەمدە يادرولىق وتىن سيكلىن تولىق يگەرە الاتىن ەلدەر كوپ ەمەس. جۇڭگو – سونداي مەملەكەتتەردىڭ ءبىرى. ءبىزدىڭ كەلەسى باستى باسىمدىعىمىز – قىتايمەن ىنتىماقتاستىق»، – دەدى ساتقالييەۆ.

اگەنتتىك باسشىسى سونداي-اق جۇڭگو تاراپىمەن جوعارى دەڭگەيدە كەلىسسوزدەر جۇرگىزىلىپ جاتقانىن، قازاقستاندىق تاراپ قىتايدىڭ جىلدام ءارى ساپالى قۇرىلىس جۇرگىزۋ تاجىريبەسىن پايدالانۋعا مۇددەلى ەكەنىن ايتتى.

«ءبىز بۇل باعىتتا جۇمىستى باستاپ كەتتىك. اگەنتتىك ءتيىمدى كونسورسيۋمدار قۇرۋى ءتيىس»، – دەدى ول.

ايتا كەتەيىك، بۇعان دەيىن ەلىمىزدە سالىنىپ جاتقان ءبىرىنشى اەس قۇرىلىسىن رەسەيلىك “روساتوم” كومپانياسى جۇزەگە اسىراتىنى حابارلانعان بولاتىن.