2018 نەگاتيۆكە دە، پوزيتيۆكە دە تولى جىل بولدى. شىنى كەرەك، "ادامدى ءولتىرىپ كەتتى، زورلاپ كەتتى، تىرىدەي ورتەنىپتى" دەگەن سىندى نەگاتيۆ جاڭالىقتار حالىقتىڭ ەسىندە ساقتالىپ قالادى. ءتىپتى تالقىلاۋعا دەس بەرمەس تاقىرىپتار دەسەك تە بولادى. ال سول 365 كۇندە الەمدە قانشاما جاقسىلىقتىڭ جاسالعانىنا حاباردارسىز با؟ 2018 جىل الەمدە قانداي جاعىمدى جاڭالىقتارىمەن ەستە قالدى، الەمدى سۇيسىنتكەن قانداي وقيعالار ورىن الدى، ءبىر جىلدا بۇكىل الەمدى وزگەرتكەن كەيىپكەرلەر كىم؟ سونداي وقيعالاردىڭ 10-ىن ءتىزىپ كوردىك.
Facebook – ۇلى كۇش. ەرەكشە وقيعاڭىزدى جازساڭىز، اپ-ساتتە بۇكىل الەمگە تانىمال بولىپ شىعا كەلەسىز. 2017 جىلعى كورسەتكىشكە سايكەس، Facebook الەۋمەتتىك جەلىسىنە 2 ميللياردقا جۋىق ادام تىركەلگەن. تومەندەگى وقيعالاردىڭ ءبارى دەرلىك اتالمىش جەلىگە جاريالانىپ، تانىمالدىلىققا يە بولدى.
1.7 جاسار بالا قايتىس بولعان اكەسىنە حات جازادى. قىزىعى، بالانىڭ حاتىنا جاۋاپ كەلگەن.
«پوشتاشىعا. مىنا حاتىمدى كوككە اكەمە جىبەرە الاسىز با؟ بۇگىن ونىڭ تۋعان كۇنى ەدى. راقمەت».
شوتلانديا تۇرعىنى، 7 جاسار دجەيس حيندماننىڭ اكەسى وسىدان 4 جىل بۇرىن و دۇنيەلىك بولعان. ءبىراق دجەي مەن اپكەسى ءار جىل سايىن اكەلەرىنىڭ تۋعان كۇنىندە قۇتتىقتاۋ حاتىن جازىپ تۇرادى. الايدا وسى جولعىسى ەرەكشە ەدى. بالا كەزەكتى حاتىن پوشتاشىدان كوككە جەتكىزىپ بەرۋىن وتىنگەن. بىرنەشە كۇننەن سوڭ بالاعا پوشتا قىزمەتىنەن جاۋاپ تا كەلگەن. وندا «حاتىڭىز ەش قيىندىقسىز ءتيىستى مەكەن -جايعا جەتكىزىلدى. جۇلدىزدارمەن جانە عارىش نىساندارىمەن الىسىپ وتىرىپ جەتكىزدىك» دەلىنگەن. دجەيستىڭ اناسى تەري كوپلەند بولعان وقيعانى Facebook جەلىسىندەگى پاراقشاسىندا جازدى. ءبىراق جازباسىنىڭ اسا تانىمال بولىپ كەتەرىن انا بىلمەدى. 502 مىڭ قولدانۋشى «ۇناتۋ» بەلگىسىن باسىپ، 276 مىڭ ادام Repost جاساعان. بۇل كوپتىڭ كوڭىلىن تولعاندىرعان، پەرىشتە جۇرەكتىڭ سەنىمىن تاپتاماۋعا ۇيرەتكەن كەرەمەت وقيعانىڭ ءبىرى وسى بولدى.
2.يتالياندىق IKEA-عا قاڭعىباس يتتەر قونىستانعان. قىزمەتكەرلەر يتتەرگە بارىنشا قامقورلىق تانىتىپ ءجۇر، كەيبىر يتتەردى ساتىپ الۋشىلار دا تابىلعان.
