ارمەنيا حالقىنىڭ گەنەتيكالىق تۇراقتىلىعى عالىمدار ءۇشىن ءالى دە جۇمباق بولىپ تۇر.

رەسەي اكادەمياسىنىڭ عالىمدارى، ارمەنيا عىلىم اكادەمياسىنىڭ زەرتتەۋشىلەرى، دات جانە بريتاندىق عالىمدار، جالپى 18 مامان ارميان ايەلدەرىنىڭ گەنەتيكالىق ەرەكشەلىكتەرىن زەرتتەدى. وتكەن عاسىرلارداعى ايەلدەر مەن XXI عاسىر ايەلدەرى دە زەرتتەۋدەن ءوتتى. ناتيجەسىندە عالىمدار اڭ-تاڭ: ارميان ايەلدەرى قاي عاسىردا دا وزگەرمەگەن، سول قالپى.

زەرتتەۋشىلەر وسىدان 8 مىڭ جىل بۇرىن ءومىر سۇرگەن ارميان حالقىنىڭ 52 قاڭقاسىنىڭ دنق-سىن شىعاردى. ولاردى بۇگىنگى كۇنى ءومىر ءسۇرىپ جاتقان ايەلدەردىڭ دنق-سىمەن سالىستىردى. تولىق ميتوحوندريالى گەنومداردىڭ ءاناليزى ايىرماشىلىقتىڭ مۇلدە جوق ەكەنىن كورسەتتى.

ايەلدەردىڭ گەنوفوندى بىرنەشە مىڭداعان جىل بويى ءبىر وزگەرمەگەن. بۇل تۋرالى عالىمدار Current Biology جۋرنالىنا تاڭدانىسپەن ايتىپ بەردى.

-بۇگىندە ارمەنيا ورنالاسقان مەكەنگە ادامدار شامامەن 18 مىڭ جىل بۇرىن قونىستانا باستاعان – مۇز ءداۋىرىنىڭ اياعىنا تاپ كەلەدى، - دەپ ءتۇسىندىردى دانيا گەوگەنەتيكا ورتالىعىنىڭ زەرتتەۋشىسى اشوت مارگاريان. – ەجەلدە ول ەۋروپا مەن تاياۋ شىعىستىڭ اراسىنداعى كوپىر سياقتى بولدى. شامامەن 3 مىڭ جىل بۇرىن ميگراسيا جاپپاي جينالدى. حالىقتار ارالاستى، مادەنيەتتەر اۋىستى. الايدا مۇنىڭ ءبارى ارميان ايەلدەرىن اينالىپ ءوتىپتى. ءبارى وزگەرگەن، تەك ارميان ارۋلارى ەمەس.

ارمياندىقتاردىڭ گەنەتيكالىق تۇرعىدان تازالىعىن عالىمدار ءالى دە انىقتاي العان جوق. ءتىپتى بولجامدارى دا جوق ەكەن. «سوندا ارميان ايەلدەرى 8 مىڭ جىلدان بەرى وزگە ۇلتپەن مۇلدە نەكەگە تۇرماعان با، جاقىن قارىم-قاتىناستا بولماعان با؟ مۇمكىن ەمەس!» دەپ ولار تاڭدانىستارىن جاسىرمادى.

مۇنى زەرتتەۋ ءۇشىن ەندى ولار ءازىربايجان جانە گرۋزياداعى گەنەتيكالىق زەرتتەۋلەردىڭ كومەگىنە جۇگىنبەك.

دەرەككوز: نوۆوستيك

ۇسىنعان: گۇلىم جاقان