"روساتوم" مەملەكەتتىك كورپوراسياسىنىڭ باس ديرەكتورى الەكسەي ليحاچيەۆ قازاقستانداعى العاشقى اتوم ەلەكتر ستانسياسىن (اەس) سالۋعا حالىقارالىق كونسورسيۋمعا جەتەكشىلىك ەتۋگە قاتىستى پىكىر ءبىلدىردى. ونىڭ ايتۋىنشا، جوبا اياسىندا الەمدەگى ەڭ زاماناۋي اەس-تەردىڭ ءبىرى بوي كوتەرمەك.

اەس جوباسىندا جاڭا بۋىنداعى ۆۆەر-1200 رەاكتورلارى قولدانىلماق. ليحاچيەۆتىڭ مالىمدەۋىنشە، بۇل – ۋاقىت سىنىنان وتكەن ينجەنەرلىك شەشىمدەر مەن حالىقارالىق قاۋىپسىزدىك ستاندارتتارىنا تولىق ساي كەلەتىن، بەلسەندى جانە ءپاسسيۆتى قورعانىس جۇيەلەرىمەن جابدىقتالعان "3+" بۋىنداعى رەاكتورلار.

"مۇنداي رەاكتورلار قازىرگى ۋاقىتتا رەسەيمەن قاتار بەلارۋس، ۆەنگريا، مىسىر، تۇركيا، بانگلادەش جانە قىتايدا دا ءساتتى پايدالانىلىپ جاتىر"، – دەدى ول.

ليحاچيەۆ جوبانى جۇزەگە اسىرۋ بارىسىندا وزىق تەحنولوگيالار مەن حالىقارالىق تاجىريبە قولدانىلاتىنىن اتاپ ءوتتى. ونىڭ ايتۋىنشا، "روساتوم" قازاقستاننىڭ ەرەكشەلىكتەرىن ەسكەرە وتىرىپ، ءتۇرلى ەلدەردىڭ جەتكىزۋشىلەرىمەن تىعىز جۇمىس ىستەۋدى جوسپارلاپ وتىر.

"الدا ۇلكەن جۇمىس كۇتىپ تۇر. ءبىز بۇل ىسكە رەسەي مەن قازاقستان بيلىگىنىڭ قولداۋىنا سەنىم ارتامىز"، – دەلىنگەن "روساتوم" تاراتقان رەسمي مالىمدەمەدە.

ەسكە سالا كەتەيىك، بۇعان دەيىن قازاقستاننىڭ اتومدىق ەنەرگيا اگەنتتىگى العاشقى اەس جوباسى بويىنشا حالىقارالىق كونسورسيۋمعا "روساتوم" جەتەكشىلىك ەتەتىنىن حابارلاعان بولاتىن. اگەنتتىك باسشىسى الماسادام ساتقالييەۆ بولاشاقتا تاعى ءبىر اتوم ستانسياسىن سالۋ جوسپاردا بارىن ايتىپ، ول جوباداعى نەگىزگى سەرىكتەس رەتىندە قىتايدىڭ مەملەكەتتىك CNNC كورپوراسياسى تاڭدالاتىنىن جەتكىزگەن.

ساتقالييەۆتىڭ ايتۋىنشا، اەس قۇرىلىسى اياقتالعان سوڭ، قازاقستان ونىڭ تولىققاندى يەسى بولادى. جوباداعى سەرىكتەستىك فورمۋلاسى: "كەلدى، سالدى، ۇيرەتتى – كەتتى" قاعيداسىنا نەگىزدەلگەن.