يتالياداعى كاتانيا قالاسىندا IKEA قىزمەتكەرلەرى قاڭعىباس يتتەر ءۇشىن دۇكەن ەسىگىن اشىق قالدىرىپ قويعان. يتتەر مۇندا كىرىپ ۇيىقتايدى، جاتىن بولمەلەردە جىلىنادى، ال قىزمەتكەلەر ولاردى تاماقتاندىرادى. دۇكەنگە كىرگەن تۇتىنۋشىلار دۇكەننەن جاڭا زاتپەن ەمەس، ءتىپتى يتپەن شىعىپ جاتادى.
3.ەر ادامعا جوعالعان ءاميانىن قايتارىپ بەرگەن، بوس قالپى ەمەس، ىشىنە 40 دوللار سالىپ...
وڭتۇستىك داكوتا تۇرعىنى حانتەر شامەتت اپكەسىنىڭ ۇيلەنۋ تويى ءۇشىن لاس ۆەگاسقا ۇشىپ بارادى. الايدا ۇشاقتا ءاميانى مەن قۇجاتتارىن جوعالتىپ الادى. ءاميانىنىڭ ىشىندە 60 دوللار اقشا بولعان. جىگىتتىڭ كوڭىل-كۇيى ءتۇسىپ، تابىلاتىنىنان ءۇمىتتى بولمادى. بىرنەشە كۇننەن سوڭ حانتەرگە سالەمدەمە كەلەدى. اشىپ قاراسا، ءوزىنىڭ ءاميانى مەن حات جاتىر ەكەن. وندا «حانتەر، سەنىڭ ءاميانىڭدى وماحا ۇشاعىنان تاۋىپ الدىم. ورىندىق پەن ۇشاق قابىرعاسىنىڭ ورتاسىنا ءتۇسىپ قالىپتى. ىشىندەگى 60 دوللاردىڭ جانىنا تاعى دا 40 دوللار سالىپ قويدىم. ءاميانىڭدى قايتارعانىڭنىڭ قۇرمەتىنە جاقسىلاپ تويلارسىڭ» دەپ جازىلعان ەكەن.
بۇل وقيعانى اناسى دجينني شامەتت Facebook-تەگى جەكە پاراقشاسىندا ءبولىستى. ءارى حاتتىڭ يەسىن دە ىزدەستىرىپ جاتقانىن جازعان.
4. كاليفورنيالىق دارىگەر ءورت كەزىندە ءوزىنىڭ Toyota كولىگىمەن ادامداردى ورتتەن الىپ شىققان. كولىك جانىپ كەتتى، ەسەسىنە ادامدار امان قالدى. ال كومپانيا مەديككە جاڭا كولىك سىيلادى.
كاليفورنيانىڭ پارادايز قالاسىنىڭ تۇرعىنى اللين پريس ادامداردى ورمانداعى جانعان ورتتەن قۇتقارىپ قالدى. Toyota كولىگىنە وتىرىپ، ناۋقاستاردى قۇتقارۋ ءۇشىن ول اۋرۋحاناعا ەكى مارتە ورالعان. بۇل وقيعادان كەيىن اللين كولىگىنىڭ ورتەنگەن ءتۇرىن سۋرەتكە ءتۇسىرىپ، Facebook جەلىسىندەگى پاراقشاسىنا سالادى. «Toyota Tundra مەنىمەن قوسا بىرنەشە ادامنىڭ ءومىرىن قۇتقارىپ قالدى» دەپ جازادى. ارتىنشا Toyota كومپانياسىنىڭ رەسمي اككاۋنتىنان اللينگە حابارلاما كەلەدى. وندا «Toyota Tundra-مەن قوسا ءوز ءومىرىڭىزدى قۇربان ەتىپ، ادامداردى ورتتەن قۇتقارىپ قالعانىڭىز ءۇشىن العىسىمىزدى بىلدىرەمىز. الاڭداماڭىز، ءبىزدىڭ كومپانيا ورتەنگەن كولىگىڭىزدى جاڭاسىمەن اۋىستىرىپ بەرۋگە دايىن» دەپ جازىلعان.
