"بەلگىلى تەلەجۋرناليست، بىلىكتى مامان بيبىگۇل جەكسەنباي «استانا» تەلەارناسىنىڭ باس ديرەكتورى بولىپ تاعايىندالدى. بۇگىن تەلەارناعا ارنايى بارىپ، ۇجىمعا جاڭا باسشىنى تانىستىردىم". بۇل تۋرالى "Nur Otan" پارتياسى ءتوراعاسىنىڭ ءبىرىنشى ورىنباسارى ماۋلەن اشىمبايەۆ ءوزىنىڭ فەيسبۋك پاراقشاسىندا حابارلادى.

–بيبىگۇل جەكسەنباي وتاندىق اقپارات ايدىنىندا اتى قالىپتاسقان كاسىبي جۋرناليست. ءال-فارابي اتىنداعى قازاق ۇلتتىق ۋنيۆەرسيتەتىنىڭ جۋرناليستيكا فاكۋلتەتىن بىتىرگەن. سونداي-اق بيزنەس-باسقارۋ ماگيسترى. ەڭبەك جولىن قاتارداعى كوررەسپوندەنتتەن باستاپ ەلىمىزدەگى ءىرى بۇقارالىق اقپارات قۇرالدارىنىڭ توپ-مەنەدجەرىنە دەيىن كوتەرىلدى. اتاپ ايتقاندا، «حابار» اگەنتتىگىندە، «Qazaqstan» ۇلتتىق تەلەارناسىندا جانە «جەتىنشى ارنادا» جاۋاپتى قىزمەتتەر اتقارىپ، وزىنە جۇكتەلگەن مىندەتتەردى مۇلتىكسىز ورىنداي ءبىلدى.

بيبىگۇل نۇرعالي قىزى كوپتەگەن تەلەجوبالار مەن دەرەكتى فيلمدەردىڭ اۆتورى جانە «باس رەداكتورلار كلۋبىنىڭ» پرەزيدەنتى رەتىندە دە ءوزىنىڭ جوعارى ۇيىمداستىرۋشىلىق قابىلەتىن كورسەتتى. قانداي قىزمەتتە بولسا دا تەك تالانتتى جۋرناليست، مىقتى مەديا-مەنەدجەر، كاسىبي مامان جانە بىلىكتى باسشى رەتىندە عانا تانىلدى.

سوندىقتان بيبىگۇل جەكسەنباي جاڭا قىزمەتتە دە بەلسەندىلىك تانىتىپ، «استانا» تەلەارناسىنىڭ ودان ءارى دامۋىنا تىڭ سەرپىن بەرەدى دەپ سەنەمىز. سول جولدا بيبىگۇل نۇرعاليقىزىنا جانە بارشا تەلەارنا ۇجىمىنا شىعارماشىلىق تابىس پەن سارقىلماس شابىت تىلەيمىن!،–دەدى ماۋلەن اشىمبايەۆ.