پرەمەر-مينيستردىڭ ءبىرىنشى ورىنباسارى رومان سكليار “جۇڭگو – ورتالىق ازيا” يندۋستريالىق-ينۆەستيسيالىق ىنتىماقتاستىق فورۋمىندا سويلەگەن سوزىندە ورتالىق ازيا ءوڭىرىنىڭ اۋىل شارۋاشىلىعى جانە ستراتەگيالىق مەتالدار سالاسىنداعى زور الەۋەتىنە توقتالدى.
سكلياردىڭ ايتۋىنشا، ورتالىق ازيا — قۇرعاق ەگىستىك اۋىل شارۋاشىلىعىن دامىتۋعا قولايلى كليماتتىق جاعدايلارعا يە الەمدەگى بىرەگەي وڭىرلەردىڭ ءبىرى. بۇل ايماق بيداي، مايلى داقىلدار، سونداي-اق ەت پەن ءسۇت ونىمدەرىن وندىرۋدە جوعارى باسەكەگە قابىلەتتىلىككە يە.
"اۋىل شارۋاشىلىعىن دامىتۋدا نەگىزگى باسىمدىق — جاڭا تەحنولوگيالاردى ەنگىزۋ، ونىمدىلىكتى ارتتىرۋ جانە ءونىمدى تەرەڭ وڭدەۋ. قازاقستان الداعى ون جىلدا ءداندى داقىلداردى تەرەڭ وڭدەۋ بويىنشا الەمنىڭ ۇزدىك ون ەلىنىڭ قاتارىنا كىرۋدى جوسپارلاپ وتىر"، – دەدى ول.
سونىمەن قاتار، ول قازاقستان مەن جۇڭگو اراسىندا ورگانيكالىق اۋىل شارۋاشىلىعى ونىمدەرىن جۇڭگو نارىعىنا جەتكىزۋ باعىتىندا ەلەۋلى ءوسۋ الەۋەتى بار ەكەنىن اتاپ ءوتتى. بۇل ءۇشىن ەكى ەل اراسىنداعى شەكتەۋلەردى تولىق الىپ تاستاۋ قاجەت.
فورۋمدا سكليار سيرەك كەزدەسەتىن جانە ستراتەگيالىق مەتالدار سالاسىنداعى ۇزاق مەرزىمدى ارىپتەستىكتى دامىتۋدىڭ ماڭىزدىلىعىنا دا نازار اۋداردى.
"بۇل مەتالدارعا الەمدىك سۇرانىس جىلدان-جىلعا ارتىپ كەلەدى. ولار بۇگىندە 'ەكىنشى مۇناي' رەتىندە باعالانادى. قازاقستاندا 5 مىڭعا جۋىق زەرتتەلمەگەن پايدالى قازبالار كەن ورنى بار. ءبىز نيكەل قورىتپالارى مەن اككۋمۋلياتورلىق ماتەريالدار ءوندىرىسىن ەكى نەگىزگى باعىت رەتىندە ايقىندادىق"، – دەدى ول.
سكليار بۇل سالادا قازاقستان "ينۆەستيسيالار مەن تەحنولوگيالار – شيكىزاتقا" دەگەن پراگماتيكالىق فورمۋلاعا سۇيەنىپ، قىتايلىق كومپانيالارمەن ناقتى جوبالاردى ىسكە اسىرۋعا دايىن ەكەنىن جەتكىزدى.
ءسوز سوڭىندا ول قازاقستاندا قىتايدىڭ قاتىسۋىمەن 50 مىڭ جاڭا جۇمىس ورنى اشىلعانىن، الداعى ۋاقىتتا ەكى ەل اراسىنداعى ينۆەستيسيالىق ىنتىماقتاستىق جاڭا دەڭگەيگە كوتەرىلەتىنىن ەسكە سالدى.