5.رەسەيلىك جىگىت ءوز اقشاسىنا مۇگەدەكتەر مەن ارداگەرلەردىڭ پاتەرىنە جوندەۋ جۇمىستارىن جاساپ بەرىپ ءجۇر.
ەكاتەرينبۋرگ تۇرعىنى انتون ساۆچۋك ءوز اقشاسىنا ۇيگە ارنالعان جابدىقتاردى ساتىپ الىپ، جوندەۋ جۇمىستارىن جاساپ ءجۇر. تەگىن... كىمگە دەيسىز عوي؟ مۇگەدەكتەر مەن ارداگەرلەردىڭ ۇيلەرىنە... ءدال قازىرگى ۋاقىتتا مۇگەدەك ايەل مەن 95 جاستاعى سوعىس ارداگەرىنىڭ پاتەرىنە جوندەۋ جۇمىستارىن جۇرگىزۋ ۇستىندە. بۇل تۋرالى انتون ءوزىنىڭ YouYube كانالىندا بايانداپ وتىرادى.
6.كاسىپكەر قاڭعىباسقا جۇمىس بەرىپ، ءومىرىن وزگەرتتى.
وتيس وۋيلل ۆيليامس ەسىمدى كاسىپكەر Facebook جەلىسىندەگى پاراقشاسىندا ەرەكشە قىزمەتكەر جايلى پوست جازدى. «وسىدان 7 اي بۇرىن بۇل جىگىتتى ۋاقىتشا جۇمىسقا ورنالاستىرعان ەدىم. ونىڭ نە ءۇيى، نە ىشەر اسى، نە كيىمى بولماعان. كوپىرى جاعالاپ جۇرگەن ءبىر بەيباق ەدى. جۇمىسقا تۇرعان كۇننەن باستاپ، بىردە - ءبىر رەت كەشىككەن ەمەس، جۇمىسىن تياناقتى ورىنداپ ءجۇردى. ال بۇگىن اتا-اناسىمەن قاۋىشتى، كولىگى دە، كيىمى دە بار. ءارى مەنىڭ كومپانيامنىڭ رەسمي قىزمەتكەرى"، - دەپ جازدى. ءوتيستىڭ مەيىرىمدىلىگى جەلى قولدانۋشىلارىن ءتانتى ەتتى، ول الەۋمەتتىك جەلىدە 200 مىڭ «ۇناتۋ» بەلگىسىن جينادى.
7.دۇكەندە بەلگىسىز بىرەۋ ادامداردىڭ ازىق-تۇلىگىنىڭ اقشاسىن تولەپ بەرگەن.
امەريكالىق دجۋل ەنن گەيتس Facebook-تەگى پاراقشاسىنا دۇكەندە بولعان تاڭعالارلىق وقيعانى جازىپتى. ءوزى ۇلىنا سىيلىق الماق بولىپ دۇكەنگە بارعان. اقشاسىن تولەۋ ءۇشىن كاسساعا كەلسە، ادامدار ءبارىنىڭ اقشاسىن ءوزى تولەپ جاتقان مەيىرمدى جان جايلى كۇبىرلەسىپ تۇرادى. راسىندا، بەلگىسىز جان دجۋللدىڭ دا 200 دوللارىن ءوزى تولەدى. «الگى جۇمباق جانعا العىس ايتۋدان جالىقپايمىن!» دەپ جازدى ايەل پاراقشاسىنا.
8.تاكسيست ارتقى ورىندىقتا ءاميانىن ۇمىتىپ كەتكەن جولاۋشىنى كولىكتە 8 ساعات كۇتكەن.
دۋبلين تۇرعىنى، رەسەيلىك ۆارۆارا بورسوۆا جەكە پاراقشاسىنا تاكسيشىنىڭ بويىنداعى ەرەكشە قاسيەتتى جازىپ، حالىقتى ءبىر مارقايتىپ الدى. «بۇگىن تاڭعى 5-تە ماسكەۋگە قونىپ، تاكسي ۇستادىم. جۇرگىزۋشى قىرعىزستاننان كەلگەن ەكەن، ۇيگە جەتكەنشە اڭگىمەلەسىپ باردىق. ۇيىمە كەلىپ، ءبىر مىزعىپ الۋدى ءجون كوردىم دە، ويانعان سوڭ ءاميانىمدى الگى تاكسيدە ۇمىتىپ كەتكەنىمدى ءتۇسىندىم. قولداۋ قىزمەتىنە حابارلاستىم، ءبىراق كولىك تابىلمادى. كارتامدى بۇعاتتاماق بولعاندا، تەرەزەگە ۇڭىلگەن اكەم اۋلادا تاكسي كولىگىنىڭ تۇرعانىن ايتتى. ۇيدەن اتىپ شىقسام، قىرعىزستاندىق تاكسيشى تۇر ەكەن. مەنى اۋلادا 8 ساعات بويى كۇتكەن ەكەن. «وسىنشاما ۋاقىت ۇيىقتاۋعا بولا ما ەكەن؟ توڭىپ قالدىم عوي!» دەپ جىميىپ تۇر. قۋانىشتان با، بىلمەدىم، جىلاپ جىبەردىم دە، جىگىتتى قۇشاقتادىم. ول دا جىلادى. ءتىپتى «تاماقتاندىڭ با؟» دەپ تە سۇراماپپىن عوي؟ ول – عاجاپ ادام. وعان العىس رەتىندە كوپ اقشا بەردىم، ءبىراق ريزاشىلىعىم شەكسىز ەدى».
9.ءمۇعالىم ۇشاقتا وزىمەن ۇشىپ بارا جاتقان جولاۋشىعا كەدەي وتباسىنان شىققان وقۋشىلار جايىندا ايتىپ بەردى. مۇنى ەستىگەن وزگە جولاۋشىلار وقۋشىلارعا اقشا جيناپ، مۇعالىمنەن بەرىپ جىبەردى.
چيكاگولىق ءمۇعالىم كيمبەرلي بەرمۋدەس اكەسىنىڭ كوڭىلىن سۇراپ قايتۋ ءۇشىن فلوريداعا ۇشادى. ۇشاق ىشىندە جانىندا وتىرعان ول جولاۋشىمەن ءتىل تابىسىپ كەتەدى. جولاۋشى مۇعالىمنەن "جۇمىس بارىسىندا ەڭ قيىن سوعاتىن نە نارسە؟" دەپ سۇراعاندا، كيمبەرلي «مەكتەپكە اش كەلىپ، اش كەتەتىن، كيەرگە كيىمى جوق كەدەي وتباسىنان شىققان وقۋشىلارعا قاراۋ – قيىننىڭ قيىنى» دەپ جاۋاپ بەرەدى. ءسويتىپ ارتقى ورىندىقتا كيمبەرليدىڭ ءسوزىن مۇقيات تىڭداپ وتىرعان تاعى ءبىر جولاۋشى "وقۋشىلار ءۇشىن" دەپ اقشا بەرەدى.. تاعى ەكى جولاۋشى ءدال وسىلاي ىستەيدى. بۇل جايىندا جەكە پاراقشاسىنا جازعان ءمۇعالىم جالپى 530 دوللار اقشا جينالعانىن ايتتى.
10.پيسسەريا قوقىس شەلەگىنەن تاماق ىزدەگەن قاڭعىباس ءۇشىن ەسىگىنە حابارلاندىرۋ ءىلىپ قويدى.
Reddit قولدانۋشىسى سولتۇستىك داكوتاداعى پيسسەريانىڭ ەسىگىنەن ەرەكشە حابارلامانى بايقاپ، سۋرەتكە ءتۇسىرىپ الادى. وندا «بۇل ءبىزدىڭ قوقىس شەلەگىمىزدەن تاماق ىزدەپ جۇرگەن ادامعا ارنالادى. قوقىستاعى تاماققا ەمەس، ءسىز بار جاقسىعا لايىقتى جانسىز. ءبىزدىڭ مەيرامحاناعا كىرىپ، تەگىن تاماقتانىپ كەتۋىڭىزدى وتىنەمىز. ارتىق سۇراق قويمايمىز» دەپ جازىلعان.
